Read Huli Yobo 5 Bible Online

Yobo 5 - Huli bible

Yobo 5

¹Elibasa ibugua laabo halu lalu, Yobo-o ai biamogo bia lalu bi la naberego. Í̱na bi laregola hale halu biamogo bulene mbirali ibulebirabe. Ai dahuliyali mbirame ibalu í̱ biamogo bulebirabe.

²Agali mbira ibu miniwioreme bulene ngago nabi howa ibuninaga miniha tandaga timbuni howa mini ko wu haabo hayagua mana ogonibi biragome ibuni balu homelaga nga.

³I̱na agali maru tininaga dindi hobane winidagoha haabo haga hearia hendenego ai aniha howa tigua mana tiga nabi dewa bialu hearia hondowa Ngode Datagaliwabehondo agali ogonibi bialu heago abale bo waha larugoni.

⁴Ani biragola tinaga waneiginiru ha ko holebira. Agali korume manani dabole haru poragola waneigini uruni tinaga bi la holene mbirali naholebira.

⁵Wali agali hina gariho karubi iba noa howa dendepe lebolaho karubi ti agali ko uruni mabuha tomo damene bibahende ngaru nalu pu anihe karunaga lini dedaru heba ti do naiore holebira. Ani nai howa agali ko uruninaga muni do henedaru mia dege bule lowa taya bialu holebira.

⁶Genda bame tomo nolene ale dindini anda nahaga ina manda bidamagoni ndobe.

⁷Genda damene ngaru yu anda ibulene tene wali agali inane kamagoni. Be irani deledagola tula lalu duni ibaneru bilibulu purogo laralidagua bilo ko ngaru inaneme bero lalu bialu haramaligoni, lene.

⁸Elibasa ibugua la dege bialu howa lalu, Anigo i̱na genda í̱ yu kegonidagua yu howayagua nde Ngode Datagaliwabehondo pele ngi lalu i̱na genda yu kogoni mo waha lalu bi lolebero.

⁹Ibugua agalime nabiagane ale dewaore biai haga kago iname daga labe nahe kamagoni. Inanaga ngamaru bolangua howa ngagola iname baya hangu manda biai habe naheore kama.

¹⁰Ibugua iba dalu dindini ibilaragome mabuha iba pialu mo gomba helaga.

¹¹Ibugua agali mini nawi karu mini lene ho aribia helalu maru genda yu howa dugu bialu karu mo wahalu ti mo turu howa bayale hadai bilaga.

¹²Agalime bogabi tingi howa wali agali maru mo hondo halu mo luluya haga karu tigua lone nabilo Ngode Datagaliwabehanda uruni biagadarunaga mini mo talola haga biaga ka.

¹³Agali marume wali agali maru karu mo ko hole mini dewa wu karia Ngode Datagaliwabehanda tigua bule manda bu wiyaruni tiniha daibilaga. Manane agalime gabua tara tara ge gono wiyagoha ibuni dai bialu dagadagua tiniha dai biragola bule manda bu wiyaru wahaga.

¹⁴Tinaga mini mo luluya kagola mbirale mbira bibe nahe haga. Ega bi lalu ni deaguabi uruni tigua hariga handabe nahe arumahaore haradagua biaga.

¹⁵Anigo Ngode Datagaliwabehanda agali maru mbirale burupale karu biamogo biragola agali timbuni hongohe ha heaguabi agali burupale darabi uruni mo ko habe nahe haga.

¹⁶Ani biragola agali yagibano mini nalene uruni Ngode Datagaliwabehanda ti biamogo bilo maliaho haga. Ani bidagola agali ko biaga karume ti mo ko holene henge nawi haga.

¹⁷Ai nde Ngode Datagaliwabe Hongo Haiheore Kagome agali mbira mana ko bialu kago mo tiga biyagua agali ogoni ibu turu howa miniha dungulo holene nga. Ai áyu í̱ mo tiga bule bialu karia í̱nime ibu erembira mialu holeni.

¹⁸Ngode Datagaliwabe ibugua í̱ mana bialu genda mo ngiyagua mani í̱ mo bayale holebirago ina manda bidamagoni.

¹⁹Ibugua í̱ biamogo dewa bialu kagola mani í̱ mo ko holene mbira nawulebira.

²⁰Hina gari timbuni piyaguabi ibugua í̱ tomo karulape nalu habelo ngulebira. Wai birangibi ibugua í̱ baya hangu handayaho kagola waitigirume í̱ nabolebira.

²¹Agali marume í̱naga mini mo ko hole bi layagua Ngode Datagaliwabehanda í̱ biamogo biragola tigua bi laragome í̱naga mini mo ko naholebira. Mo ko holene mbira í̱ha anda ibiyagua Ngode Datagaliwabe ibunime í̱ handayaho kagola í̱ gi nahe holebere.

²²Hina gari timbuni mbira porangibi genda tara maru tagira ibirangibi Ngode Datagaliwabehanda í̱ turu howa dungulo habelo biamogo bialu haru holebira. Ibugua ani haru kagola í̱ nogo gabuarume bo noligonaga gi naheore holebere.

²³Í̱ mabuha e hongole dindi alialu keria í̱naga nama to̱le̱me nigi nabulebira. Nogo gabua karume í̱ bo nanolebira.

²⁴Ani biragola í̱naga mbirale wiriruni baya hangu wiai kagola í̱ turu howa í̱ninaga balai andaha dungulo birulebere. Í̱naga nogo sibiru mbira ereba nahe bibahende hai karia hondolebere.

²⁵Í̱naga waneigini aguaneru dewaore dindini datani bu karunidagua holebira.

²⁶Í̱nibi nde howaore halu maniore homolebere. Agalime tinaga mabuha widi hongowa boga bialu nolene tu haragola dagadagua í̱ howaore halu homolene tu haragola homolebere.

²⁷Ai Yobo-o ina minime manda bialu kamaria ogoni heneneoredane hendedama. I̱na bi áyu larogoni í̱ biamogo bilo larogo baya hangu hale mia howa hale halu miniha tale bibe, lalu Elibasahanda ani lene.