Read Huli Iba Gana 104 Bible Online

Iba Gana 104 - Huli bible

Iba Gana 104

¹I̱na Anduane Homogonaga mini mo yaraga holebero. Anduane Homogo i̱naga Ngode Datagaliwabe-o í̱ daliga gibiore kegoni. Í̱ kini daliga gibiore howa mini mo yaraga holenebi duniniore holenebi aga karularadagua karulo kegoni.

²Wá holene gibioreme í̱ni aga karu laradagua karulo howa haru kegoni. Agalime balai anda dungume howa anda biagadagua í̱na hari daliga li kagoni wabuwa dungume ho heledegoni.

³Ani buwa í̱ninaga andaga iba bedago yarali howa uyuraore daligani bu kegoni. Í̱ hari beraliba ngarunaga biralu eberegola puyabume í̱ yalu ibirayagoni.

⁴Puyaburume í̱naga bi yalu ina kamaria pu lareya. Hari daba biralirubi í̱naga biabe dege bia ha lareya.

⁵Dindi timbuni ogo í̱nime wabuwa winiyagobiore hongohe ngagoni. Dindi ogo imi ema emene mbira nabi girigurabi mbira nabulebiraore.

⁶Iba solowarame dindi timbuni ogo bibahende bu dambi haiho winiya. Iba ogonime hari hearubi bibahende biru namulaiho winiya.

⁷Ani dambi haiho wiaria í̱naga bi hongoheme iba solowara taliriya. Taliri handala iba ibu gerai ibida puabo hayiya. Iba solowara ibu í̱naga bi hongohe biago hale halu bia laridagua bialu ibida piyiya.

⁸Ibida pialu hari hearu yu wahalu porabu pebe bialu dindi ulini wiaruha í̱nime tini berelo wabu winiyarunaga pu birayiya.

⁹Iba uruni biru bolangua nahelonaga í̱nime tu winiyagoriani iba áyu ogoriani birairi kagoni. Áyu ibame ala bibahende namulaiho winiyadagua lone namulai naholebira.

¹⁰Dindi uliniruha howa iba dugutagi helalu hari labo dombeneruha howa iba duguaga duguaga bilalu unura pugulu pebe biledegoni.

¹¹Ani biledegoria nogo gabua tara tara karume iba uruni naga naga bialu kagoni. Nogo dongi gabua karumebi iba noa howa hége lebolaho henedagobi karulapeore nalu kagoni.

¹²Iba uruni angeni ira bu karuha egarume tininaga anda bigi bigi bialu biruwa iba ganaru turu howa laga laga bialu biru ngagoni.

¹³Hariha howa dalu hari hombene ngarunaga dalipe helaga bialu kegoni. Ani bigi beregome dindini mbirale bayale bayale bu paya bu ngagoni.

¹⁴Nogo bulumagarume nelo tani mo anda helalu ina wali agalime nalu holoma̱yanaga tomo inaneme hengedamaru mo anda haga beregola nalu kamagoni.

¹⁵Ani bialu iname ina mabuni pu mbira lini daga mini gerebi hangalu linime pingidowa waini iba wabu nalu ina miniha turuore halu dungu lo kamagoni. Ira olibe lininaga ibane hambuwa denguinibi haguanibi haiho kamagola inanaga dengui haihe wále bu kamagoni. Widi hangalu dowa mberedi wabuwa dawa no kamagola ina tinginiha hongo ngidagola kamagoni.

¹⁶Lebanono dindini ira tamia bu karuni hariha howa dalu ibaabo haragome damiaabo haga kagoni. Ira tamia uruni Anduane Homogo ibugua bamba hengenego ibuninaga ira bu kagoni.

¹⁷Ira tamia uruniha egarume tininaga anda bigi bigi biaga beda. Ai ega ma luhe mbira bedarume tinaga anda ira guraya ale karuha biaga bedagoni.

¹⁸Meme gabua karu ti hari timbuni wedarunaga neneni ibagabu haga kagoni. Tia amala horia ale bedaru ti egeandaha bira do haga bedagoni.

¹⁹Harini ege wabu helariyagome tagira ibuwa ngoaho haga bialu mali mbiragonaga ege biagoni ogoaleneda lalu ibuni langialu kagoni. Ai ni ibu nde ogoangi anda pialu dadai bialu palue ibuni manda bu kagoni.

²⁰Í̱na aruma helaregola mbiraga nogo ega gabua tara tara ti bibahende tagira ibuwa ibaga bu haga kagoni.

²¹Laiono hungubaluarume tomo taya bialu howa ne noani bi hongo howa ladaga halu larayagoni. Ngode Datagaliwabe í̱na tomo ti nelo mereyago ogoni mbira agini ngabe hondole taya bialu howa bi ani larayagoni.

²²Ti ani bialu howa ni dara handala uliha tini paliradagoha palima dai biaga.

²³Ani pedaha wali agali ti heyalu biabe bu puwa biabe bialu kane dege alendo ni palira handala ti andaga piaga.

²⁴Anduane Homogo-o í̱na mbirale dewaore wabiriyagoni. Í̱ mini gigabiwi gibiore kegome mbirale uruni bibahende í̱nime wabiriyagoni. Dindi timbuni ogoni mbirale tara tara í̱ni wabiriyarunime wu to̱lotagi kagoni.

²⁵Iba solowara timbuniore gibi bedagoni. Iba o bedagoniha wena timbuniore gibirubi wena emenebi dewa daga labenaheore biralu mbirale marualebi ogoniha dege biru ngagoni.

²⁶Iba solowara daligani iba sibi puíbu daibu biaga. Iba unura dindiha wena gibi hiriribi bamba í̱ni wabu berelene o bedagome gini biaga bedagoni.[4]

²⁷Uruni bibahendeme ti tomo noa biaruangi í̱na dege mibelo í̱naga gi handayaho biraga bedagoni.

²⁸Í̱na ti tomo nolene meregola ti naga. Ti tomo merego karulapeore nalu tombeore hara handala piaga.

²⁹Í̱na ti erembira meregola ti giho haga. Í̱naga buhe̱ tiha helarigo yameregola ti homo tongolo daga halu lone dindi tago biaga.

³⁰Í̱na ti buhe̱ lolene meregola ti emabu haga. Í̱na dindini mbirale bibahende gahenge hangu tagira íbu helaga bialu kegoni.

³¹Anduane Homogonaga hongo holenebi ibunaga wá holenebi wiaaboore helo hame ledo. Anduane Homogo ibugua mbirale ibunime wabu helaga biyadaru handaga bialu ibuni turuore helo hame ledogoni.

³²Anduane Homogo ibugua dindi timbuni o ngagoni de handaya haragola dindi ogoni duru laga. Ibunaga gime hari karuni ela haragola hari karuni hagua hungula bulebira.

³³I̱ dindini emabu kongi i̱na Anduane Homogohondo iba ganaru lo mulebero. I̱na i̱naga Ngode Datagaliwabe kagonaga mini mo yaraga halu iba ganaru laho ngoore dege i̱ni homalu lairi holebero.

³⁴Anduane Homogo ibugua i̱ mo turu haga biragola haruligo i̱na iba gana lo meroruore ibu hale halu turuore helo hame ledo.

³⁵Anduane Homogo-o wali agali mana ko biaga bu karuniore dindini nahelo balu bo ereba habelo hame ledo. Wali agali ko ngubiore uruni ereba hai helo hame ledo. I̱na Anduane Homogonaga miniore mo yaraga holebero. Anduane Homogonaga mini mo yaraga hama.