Read Huli Iba Gana 105 Bible Online

Iba Gana 105 - Huli bible

Iba Gana 105

¹Iname Anduane Homogohondo turu howa ka̱i̱ lalu ibu daliga gibiore ka lalu lamiai hami̱ya. Wali agali hameigini dindi tara tarani paluyu pedaru ti bibahendehondo ibugua gibiore uruale biya laga bialu hale hai helo loyogo laga bimi̱ya.

²Iname ibunaga mini mo yaraga halu iba gana lalu hami̱ya. Ibugua mbirale bayale bigi biyarunaga bibahende hale hai helo laraga halu lamiai hami̱ya.

³Anduane Homogo ibu mini tigabiore kago ina ibunaga kamago iname ibuhondo turu hami̱ya. Wali agali Anduane Homogohanda hame ledadagua biaga kamaru ina turuho holene nga.

⁴Anduane Homogohanda ina biamogo bilonaga ibu karia puabo hami̱ya. Iname Anduane Homogo ibu kagoha kaware haparaho haabo hami̱ya.

⁵Abarahama aguanene Anduane Homogonaga biabe bia hagane kamirubi Yagabanaga aguanene Anduane Homogo ibunime dabene kamirubi tígua Anduane Homogohanda manane tara tara agalime nabiagane ale bigi biyarubi wali agali ko biaga hearuhondo pani migi biyarubi mitangiore biaabo halimu.

⁷Anduane Homogo ibu inanaga Ngode Datagaliwabe kagoni. Ibunaga mana lo ngaruni wali agali dindi bibahendeha bu karume bilonaga lo nga.

⁸Ibugua habo nalolene bi lowinigo ngaruni wia ai̱ ai̱ore bulebira. Ibugua bi lo wialu ogoale bulebero laga bialu lo ngaruni mani hama porarume handaga bialu karia wia ai̱ ai̱ore bulebira.

⁹Ibugua Abarahamala habo nalolene bi lo wialu Aisagahondo ogoale bulebero lenegobi heneneore bulebira.

¹⁰Anduane Homogo ibugua Isaraelehondo habo nalolene bi lowinigo ogoni wali agalirume bialu haabo helonaga lowini.

¹¹Anduane Homogo ibugua Isaraelehondo lalu, I̱na tíhondo Kenana dindi karulalimulo ngulebero. Dindi ogoni tíbi tínaga waneigini mani holebirarubi tíninaga dindi ogoniore halimulo ngulebero, lene.

¹²Ala Ngode Datagaliwabenaga wali agali dewa ndo henedaruni ti emene mbira hangu Kenana dindini hene. Ti dindi tene ndo mendeali dindini bame igiri yango pu haradagua bini.

¹³Ti dindi mbirani baya hangu ho dambolo hene ndo. Ti togolo yalu pialu dindi wiaruni bibahendeha ge hai haga hene. Kini mbiragonaga dindiha puwa emene tigimandi dege halu lone hili yalu pialu kini mende heagonaga dindiha pu halu ani bigi bialu hene.

¹⁴Ti ani bu ha heagolabi hameigini maru hongohe hearume ibunaga wali agali uruni hengedope holilono Ngode Datagaliwabe ibugua ti mamage hene. Mamage howa ibugua kini hearu talialu ibunaga wali agali urunihondo kagua mbira bulumini lalu lamini.

¹⁵Ibugua lalu, I̱naga biabe bia haga i̱nime dabene karu mo ko holemini. I̱naga mana latagi haga karuore mbira ela nahalimu, lene.

¹⁶Anduane Homogohanda ti dindini tomo wiago damene bibahende mo yu ereba hai halu hina gariore gibi tagira pelene.

¹⁷Ani ibilole howa dege ti maha ibilonaga ibugua Yosebe ala bamba halu Iyibi dindi pu helene. Ibu hamene biarume Yosebe ti muni tagu wialu agali maru hearu tinaga garabaya biabe ale bia haga helo minu mini.

¹⁸Tigua ibunaga ge kirabali pu senime minu huba biagola ge tandaga timbuni hene. Ani bialu aeane gendabi mbira ibunaga mani hende hene.

¹⁹O biyadaruni Anduane Homogo ibugua ala Yosebehondo emagaha howa bulebira lamiyadagua henene tagira pene.

²⁰Ani biyagola Iyibi dindinaga kini heagome Yosebe gololenaga agali mbira heagome lama pu lene. Iyibi dindinaga kini wali agali dewaore haru haga heagome Yosebe golope hene.

²¹Golope howa kini biagome ibunaga gabumane agali haguane helo Yosebe dabo helene. Dabi helowa Yosebe ibu Iyibi dindi bibahende hearunaga haguane helo helene.

²²Kininaga gabumane haru haga hearubi kinihondo mitangi talebu miaga hearubi uruni bibahende de hondowa haru holene hongo ibugua Yosebehondo mini.

