Read Huli Yobo 40 Bible Online

Yobo 40 - Huli bible

Yobo 40

¹Ani lowa Anduane Homogohanda Yobo hale halu lalu,

²Ai Yobo-o í̱na i̱ Ngode Datagaliwabe Hongo Haiheore kogohondo lai lalu kegobi i̱na mana tiga nabi birida larigobi bibahendenaga bi áyu í̱hondo hale haroru ladai biai habelo henge ngerogo ladai buleberebe be bape halu waharebe, lene.

³Ani layagola Yobohanda Anduane Homogohondo ladai bialu lalu,

⁴Anduane Homogo-o i̱ nahabane galone naheore kogoni howa bi la ko haruda. Ani buwa í̱hondo agua ladai buabe. I̱na bi mbira larolono labe naheore kogoni.

⁵I̱na bi dewaore larugonigo ai bi lone naloleore, lene.

⁶Anduane Homogo ibuni iba dalu hari puyabu timbuni biyagoha howa lalu,

⁷Ai í̱ agaliore heneyagua i̱na í̱hondo bi hale haga berogo ladai bule heyu habe.

⁸Ai í̱na hongo howa lalu, I̱ agali ko nabiaga tigabiore kogoni, larigodago irane agome í̱na i̱hondo kagua biridago manani dababa laribe.

⁹Í̱ hongo timbunihe i̱ni kogobi dege kebe be í̱na bi laregola í̱naga bi hari daba bialu kulu kala laradagua biagabe.

¹⁰Í̱na bibehe karulape keyagua nde i̱naga henge í̱ mialu yári bayaleru mini lene holeneru hongo timbuni holenerubi yu howa wali agali bu karu handame howa í̱ daliga birabelo.

¹¹Ani biruwa handalu keria agali mine haga karume tininaga mini yaraga howa mine hayagua nde í̱na tandaga timbuniore howa tihondo mana bialu hengedope habe.

¹²Ai aniore bialu agali mana ko biaga karu bope habe. Ani bialu ko biaga uruni tini henegoria kaore dege helowa bo hengedope habe.

¹³Ani hengedope howa wali agali maru karume lone hondoligo nahendelo dindi dugudambi halu hora habe.

¹⁴Í̱na uruni biai harego hondowa í̱ninaga hongome i̱ bolangua halu wali agali ko biaga karu bope howa pani midegola ai i̱na í̱naga mini yaraga holebero, lene.

¹⁵Anduane Homogohanda laabo halu lalu, Yobo-o ai í̱na nogo gabua tara timbuni mbira mini hibobodamusi kago hondole pu. I̱nime uruni ti wabialu í̱bi nde wabia dege birugo kegoni. Hibobodamusi uruni tinaga tomo nogo bulumaga karume datani naralidagua tibi datani naga ka.

¹⁶Ani howa tinaga tingini hongo timbuniore howa tinaga erembirahabi tombehabi hongo timbuniorehe ka.

¹⁷Tinaga erene hongoheore ira tamia ale halu tinaga gi ge hongo gibiheore ka.

¹⁸Tinaga kuniru giambeore ege to̱le̱ mini boronosime wabini anda gene ale howa tinaga gi geru hongohe giambe nama kuluba timbuni ale ka.

¹⁹Ai Ngode Datagaliwabe i̱nime ema bialu piagaru wabialu howa nogo mini hibobodamusi uruni ti daliga timbuniore bolanguahe helo wabinigo ka. Wabini anduane i̱ni hangu uruni bibahende bolangua haihe kogoni.

²⁰Nogo hibobodamusi uruni tinaga tomo nelo datani hari barebare ngaruha nogo tara tara maru karu ti ibagabu howa nalu haga ngaruha ibubi nalu holebira.

²¹Ani howa ti paliaga ira anihe tilitili karu teneha palialu tolate iba pugua ngaruha ha do haga biaga ka.

²²Ani howa nde iba angeni ira karu teneha pialu paliaga ka.

²³Ti ani karia iba li timbuniore hongohe ibalu tinaga ma namu lai hayaguabi tiha gi holene mbira nawi howa embedaho haga ka.

²⁴Ti ani kagola agali abi aleme tinaga de mo ge howa minabehebe. Agali abime ti gonoha hadabehe kabe, lene.