Read Huli Iba Gana 106 Bible Online

Iba Gana 106 - Huli bible

Iba Gana 106

¹Anduane Homogonaga mini yaraga hama. Ibugua mana bayale biaabo haga kagonagabi ibunaga gubalini holene ha ho wiaabo haga kagonagabi iname Anduane Homogohondo ka̱i̱ lama.

²Ibugua mbirale timbuni bigi binirunaga garealalu aiwa lai habehedabe. Mana bayale biniru mitangi bialu ibunaga mini yaraga karulapeore hai habehe aiwadabe.

³Wali agali ibunaga bi hale halu bia laradagua biaga karubi mana tigabi ngaru biaga karubi ti turu ho holene nga.

⁴Anduane Homogo-o í̱naga wali agali biamogo berengi i̱bi nde mitangi bibe. Í̱na ti pele mialu haru dai berengi i̱bi nde haru dai bibelo hameledo.

⁵Í̱naga wali agali ti bayale howa mbirale bayale damene ngaru mo wuwa tigua turu haga bialu kadagua i̱bi nde ti heba turu hamaga ho holeneore hamelo ko. Ina turu holene ogoni irane ina í̱ninaga wali agaliore henene kamagome mini mbiraore halu mandagi howa turu haga bu holeberama.

⁶Bamba ina mamalirume mana ko bialu heneyadagua inamebi nde mana ko tara tara dewa wiaru bialu harimagoni.

⁷Inanaga mamalirume Iyibi dindini heangi í̱na biabe nahendene ale biriruni ti manda nabi haya. Í̱na í̱naga gubalini holene walia halu ti biamogo biriruni tigua embeda hai halu iba solowara Daramabi bereagoria heangi tigua Anduane Homogo Hongo Haiheore haabo kego í̱ni erembira ngiya.

⁸Tigua ani biyagoyu Anduane Homogohanda ibunaga hongo timbuni winigo mo walia halu ibugua ti biamogo bule lalu bi lowinidagua pele mialu gi mini.

⁹Ibugua iba solowara Daramabi bereagohondo bi lamiyagola iba biagome bira migimigi bialu dindi pani hene. Pani hayagola ibugua wali agali haru halu ti iba biraga biagoria bame dindi hanguni poradagua bini.

¹⁰Agali ti handabe manga haga hearume ti mo ko holebiyaria ibugua ti pele mini. Ti waitigi hearunaga giha hearia ibugua pele mialu haru dai bini.

¹¹Iba solowara timbuni biagome waitigi biaru bo tangu dambi hai halu ibame nai helene. Mbiraoreli hangubi mbira pora bialu napene.

¹²Anduane Homogohanda anidagua biyagola ibunaga wali agali biarume ibugua buleore lalu lowigi biniru heneneore biragonida manda bini. Manda bialu ibuhondo mini mbiraore wiai halu tigua ibunaga mini yaraga halu iba ganaru lalu hene.

¹³Ibugua ani biyago bilowa dege tigua uruni biyaru abaleore embeda hai hene. Tigua mbirale bule manda biyaria Anduane Homogohondo haleha nabi tini miniha tagira ibiyaru ale dege bialu hene.

¹⁴Dindi ko iba dalu naibaga wiagoria howa tinaga miniha tomo noa dege halu tigua Ngode Datagaliwabe ba hendene.

¹⁵Tigua ibuhondo bi haya halu ngi laabo hayagola ibugua ngi layago mialu tiha warago timbunibi tagira ibilene.

¹⁶Ti dindi ko iba dalu naibaga wiagoria howa tigua Mosesebi Anduane Homogonaga biabe biahaga helo loma bia hene Aronobi libuhondo henge lalu hene.

¹⁷Ti ani bialu hemigola dindi mo gaibuki hayagola gundu uli timbuni mbira o biagoria wu pehene. Ani biyagola Dadanabi Abiramabi libu one waneigini damene bu hearubi bibahendeore gundu uli o biagoha uli piai hene. Uli piai hayagola dindi ibunime lone mo gegebu dambi hene.

¹⁸Wali agali maru ko biaga biaru talima pialu hearuni ira hedo ibira halu ti dai helene.

¹⁹Tigua Hari Horebe wiagoria howa nogo bulumaga ale mbira ngolome wabu ngelowa dama ogonida lowa bi pupu wialu hene.

²⁰Tigua Ngode Datagaliwabe ibu duniniore mini lene kago mitangi bialu lotu laga henego wahalu nogo bulumaga datani nalu haga heago ale wabu ngelowa ogoni mitangi bia aribia halu ibuhondo bi pupu wialu hene.

²¹Ngode Datagaliwabehanda ti Iyibi dindini hearia ibugua nahendene ale tara tara bialu Isaraele wali agali Iyibialirunaga giha hearia mo wini. Ibugua ani biyagoyu Isaraele wali agalirume ibu mo embeda ho hene.

²²Ngode Datagaliwabehanda Iyibi dindini agalime nabiagane ale timbuni dunini wiaru bialu iba solowara Daramabi bereagoria ibugua nahendene ale tara tara biyagola wali agali tigua mogolo hendene.

