Read Huli Yobo 38 Bible Online

Yobo 38 - Huli bible

Yobo 38

¹Elihu ibugua bi lai heagola Anduane Homogo ibuni hari daba bialu iba dalu timbuni ibiyagoha howa ibugua Yobohanda bi lalu hayaru ladai bialu lalu,

²Yobo-o í̱ mini bayalebi manda bayalebi nawioredago. Í̱ agali agobime bi dewa lama ibaga bialu howa i̱naga biabe bule ngoru mo habo lalu kebe.

³Ai áyu í̱ agalioreyagua naigoria heyu howa bi maru ladai bibelo hale haro.

⁴I̱na dindi ogo wabialu mo hongo halu harungi í̱ agoha haribe. Bi te í̱na baya hangu mandabu keyagua nde i̱ langerene.

⁵Dindi ogobiore wiloda manda bialu wabinidago aiwabe. Dindi ogoninaga magi manda bule hagane pu yalu mandabu penedago ai kabe. Í̱na manda bidebe.

⁶Dindi ogo hongo howa yu helonaga gene agohayagi kabe. Dindi wabulenaga gene ege to̱le̱ dindiha ala ngelenedago aiwabe.

⁷Dindi ogoni pigane wabialu heangi yakundi bu hearume turu halu iba gana layagola dahuliyali hearume turu howa iba gana ladaga halu hene.

⁸Iba timbuni solowara bedaru dindinaga tombeneha howa tidatagi halu ibiyagola ai naibi harula lalu iba ibu birulene ngagoria biradaba lenedago aiwabe.

⁹Iba solowara pigane íbu bereagola hari beralibame iba ibu aga biradagua bia howa yári buwa berelene. Wali ai̱yame waneigini agame yári bia hagadagua hari beraliba mindibime iba dambi helenego i̱na ndobe.

¹⁰Ani bialu iba ibu birulenegoha biru wahelo pabe bu mabu bido.

¹¹Ani berelowa iba solowara ibuhondo bi ogobi lamido. Iba yaribu bialu howa í̱ninaga hobane ngelarogoria ibalu dai bibe. Dindi mendeha pogolo amu nahabe, ledogoni.

¹²Yobo-o la naberego agua biya. Halu mbira í̱na bi larigola mbiraga winigo ega bi layabe. Be horo bibahendengi egerebagi hangu wiaaboha larilibe.

¹³Arumame mbiraga balangiya aleme dindi dambi hai kagola wali agali ko biaga karume ko bule mbiraga ibagabu hagago. Ai horo mbirungi mbiraga pageali ko biagaru íbu heagola uruni ibida pelo í̱na ega bi la larigola ega bi layagola agali ko bialu ibida piai hayabe.

¹⁴Ega bi laragola ni dedagome wá haragola mbiraga arumaha wia do hayaru wá kagoria baya hanguore handai holeberema.

¹⁵Uruni agali ko karunaga mana ko ngaru turu howa bialu haga horombe ale nga. Anigo horongi tinaga biabe ko biradaruni wahalu bibe nahedagola bame haga.

¹⁶Ai iba solowara bedagonaga andaneha anda puwa iba andane dindiha ibagabu halu iba dugu daga haga ngago handaribe.

¹⁷Agua biyabe. Í̱na dindi andaneha puwa wali agali homeneru piaga panga haraba arumame ndibulo wahe wiago handaribe.

¹⁸Dindi ogoni timbuniore ngago ai dindi ogoninaga lene lene gimbuni ngaruha handai kebe. Hondowa manda biai keyagua nde i̱ langia nabere.

¹⁹Ai wá holene ibu nde ibuni dalu pole piagago hariga í̱ hendedebe. Mbiraga ibuni dalu agoha ngabe.

²⁰Wá holene aruma holenela libu libuni dalu dai bilonaga hariga ogodagua pudaba lowa walia halu lone dai bidaba loleberebe.

²¹Yobo-o í̱ agali waheoredago í̱na libu dalu ogo lalu walia holeberegoni. Irane i̱na wá holenebi aruma holenebi wa nabi hewangi í̱ ai̱yahanda í̱ ala taba henenedago.

²²Iba dalu dindigunila mo mogobu ngelaga ngago í̱ hondo piribe.

²³I̱na uruni wali agalime mine howa wai bialu baga baga bialu karu bolenaga manda mandabu ngeledogoni.

²⁴Ni pigane dole hoai lalu bibahendeha datogo mani lole piganeore hoai lagago hariga agoha pole porabe. Ni tagira ibiragoha howa puyabu ibuwa bibahendeha pume hagago ibunaga hariga a ngagobe.

²⁵Dindi ogoria iba ibilonaga hari daligaha howa iba gana bialu aiwa dadabu ibilagabe. Hari daba ale timbuni kilikulu laga bialu purogo layaruni pelo hariga aiwa bo wia kabe.

²⁶Dindi wali agali nahaga ngagoha iba dalu ibilayaruni aiwabe.

²⁷Abale dindi ogoniha dindi hangu wialu mbirale anda nahaga winigo ai dalu ibalu dindi mo karulape howa dataniru anda harago aiwa mo bia hagabe.

²⁸Mbiraga dalubi pibiyabi ibira hagayago libu aba kabe nahe.

²⁹Dalu dindiguni ibira hagarubi kewaro bagarubi ti ai̱ya bedabe nabere.

³⁰Dagare bulene horo tagira ibirangi iba bedaru giambe ege to̱le̱ ale halu dindigunime iba solowara bedaru bu dambi hai haga ngagoni.

³¹Ai nde Yobo í̱na yakundi karuni bibahende mo mogo buwa mbiraore hanguni helai holeberebe be yakundi maru mandagi dariba homaga hene ngaru hadape halu purogo ladaba loleberebe.

³²Í̱na yakundi maruhondo hariga mo walia halu mali mbiragonaga hariga ogodagua ibabe loleberebe.

³³Yakundi li harini karuni tinaga mana talialu haga ngaru í̱ manda bidebe. Dindini ngarubi nde mana mbira yakundiru ti biaga ale dege bidaba loleberebe.

³⁴Í̱na hari beraliba kagohondo iba dalu í̱ni damulenaga ibila lowa hongo howa larego hale halu beralibame iba ani ibilolebirabe.

³⁵Ani bialu hari dabahondo í̱ mbiraha pu laregola ibugua ladai bialu lalu, Í̱na bia laredagua biai hole kogoni, lolebirabe.

³⁶Ega gabiago ale ma luhe bedaruhondo iba li timbuni ibulebira lalubi ega gogologo bedaruhondo ega bi larago bi la lalubi manda aiwa talebu miniyabe.

³⁷Harini beraliba karuni iba hambu to̱lo wiaga todobene be ale ngago. Uruni ai aleme daga labehebe. Iba uruni dindini odope hole agali aiwa polebirabe.

³⁸Ani biragola dindini be abalu titaulo ngaruni mo gede halu dindini para helonaga aiwa lamibehebe.

³⁹Anduane Homogohanda laabo halu lalu, Yobo-o í̱na ema bialu piaga bedaru budi gabua ale laiono ti ege gundu bira do haga ngaruha bedaria bo nelo haru eberegola laiono tigua karulapeore bo nalu berelo mirilibe.

⁴¹Ega hombo hagau bedaru tomo nolene nawidagola dindi kaundiaruha tomo taya bima pedaha tinaga iginirume i̱hondo tomo ngi lowa olalu bedagola ti tomo nelo aiwa miagabe, Anduane Homogohanda Yobohondo bi ani lene.