Read Huli Iba Gana 107 Bible Online

Iba Gana 107 - Huli bible

Iba Gana 107

¹Anduane Homogo ibugua inahondo baya gibi dege bigi biaga ka. Ibugua ina gubalini haho wiaaboore haga kagoni. Ibugua ani biaga kagonaga iname ibuhondo ka̱i̱ lolene nga.

²Ala tínaga waitigi hearunaga gime tí minu yaniho hearia Anduane Homogohanda gingila mialu haru dai bini kamiru tígua i̱na larodagua dege lalu ina haru Anduane Homogonaga mini mo yaraga hami̱ya.

³Tí dindi haluni taraha hemiria ibugua haru dai biyagoni. Dindi tara tara ni tagira ibiragohayagibi ni paliragohayagibi uyurahayagibi unurahayagibi dindi uruni bibahendeni hemiria ibugua tí haru dai biai hayagoni.

⁴Wali agali maru dindi ko wali agali nahaga wiagoha pupe halu pene. Piyago puwa hariga nawiaha pu lulu yuwa wali agali pale andahe mbira nawiaha iraga howa pu taluaho hene.

⁵Pu taluaho howa hina gari gibiore bialu iba noa howa hége lebolaho daga hayagola ai tongoore lole ogonida lo manda bini.

⁶Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.

⁷Ani bialu ibugua ti hariga tigabini pelo haru pialu tano mbira ti holene winiyagoria haru pu helene.

⁸Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.

⁹Wali agali iba noa howa hége yobu karu iba nelo ibugua miragola ti iba karulapeore nowa dungulo helo miaga ka. Wali agali tomo noaho karu nelo tomo dewaore miragola ti haruore nowa tombe to̱lo haga kagoni.

¹⁰Wali agali maru arumaore dumbiliniha howa pu senime gi ge minu hubabu wiagola garabayaore howa gendaho hene.

¹¹Ti ogonibiha henedagoni irane tinime Ngode Datagaliwabe Hongo Haiheore kagome ogoale bibe nabibe lalu laga biyagola tigua ibunaga bi erembira mialu piyagome tini ogonibiha pu hene.

¹²Pu howa ti erekui biabe biadege bialu hongo bibahende pirilipe hai hayagola hene. Hongo bibahende ereba hai halu dindini pilo ibira haga biyagola ti gi mulene mbirali nahene.

¹³Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.

¹⁴Anduane Homogohanda ti arumaha mini burugule ogoniha hearia pu seni biaru hadape halu ti garabaya hayago lone hodai nabilo golope halu pelene.

¹⁵Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.

¹⁶Ibugua aeane hongohe mini boronosime panga payadaruni duanialu aeaneme garabaya anda hobanda karuni podo gingirulo bagabu ibira ibira bile laga ka.

¹⁷Wali agali maru ti kedange howa tinime mana ko tara tara dewa bigi biyagome warago balu tandaga nalu hene.

¹⁸Ti tomo noa nahe magu gibi halu tomoore de handaya haga biyagola tongolo mialu dai bigi bini.

¹⁹Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.

²⁰Anduane Homogo ibunaga bime ogoale bia layagola tinaga tingini biaruni lone mo dabiho dai bialu homalihaore anda pole biyaria ibugua ti gililo mu yudai bigi biyagoni.

²¹Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.

²²Tigua Anduane Homogohondo ka̱i̱ lalu mbirale ibuhondo bo lomabu mulene nga. Tigua iba gana turu halu lalu wali agali maru karu hale helo Anduane Homogohanda mana bayaore bigi biyarunaga mo yaraga halu lamiaga bulene nga.

²³Agali maru ti iba sibini palu howa iba solowara angeni gago taguape hama ibaga bialu dindi ngagoha ibaga biai halu tinde muni biabe ogoni biaga hene.

²⁴Agali iba sibini biabe bialu haga uruni tiguabi Anduane Homogohanda bigi biyago handaga bini. Anduane Homogo ibugua iba solowarani mbirale bayaore bigi biyago handaga bini.

