Read Huli Iba Gana 10 Bible Online

Iba Gana 10 - Huli bible

Iba Gana 10

¹Anduane Homogo-o irane aginaga ina helalu í̱ kaundia kebe. Ko ina kamaria íbu ngagola í̱ ha do ho kego irane agibe.

²Wali agali mini kowi karume mine halu wali agali yagibano karu mo ko hole talima ibaga bialu ka. Tigua uli tombo wuwa maru uli pelo ngaria habo lalu tini uli ogoniha uli pelo hame ledo.

³Wali agali ko biagarume tinaga miniha mana ko hame lararunaga mine haga ka. Mbiralime mbirale bu ngaru dimagoli hai haga karume Anduane Homogohondo bi ko lalu erembira miaga ka.

⁴Wali agali ko karume Anduane Homogo mitangi nabiaga ka. Tigua mine howa lalu, Ngode Datagaliwabe ibugua i̱ ko birugonaga pani nangulebira, laga ka.

⁵Mini kowi karume biraru damene bibahende mbirale dewa mo mogo biaga ka. Anduane Homogo-o í̱naga mini wu kego ti manda nabiore kagoni. Tigua tinaga waitigi karu mege biaga ka.

⁶Tigua hangu hangu mitangi bialu, I̱ hongoheore kogoni. Mbirale tara tara ngarume i̱ bope naholebiraore. I̱ kogoha genda mbira anda naibulebira, lo mitangi biaga ka.

⁷Bibahendengi tigua bi ko laabo halu maru karu ha haga ka. Ke̱ howa mendeali kago mo gi hole bi laabo haga ka. Mana ko bulenenaga bi ko ngaru tigua abale yamialu lo pebe bialu haga ka.

⁸Wali agali ko ogonidagua biaga karume wali agali maru bayale kago bo wahole ohowa harigani bira do haga. Mbirali hongo nahe kago mo ko hole ohowa harigani bira do haga ka.

⁹Laionome ibu nagane ale ibirago balu nole ohowa yu biragadagua ti biraga ka. Wali agali yagibano porago minule harigani ohowa yu biraga ka. Ibalu karia gono wiyagoha do ngaria abale hado yalu piaga ka.

¹⁰Tigua hendore oho biruwa tinaga hongo timbuni daligaorehe kagome mbirali hongo nahe kago abale mo ko haga ka.

¹¹Wali agali ko urunibi karu tigua lo manda bialu, Mana i̱na berogo Ngode Datagaliwabe ibu mitangi nabiaga kagoni. Ibu de muguliho kagonigo i̱na berogo de nahondolebira ndobe, laga biaga kagoni.

¹²Anduane Homogo-o í̱na ko biaga karu bole í̱naga gi yaraga howa nende biaho habe. Ngode Datagaliwabe-o í̱na hongo nahe karu biamogo bule embeda nahabe.

¹³Wali agali ko biaga karume Ngode Datagaliwabe í̱ mege bialu erembira ngiaga kagoni. Tinaga miniha lo manda bialu, I̱na ko berogonaga pani nangulebira, laga biaga kagoni ndobe. Mini urunibi wiaga karuni í̱na bo wahai habe nahedane kebe.

¹⁴Í̱na wali agali ko biaga urunime mana biaga ngago manda biaiho ke. Ko urunibi kagome wali agali maru bu karu genda mo miaga ngago damene í̱ manda biaiho kegoni. Í̱na wali agali genda uruni yu karu biamogo biaga kegoni. Wali agali hongo nahe karubi waneigini aba ai̱yala homene karubi í̱na ti biamogo biaga kego manda buwa ti í̱niha hanaho kagoni.

¹⁵Wali agali mana ko biaga urunime ko birago mani nabilo tinaga hongo kago bo podai habe.

¹⁶Anduane Homogo ibu kini haluheore kagoni. Wali agali hameigini tara tara bibahende ibu mitangi nabiaga karu ibunaga dindi ngagoria howa bo taliatagi halu ereba hai helolebira.

¹⁷Anduane Homogo-o í̱na wali agali í̱ni andaneha karume bi larago hale howa tinaga bu mini mo hongo harili.

¹⁸Waneigini aba ai̱yala homene karumebi wali agali genda yu karumebi dugu bialu í̱hondo bi lalu karu hale harili. Tinaga godi tigabi lolene ngadagua lelo í̱na ti biamogo bulebere. Í̱na ogonidagua beregola dindiali karume ti lone mo ko holene mbira nawulebira.