Read Huli Iba Gana 109 Bible Online

Iba Gana 109 - Huli bible

Iba Gana 109

¹Ngode Datagaliwabe-o i̱na í̱naga mini yaraga halu bi larogo haleore howa ladai bibe.

²Agali ko bu karumebi ke̱ hagane bu karumebi i̱ handabe manga howa ke̱ halu i̱ mege bialu kagoni ndobe.

³Tigua i̱ mini lalu ke̱ howa bi koore lalu ka. Tigua irane mbira nayi howa bi ko ogoni lalu ka.

⁴I̱na nde ti gubalini ho howa Anduane Homogohondo tinaga bi lahalu kogoni. I̱na ani berogo bilowa tigua nde i̱ handabe manga haga ka.

⁵I̱na tihondo mana bayaleru bialu kogola tigua i̱hondo mana ko biadai biaga ka. I̱na tihondo gubalini ho kogola tigua i̱hondo gubalini nahe handabe manga haga ka.

⁶I̱ waitigi kagonaga bi larago mo tale bilonaga agali ko mbira dabo helabe. Ibuninaga waitigi kagome ibuni godini haru pu helelo helabe.

⁷Agali godi hale haga kagome agali godini pu kagola ko bini mbira ngane handalu garabaya helelo hameledo. Agali ogonime Ngode Datagaliwabehondo bi laradagobi ko dege bini lalu walia holebira.

⁸Ibu dindini lu nahe abale homelo hameledo. Biabe ibugua bialu haga ngaru agali mendealime bia aribia halu helo hameledo.

⁹Agali ogoninaga waneigini ti aba nahe helo ibu onebi wali dalo berelo hame ledogoni.

¹⁰Ibunaga waneiginiore tinaga anda mbira nahe yagibanoore howa ibaga hangu bialu ngi ngi laabo haga helo hamelo kogoni. Ti anda koha palu karia agali marume ibalu ti bo taliatagi helo hamelo kogoni.

¹¹Waitigi agali ogoni ibu baba agali maru dano ho heneme ibunaga dindibi mbirale wiyadarubi ti karulai helo hameledo. Agali dindi taraha howa íbu hene karume ibunaga biabe bialu hayagonaga yolo ti mo nelo hameledo.

¹²Maru karume agali ogoni biamogo nabilo ibu waneigini helalu homeneru mbiralime dara howa biamogobi nabilo hamelo kogoni.

¹³Ibunaga waneigini aguanenerubi homai halu dabane mani holebirarume ibunaga mini embedaho wahelo hamelo kogoni.

¹⁴Anduane Homogohanda agali biagonaga mamali bamba henerume ko biyaru mitangi bu wiaabo halu ibu ai̱yahanda ko biyarubi domo wanahelo hameledo.

¹⁵Anduane Homogo ibugua urunime ko bibahende biyaru mitangi bu wiaabo halu marume ti hameigini heneru embeda ho wahelo hameledo.

¹⁶Agali o biago ibugua mendeali kago dara holene mitangi nabiaga hene. Ibugua yagibano hearubi mbirale nayi burupale hearubi hongo nahe genda yu hearubi ti mo tandaga halu bo wahaga hene.

¹⁷Bamba ibugua agali maru hearu mo ko helonaga ha haga hene. Áyu marume nde ibuni ha helo hameledo. Ibugua Ngode Datagaliwabehondo agali mende kago biamogo bibe lalu bi laholene mangaho haga hene. Ibuni nde maru karume turu howa biamogo nabilo hameledo.

¹⁸Horo bibahendengi ibugua aga karulo haabo hagadagua ibu mendeali kago ha holene mugube hene. Ibugua maruhondo ha haragome ibuni tinginiha iba ale anda pialu ibu kuniha weli ale anda pelo hameledo.

¹⁹Ha holene bi ogonime ibuni tingini aga biadambi haradagua bialu ibuni mandibu wu haradagua bilo hameledo.

²⁰Anduane Homogo-o waitigime i̱hondo bi ko ogonibi laga kago tini ko helo pani ogonidagua nelo mibe.

²¹I̱naga Anduane Homogo Bibahende Haru Hame Ho Haga-o í̱na i̱ biamogo bulebero lalu lo wiridagua biamogo bibelo hamelo kogoni. Í̱naga gubalini holenemebi bayaleore bulenemebi i̱ pele ngialu haru dai bibelo hamelo kogoni.

²²I̱ bu miniha genda tandagabi yu haabo kogome i̱ yagibano howa burupale kogoni.

²³Alendo ni anda poragola ni munini biago abale ereba haralidagua i̱ abale pu wahole kogoni ndobe. I̱ore bame hinabibi ale bedoria puyabume pulo wahabehe kogoni ndobe.

²⁴I̱ tomo nane kogome i̱naga ge duli hongo nahe kogoni. I̱ni obu wahalu i̱naga kuni bibahende pirilape hai ka.

²⁵Wali agali i̱ de handararume i̱ hondo oba halu mege bialu ma tandalaga bialu kagoni ndobe.

²⁶Anduane Homogo i̱naga Ngode Datagaliwabe-o i̱ biamogo bibe. Í̱na i̱hondo gubalini timbuni ho haabo haga kegome i̱ pele ngibe.

²⁷I̱ waitigi bu karume i̱ pele ngiaga í̱ni kegonida manda bilo walia habe.

²⁸Tigua i̱ Ngode Datagaliwabehanda mo ko helo laga bialu ha holebiragoyu í̱na i̱ biamogo biaabo haga kegoni. Agali i̱ mo tandaga haga karu tini mo tandaga habelo hamelo kogoni. Í̱naga biabe biahaga i̱ kogo i̱naga miniha dungulo holiya mo dungula habe.

²⁹I̱ waitigi biaru ti taga pani timbuni nalu helo hameledo. Tigua aga lu biagimbubi karulagadagua ti taga harago wali agali karume hendelo í̱na taga holeneme ti karulagimbu bu helabelo hamelo kogoni.

³⁰I̱na bi hongo howa ladaga halu Anduane Homogohondo turu howa ka̱i̱ timbuni lalu holebero. Wali agali dewali Anduane Homogo mitangi bialu lotu lole ngoai ho kagoria i̱na Anduane Homogonaga mini yaraga holebero.

³¹Ibugua wali agali yagibano karu biamogo biaga ka. Wali agali marume godi deni haru tagira puwa uruni ti bo waholene nga nalelobi ibugua ti handayaho halu tinaga lahaga ka.