Read Huli Iba Gana 102 Bible Online

Iba Gana 102 - Huli bible

Iba Gana 102

¹Anduane Homogo-o i̱na í̱hondo bi larogo hale habe. Í̱na i̱ biamogo bibelonaga í̱ olalu kogo hale habe.

²I̱ genda timbuni yu kongi í̱na i̱ yu wahalu napobe. I̱na í̱ olarogola bi larogo hale halu abale biamogo bibe.

³I̱naga holene emene tigi mbira hangu ira hagua bialu abaleore pu ereba hagagobi kogoni ndobe. I̱naga tingini poboyogo bialu ira timbuni dedagola poboyogo biraligobi bialu helo kogoni ndobe.

⁴Datani gaule agalime hengedalu piagadagua Ngode Datagaliwabehanda i̱ hengedo wahenego kogoni. I̱naga tiniha tomo nolene garibi nale ko.

⁵I̱ tandaga timbuni howa e̱ lalu ngogoni. I̱naga tingini timbuni nahe yólalu kuni hangu haragonida.

⁶I̱ mo ko henego koore dindi ko wali agali nahaga ngagoha ega e̱wa̱tia biragagobi dindi labu ngagoha ega halengau biragagobi bedogonida.

⁷I̱ dagiani palia padogoyu ai i̱ paliahondo nahe yangayanga bu wiaabo kogoni ndobe. Ega warakuli anda dangini hangu biragadagua i̱ni hanguore bedogonida.

⁸Mbiraga horombebi waitigi bu karume i̱hondo bi ko dege lalu haabo ka. Tigua i̱ mini lowa mege bialu ha haga bialu ka.

⁹Í̱na i̱hondo keba timbuni ho kegome i̱ nde beru dugu nalu de iba pugulope halu gabo beha iba biraradagua bedago nalu bedogonida. Í̱na i̱ minalu mbirale ko ngaru mo wahagadagua mo wahenego bedogonida.

¹¹I̱ dindini lu holene nawi tubagiore alendo halu ni dadai biraligobi kogoni. Datani gaule ngaligobi bedogonida.

¹²I̱ ogonibigoyu nde Anduane Homogo-o í̱ kini haluheore kegoni. Wali agali maha ho aribia holebirarume í̱ manda biai holebiragoni ndobe.

¹³Í̱na Saiono tano ngago mitangi bialu dara holeberego manda bido. Í̱na dara howa biamogo bulene horo biagoni abale tagira ibiyada. Horo ogoni áyu ngagoniore ndobe.

¹⁴Saiono tano bo gialabagabu wahayago í̱naga biabe biahaga karume tano ogoni mitangi timbuni bialu hamelo ka. Áyu tano ogoni mo ko hai hene ngagoyu tigua dara ho haabo ka.

¹⁵Hameigini tara tara dindi bibahendeni palima pedarume Anduane Homogohondo gi hai holebira. Dindi bibahendeni kini karume ibunaga hongo timbuni kago hondowa ti gi hai holebira.

¹⁶Mani howa Anduane Homogohanda Saiono tano lone biadai birangi ibunaga hongo ogobi lalu walia holebira.

¹⁷Ibugua ibunaga wali agali yu wahene karume olaragola hale holebira. Tigua ibuhondo bi lararu hale howa erembira mialu napolebira.

¹⁸Anduane Homogohanda mbirale áyu inahondo biraruni ina waneigini aguanene mani holobadarume hendelo mbugani gilibu widaba. Wali agali mani holebirarume Anduane Homogohanda biniru te hale howa ibunaga mini yaraga halu holebira.

¹⁹Iname bi ogodagua gilibu wimi̱ya. Anduane Homogo ibuni haga daligaoreha howa handape haya. Ibu dahuliya andagani howa dindiha handadaliho haya.

²⁰Wali agali garabaya bini hearume tandaga nalu howa dugu biayuago hale haya. Hale howa ibugua agali godi hale hagame bo waholene nga lene hearu ti homa nabilonaga biamogo bialu golope haya, lalu gili bulene nga.

²¹Ibugua ani biyago hale howa Saiono dindini wali agali bu karume Anduane Homogonaga mini latagi halu Yarusalemeni howa ibunaga mini yaraga halu holebira.

²²Hameigini tara tara dindi bibahendeni palima pedarubi tinaga kini karubi ti bibahendeme Anduane Homogo mitangi bialu lotu lole íbu ngoai harangi ani lalu holebira.

²³I̱ wene igiri daliahe dege hewaria Anduane Homogohanda i̱naga hongo bope ho heledagonida. Ibugua i̱ dindi ogoriani lu naholiya i̱naga holene mo tubagi ho heledagoni ndobe.

²⁴I̱naga Ngode Datagaliwabe-o í̱ haluhe haabobo bu kegoni. I̱ agali wahe ndo wene igiri daliahe dege kogonigo í̱na i̱ áyu ogoni yamia nabibe.

²⁵Bambaore í̱na dindi bibahende wabiniyagoni. Í̱ninaga gimeore hari daliga li kago wabialu mbirale karubi ngarubi bibahende wabiai hariya.

²⁶Aga labolaboru goba halu budahole biagadagua dindi harila mo ko holebiragoyu í̱ni hangu haabobo bu haga kegoni. Agalime aga labolabo goba haragola wahagadagua dindi harila ereba hai haragola lone nahondoleberemaore.

²⁷Í̱naga holene ala henegobi dege haho wiaabo haga kegoni.

²⁸Í̱ ani kegoni howa inanaga waneiginiru ti bayale helo í̱na handaya ho holebere. Tinaga aguanene maniore hama polobadarubi ti í̱ni andaneha bayale haabo holebira.