²³Ngode Datagaliwabehanda ibunaga wali agaliru bo wahole layagola ibunaga biabe biahaga helo dabo helene Mosese ibugua Ngode Datagaliwabenaga deni heyu howa Isaraele wali agali biamogo bialu Ngode Datagaliwabehanda bo wanahelo ibunaga keba holene wiago ha pai hayagola Ngode Datagaliwabehanda ibunaga wali agali ba nabi wahene.

²⁴Ngode Datagaliwabehanda bulebero lalu lowiyago tigua yu tiga nabi howa dindi bayale ibugua ti ngulebero layago mo waho hene.

²⁵Tigua tinaga balai andaha ho palu howa bi gomogomo lalu Anduane Homogohanda tihondo bi layago talialu bia nabi wahene.

²⁶Ti ani heagola Ngode Datagaliwabehanda tihondo bi hongohe lalu, Tí dindi ko ege to̱le̱ hangu wiaga ngagoha i̱na tí home lelolebero.

²⁷Tínaga waneigini aguanene mani holobadaru ti dindi taratara ngaruha talia togo lelarogola ti hameigini tara tara Anduane Homogo manda nabi bu karu heba howa dindi tara ogoniha halu homolebira, lene.

²⁸Mani tigua Peo dindini howa dama mitangi bialu gime wabu wini mini Balahondo bi pupu wialu hene. Tigua mbirale ema nabulene bi nalaga ogonihondo lomabu mini tomo wiaru nalu hene.

²⁹Tigua mana ogonidagua bialu hayagome Anduane Homogo mo keba hayagola ibugua warago koore mbira tiha anda ibilaya.

³⁰Warago ogoni ibilayagola Piniasahanda heyuwa mana ko bialu hearu bibahende minu baga biyagola warago timbuni biago ereba haya.

³¹Piniasahanda mbirale o binidaruni bayale biya lalu wali agalime mitangi biaho kadagua maniore wali agali holebirarumebi anidagua dege mitangi biaabo holebira.

³²Isaraele wali agalime iba Meriba peagoria howa Anduane Homogo mo keba halu heneya. Tigua ani biyagome pani tini nolene winigo genda ogoni Mosesehanda tinaga yu aribia heneya.

³³Tigua Mosese mo tandaga timbuni hayagola ibugua bayuwa mitangi nabi howa bi bayale ndo mbira lene.

³⁴Anduane Homogohanda tihondo wali agali tara karu homelo bo wahai halimu lalu lamiyago tigua nabe wahene.

³⁵Isaraeleali tigua wali tara berearu dabu bigi buwa tinaga mana ko wiago taluwa bialu haga heneya.

³⁶Tigua dama mitangi bialu gime wabu wiaruhondo bi pupu wialu hayagome Ngode Datagaliwabehanda tini mo ko helo helene.

³⁷Tigua dama mitangi bialu gime wabini Kenana dindini wiaruhondo tinaga waneiginiru bu hearu bo lomabu miaga heneya.

³⁸Ti waneigini urunime ko bini mbira nawioregoyu tigua bameore homelo beneyago waneigininaga daramame Ngode Datagaliwabenaga deni dindi ogoni mebiahe winiya.

³⁹Tigua mana ko ogonidagua biyagome tini Ngode Datagaliwabenaga deni dodohe halu ibu erembira mialu ibuni talima nape wahene.

⁴⁰Anduane Homogohanda ibunaga wali agali urunihondo keba timbuni howa ibugua ti handabe mangaore heneya.

⁴¹Anduane Homogohanda Isaraele wali agali yupe howa ti hameigini tara tara hearunaga giha helene. Ani biyagola ti waitigi biarunaga andaneha hene.

⁴²Waitigi urunime ti genda dewaore mo ya heagola ti waitiginaga andaneha haabo hene.

⁴³Anduane Homogohanda ibunaga wali agali biamogo biaabo hayagoyu ti doga howa ibugua bi layago mo wahalu mana ko dewaore bialu hene.

⁴⁴Tigua ani biaabo hayago helowa Anduane Homogo olalu ibuhondo bi layagola ibugua hale howa tiha genda wiago de handalu ti dara haga biniya.

⁴⁵Ibugua tihondo dara timbuni halu habo nalolene bi ala lowiyago mitangi biniya. Ibugua tihondo gubalini haabo hayagome lone mitangi bialu ti dara heneya.

⁴⁶Anduane Homogohanda ti waitigi bu hearunaga miniha mo wála hayagola tigua Isaraeleali hondowa daraho dai bini.

⁴⁷Anduane Homogo inanaga Ngode Datagaliwabe kego í̱na ina waitigi karunaga giha howa yamialu inanaga dindini lone holoma̱ya haru dai bu helabe. Í̱na anidagua beregola iname í̱hondo turu halu ka̱i̱ lalu í̱naga mini baya buruguleore yaraga halu haabo holeberema.

⁴⁸Anduane Homogo Isaraele wali agalinaga Ngode Datagaliwabe kago ibu mini yaraga hami̱ya. Áyubi maniore howabi ibunaga mini yaraga haaboore hami̱ya. Ina wali agali bibahendeme lalu, Heneneore Anduane Homogonaga mini yaragaore hama, lalu aniore laabo hami̱ya.