Read Huli Yobo 41 Bible Online

Yobo 41 - Huli bible

Yobo 41

¹Anduane Homogohanda Yobohondo laabo howa lalu, Ai Yobo-o í̱na wena baga hugime Lebiadana minabehebe be ogoninaga hége minu palu dariba habehebe.

²Ibunaga ngui harigaha diri bolo wuwa pu ogoniha hende halu haru poleberebe. Ani ndoyagua nde pume ibunaga ne hanganeha hende holeberebe.

³Í̱ urunidagua bibehe kebe. Í̱na ogonidagua bialu ibu minu yania hariyagua nde í̱hondo bi darabini lalu, Ai nde i̱ poliya í̱na dara halu i̱ yupeha, lolebirabe.

⁴Ibugua í̱nila bi lo pongobo wialu í̱naga biabe bulene ngago ibugua bia holiya lolebirabe.

⁵Ega hinini bedagola mo gini bia hagadagua ogoni ibu mo ginibia holeberebe. Be í̱ wane emenerume mo gini bia helo í̱na ibunaga mani hende howa haru poleberebe.

⁶Agali wena minaga muni dewawi karume ogoni ibu yolo ogodagua mibeheda lowa bi wai bialu ai tigua bo podaga buwa muni tagulebirabe.

⁷Ainde í̱na ibu boga dege bialu timu agirabe tobahe ibunaga tingini embonerunaga hai heloleberebe.

⁸Ibunaga tinginini gi wialu ela ha handa. Ani beregola ibugua hongo timbuni howa wai birago handaregola ibu bedagoha halu mende ela nahole labelo mbira bulebirago hondolebere.

⁹Abagua mini Lebiadana ogoni minule lo manda bideyagua nde mini ogoni áyu yu waholene nga. Irane í̱na ibu bame handaba haregola í̱naga gi ge ala duru lalu mogolowa hongo nahe pandina ibira holebere.

¹⁰Abagua ogoni ibu padaria agali mbirame mo heya howa balu wayali habe nahe ka. Abagua ogoni balu wayali holene mbirali naheyagua nde agali abi aleme i̱ bolangua holobadabe.

¹¹Áyu dindini ngaruni bibahende i̱ninaga ngagoni. Mbiralime i̱hondo mbirale mbira ibunihondo mani ngiadai bulenaga yuha lalu ngini mbirali ai kabe.

¹²Ai abagua ogoni ibunaga tingini hongobi ogobiore beda lalu garea laro.

¹³Agali abi aleme abagua ogoninaga tingini o ligilaga ledago lagalo wahabehebe. Ibunaga ne gibiore ho bedagoria í̱ agali abi aleme hapara holeberebe.

¹⁴Ibunaga ne gibiore dewa kago hondowa agali gi taraore haga. Anigo aiwa ibunaga ne mo halabehebe.

¹⁵Ibu tinginini o ligilaga ledarume ibunaga tingini humbi ale halu mo hongo kagola ibuni turu taraore haga beda.

¹⁶O ligilaga ledagome tingini bibahende dambi hai halu ndibulo wa kagola ibu kabaneha puyabu emene mbira anda pobe nahe beda.

¹⁷Ani bialu hongo howa ndibulo wa kagola mbiraleme dongone ligilaga ledago lagalowa taulo wahabe nahe.

¹⁸Ibu kiame baragola wá timbuni ibunaga ngui harigaha howa tagira ibalu yabulo togo laga. Ani buwa ibunaga debi handalu keria egerebagi ni tagira ibiraligobi haga.

¹⁹Ibunaga ne harigahabi howa ira hungu kiau latagi howa dido lalu purogo laga.

²⁰Ani bialu ira hagua pobo timbuni biraligobi ibunaga ngui harigaha howa tagira ibaga.

²¹Ibugua ne hariga ha̱ laragola ira hungu bialu kikiau latagi haga.

²²Ibunaga ma hongo taraore kago hondowa agalime gi taraore haga.

²³Ibunaga tingini o ligilaga ledaru baya hanguore tinginiha paraho wa kagome ibu mogoore nale biraga beda.

²⁴Ibunaga bu mini giambe dege lalu ege to̱le̱ ale biruwa ibu mbirale mbira gi holene manda nabi beda.

²⁵Abagua ogoni ibu heyaragola agali hongohe pari wayaliore heneyaguabi gi taraore howa duru lalu ibida pobe nahe haga.

²⁶Danda timu yandare yidaru bibahendeme bai hayaguabi ayu tibu nene gadeleme dibayaguabi ibu mutudu nawulebira.

²⁷Ibugua uruni bibahende nagalonedane yohondo biraga beda. Aeane yandareme bayaguabi ogoni dangi yuni gabuni ale haga. Boronosi yandare hongohe giambeoreme bayaguabi ogoni bame yohondowa ira magane goba ale haga.

²⁸Danda timu yandarerume bayaguabi ibu gi howa mogo lalu ibida napiagaore. Ege to̱le̱ dugualu bayaguabi uruni bame ibunaga tinginini ira yu gilope haradagua biaga beda.

²⁹Wai biaga kango yiaguabi ogoni bame perabo gabuni ale handale halu timu yandareru ngilingele layagua uruni nagaloneda lowa mo yohondo wiaga.

³⁰Abagua ogoni ibunaga tombehayagi o ligilagalo kago todobene be dindime wabinigo pambu lene yapara hene mbaule nene gadele ka. Ibu dindi waru ngagoria poragola tombeha o kagome dindi godama iba ganarua biradagua bima piaga.

³¹Solowaraha do̱ lalu poragola iba bedago ta̱la a̱i̱ na̱i̱ bialu todobeneha iba kidikodo lalu ta̱la tagitagi baradagua biaga.

³²Ibani ibu do̱ lalu penegoria iba pele agali waherunaga dagua pelaragobi biaga.

³³Abagua ogoni ibuore mbirale mbirago hondowa gi holene nawiore biruwa ema bialu piaga maru bedaru aria mbira ibu ale nabereore.

³⁴Ema bialu piaga bedaru aria maru mini lene timbuni bereaguabi ibugua uruni mo awadale halu handa angua howa beda. Ema bialu piaga maru bedarume tininaga mini yaraga hayaguabi uruni bame degedago lowa ibuni bibahendenaga kini beda, lalu Anduane Homogohanda lene.