Read Huli Yobo 8 Bible Online

Yobo 8 - Huli bible

Yobo 8

¹Yobohanda bi lai heagola Sua dindiha howa agali mbira mini Bilidada heago ibugua lalu,

²Í̱na bi lalu keruni mini nawi howa larego puyabu pu laradagua laabo halu kegoni ndobe. Mana ogoni angi waholeberebe.

³Ngode Datagaliwabe Hongo Haiheore kago ibugua ibunaga mana bayale tigabi bialu haga ngago lone mo iriari bialu ina mo hondo nahaga ka. Horo bibahendengi ibugua mana bayale tigabi dege biaabo haga kagoni.

⁴Í̱naga waneigini bu hearume Ngode Datagaliwabe deni howa mana ko mbira biyago hondowa ibugua ko biyagonaga pani nelo miyada.

⁵Ani binigo ai í̱na Ngode Datagaliwabe Hongo Haiheore kagohondo i̱ biamogo bia lalu holene nga.

⁶Í̱ agali tigabiore howa Ngode Datagaliwabe deni í̱ha ko mbira nawi keyagua nde ibugua í̱ biamogo bule ibulebira. Ala í̱ni andagani bayale hariligobi habelo biamogo bulebira.

⁷Í̱naga mbirale bayale dewa yu harigo ereba hayaru emene nira dege lowa ibugua uruni bolangua howa dewaore yu habelo ngulebira.

⁸Í̱na agali ala halu homeneru ti mini gigabi wu henerunaga tene baya hangu goaru handalu mamali henerunaga manda bu heneru mo tale bu handabe.

⁹Ina wali agali dindi ogoriani tigi mandi hangu howa inanaga manda emene ko dege ngama. Egerebagi ni daragola munini dindini hagadagua halu abaleore ereba hagadagua inabi ereba haga kama.

¹⁰Agali ala heneyaru ti mini gigabi timbuniwi heneya. Ani heneyago manda bialu í̱na mini manda bayale uruni ina mamalime manda bu heneyago mitangibu dai bibe.

¹¹Tigua bi maru ogodagua laga. Iba nabere ngagoria tola damberu anda nahaga. Uruni iba bedagoha dege bayale anda hai haga.

¹²Anigo ai iba bedago hundiyagua nde tola dambe uruni agalime gandu lalu mbirale galone mbira bibe nahe holebira. Ti wene emene dege kangi gabu halu ereba hayago. Datani maru karu ti tola dambe uruni gabu haradagua nahaga ka.

¹³Mbirali Ngode Datagaliwabe erembira mialu piaga kago ibu tola damberu iba nabereni hagagobi ka. Agali uruni ale kago ibu Ngode Datagaliwabe embedaho wahayago ai mbiralihondo dunubia holene nahedago homolene harigani pialu haga ka.

¹⁴Tinime inane hangu howa bayale holeberema lo manda bu haga ka. Anigo tigua yu tiga ogonidagua bu kago habo laga. Ti lulu mini nawiore mbira ona howa gamuni anda kago gibu yalu irigi haradagua bialu kago ai gamuni andadago abaleore tongo laragola agali ogoni mo ko howa pilope holebira.

¹⁶Agali urunibi ti mabuha datani hongohe kaligobi hayagoni. Ti bayale anda halu tinaga pini mabuha dindi bayale wiagoha purogo laga.

¹⁷Uruninaga pini ege to̱le̱ ngaruha anda pialu mabubu hinigi bidagola duguabe nahe hongohe haga.

¹⁸Anigo mbiralime datani ogoni ale dugu waharagola mani ho aribia hararume datani hongohe mbira ogoriani heneda lo manda nabulebira.

¹⁹Anigo mbirali Ngode Datagaliwabe erembira miaga karu ti turu hagabu holene henge emene tigimandi hangu ngelo ka. Tini homarangi mendealime dindi ibu henedagoria ho aribia holebira.

²⁰Mbiralime Ngode Datagaliwabehondo mini bilina haabo ho kayagua ibugua o biago embeda ho wahalu napolebira. Mbirali ibu mana ko ngaru bialu haga kayagua nde Ngode Datagaliwabehanda ogoni ibu erembira mialu biamogo nabulebira.

²¹Yobo-o hale ha. Ngode Datagaliwabehanda í̱naga mana bayaledane hondowa í̱naga bu miniha mo palia haragola í̱na turu howa oba halu ga̱lalu holebereda.

²²Ani bulebiragoyu ibugua agali maru í̱ handabe manga haga karu bo hengedape haragola ti taga tene handalu holobada. Ko biaga karu tinaga mbirale wu karu heba homalu ereba hai holobada, lalu Bilidadahanda lene.