²⁵Anduane Homogo ibugua ani bia layagola puyabu hongoheore pu lalu iba solowara yaribu gibiore bini.

²⁶Ani biyagome iba sibiru uyura daligaore mo baraga halu lone unura mo baraliore haga bini. Hiriribi ogonidagua bigi biyago handayagola agali iba sibini biabe biaga biarume aiore áyu homarimadagoni manda buwa gi timbuniore ho hene.

²⁷Tinaga mini bibahende puguai halu homolene anda ibiyagola lulu iba nowa mini ereba howa sibaga lo haradagua ti iba sibi biagoriani ibagabu hene.

²⁸Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.

²⁹Anduane Homogo ibugua puyabu hongohe pu layagoni pulairi helalu iba yaribu gibiore biyagoni mo hundia halu iba solowara ema nabi bayale berelene.

³⁰Iba solowarame ema nabi bayaore birape hayago hondowa agali biaru ti turuore halu hene. Anduane Homogo ibugua ti bayuwa haru pialu iba sibi anda pu wiaga wiagoria ubandaho ngelene.

³¹Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.

³²Uruni tigua Ngode Datagaliwabenaga wali agali mandagi ngoaiho bedagoria Anduane Homogo ibu daligaore gibi kagoni lalu bibahende hale hai helo lope holene nga. Agali haguane dege dege ngoaiho bedarubi hale hai helo ogoriani ibunaga mini laraga holene nga.

³³Anduane Homogo ibugua iba poraruni hundilai helalu iba dindiha howa dugualu karuni bibahende hundi tege lelaga hene.

³⁴Dindi bene bere mbirale anda holene ngaruni mo beregedowa mbirale mbira anda habe nahe koore ibi dindi kuni panaho ngelaga hene. Ogonidagua biaganego irane wali agali dindi ogoriani hearume ko gibiore biyagola ti genda ogoni yilo Anduane Homogo ibugua miaga hene.

³⁵Dindi ko mbirale mbira anda nahaga ngarunaga iba goroyane tagira íbu berelalu dindi yobu dagahe ngarunaga iba dugutagi helaga bini.

³⁶Ibugua dindi bene bere ogoriani wali agali ala tomo nolene nawi buru palu haga hearu dindi ogoriani haru ibalu tigua anda bu hene.

³⁷Ti ogoriani hope ho howa ti mabuni tomo hangalu pu mbira lini daga mini gerebi dewa hongo wini. Hongowa tomo dewaore ti mabuni bu ngaria bialu gerebi lini dewaorebi daga hene.

³⁸Anduane Homogo ibugua ibunaga wali agalihondo baya gibiore bialu ti mo gumbila hayagola tinaga waneigini dewaore hene. Ibugua tinaga nogo tara tara hearubi dewaore ho dame bilene.

³⁹Anduane Homogonaga wali agali biaru tinaga waitigi hearume bo hengedalu mo taga hayagola tandaga nalu dindihaore darabi hearia hondowa

⁴⁰ibugua ibunaga wali agali biaru bope haga agali haguane hearu mo habane nabulene helalu ti dindi ko hariga nawi wiagoha luluyu ibagabu helo helene.

⁴¹Ani biyagoyu wali agali yagibano darabi ha ko howa hearu ibunime ti biamogo bigi bini. Tinaga waneigini dewaore nogo sibi ale tagira íbu helo biamogo bini.

⁴²Wali agali mini tigabiwi karume Anduane Homogohanda baya turubi urunibi bigi biaga kago hondowa ti turuore halu miniha dunguore lo haga ka. Wali agali mini kowi karu tinaga bi mbira lolenego nawioredagola ti bame ne hambu ndibu lowa hama pedagoni.

⁴³Anigo ai wali agali mini gigabiwi karume bi o laruruni damenego bibahendeore baya hangu mitangi biai helo hameledo. Anduane Homogo ibugua ti gubalini gibiore haho wiaabo haga kago ogoninaga laluore maru karu hale hai helo hameledo.