²³Mani Yagaba ibu Iyibi dindi pialu ogoriani ho ibira howa hene.

²⁴Ibu ani hearia Anduane Homogohanda Yagaba hameigini biamogo bialu ti waneigini dewa tagira íbu helene. Yagaba hameigini uruni ti hongoheore helalu tinaga waitigi hearunaga hongo dindiha helo helene.

²⁵Anduane Homogo ibugua Iyibi wali agalime ibunaga wali agali handabe manga helo helene. Ani helayagola Iyibi wali agali tigua Anduane Homogonaga biabe biahaga hearu mo hondo hole henge taya bialu helo helene.

²⁶Mani Anduane Homogohanda ibunaga biabe biahaga ala dabene Mosesebi Aronobi heba libu haru Iyibi dindi pelene.

²⁷Puwa libugua Iyibi dindini howa Ngode Datagaliwabenaga biabe hongoheore bialu manane tara tara agalime nabiagane ale dewa bialu hene.

²⁸Ngode Datagaliwabehanda aruma holeneme Iyibinaga dindi bu dambi hayagola wali agali hearu ti arumaha hene. Iyibi wali agali arumaha hayagoyu tigua Ngode Datagaliwabehanda bidaba layadagua nabi ibunaga bi mo wahene.

²⁹Ibugua tinaga iba berearuni mo darama biai halu wena ibaha berearuni bibahende bo homelai hene.

³⁰Yago dewaore gibi tidi yalu ibilalu tinaga dindini yago dege birame helalu kininaga andaga hearuhabi heba yago degeme to̱lotagi helene.

³¹Ngode Datagaliwabehanda bungunabi hinabibi alebi tidi yalu pudaba layagola ti tidi yalu puwa Iyibi dindi damenego pedegone mbira wuwa nahe bibahendeoreha to̱lotagi hene.

³²Ibugua tinaga dindini dalu ibuni ibi nale dalu dindi kunibi hari dababi gibiore ibilene.

³³Ogoni ibiyagome Iyibi wali agalinaga mabuni pu mbira lini daga mini gerebi hongo wiarubi podai halu poge ira hearubi podai halu ti dindini ira hearu damenego bibahendeore podai hene.

³⁴Ibugua bi hangu layagola pagaya ale dewaore gibi daga labe nahe tidi yalu tagira ibini.

³⁵Tagira ibuwa tigua dindini tomo bibahende hengearu damenegonaga yuni tugu naiore halu mbirale andaho hearu damene tene heba na anda hene.

³⁶Ngode Datagaliwabe ibugua Iyibi wali agalinaga igini wahene damenego bibahende homelo bo wahai hene.

³⁷Mani ibugua Isaraele wali agali Iyibi dindi yu wahalu haru tagira pene. Tinaga giha muni ngoloru silibaru yalu tagira pene. Isaraele wali agali ti bibahendeore bayale hongohe hangu tagira pene.

³⁸Iyibi wali agalime Isaraele wali agali hondowa giho henego Isaraele wali agali tagira pialu piyagola ti turuore halu dungulo daibu hene.

³⁹Ngode Datagaliwabehanda hari daligani ibunaga wali agali hearu tigatiga hari beraliba mbira ngelowa ibunaga wali agali uruni andaneha helene. Mbiraga harini ira hangu delayagola ogonime wá hadali hayagola Isaraele wali agali ti wáni bayale hene.

⁴⁰Tigua Ngode Datagaliwabehondo tomo noa kama layagola ibugua ti nelo hariha howa ega de̱wa̱re ale ibilayagola ti ega uruni balu nene. Ti tomo nelonaga ibugua dahuliya andaga howa mberedi dalilayagola ti karulapeore nowa tombeho hene.

⁴¹Ti iba nelonaga to̱le̱ timbuni mbiraha howa iba tagira pelene. Dindi ko dalu naibagaha iba timbuni biagoni tayandaha dugutagi haradagua bialu o biagoriani gerai yupe helene.

⁴²Anduane Homogo ibugua ala bamba howa habo nalolene bi hongohe mbira ibunaga biabe biahaga Abarahamahondo lowinigo ogoningi mitangi bini.

⁴³Anduane Homogo ibugua anidagua bialu ibunaga wali agali dabeneru haru halu tagira pene. Haru tagira piyagola ti turu hama iba gana ladaga halu mambolo bama pene.

⁴⁴Anduane Homogo ibugua wali agali hameigini tara maru hearunaga dindi wiaru muwa ibunaga wali agali uruni mo mini. Wali agali tara uruninaga mabu wiarubi muwa ibunaga wali agali uruni ti karulelene.

⁴⁵Ibugua ogonidagua binidagoni irane Anduane Homogohanda bi lenedarubi ibunaga mana lowinidarubi bibahende Isaraele wali agalime talialu biai helonaga ani bini. Anduane Homogonaga mini mo yaragaore hama.