Read Huli Iba Gana 111 Bible Online

Iba Gana 111 - Huli bible

Iba Gana 111

¹Anduane Homogonaga mini yaraga hami̱ya. I̱na ibunaga wali agali ngoaiho kagoria pialu ibuhondo gubalini timbuni howa ka̱i̱ lalu holebero.

²Anduane Homogohanda biabe nahendene ale gibiore biaga ka. Wali agalime biabe uruni birago hondowa turuho haga bu karu tigua biabe uruni bayuwa manda bule begelo handaga ka.

³Ibugua biabe biraru damene bibahendeme ibu mini leneorebi ibu haru haga kiniorebi ka lalu walia haga nga. Ibunaga mana tigabi ngagoni wiaabobo bu wulebira.

⁴Anduane Homogo ibunime mbirale biniru damene wali agalime mitangi biaabo helo ibugua tinaga miniha mo wála halu haabo haga ka. Ibugua inahondo dara holene nawi howa ina dara halu bayale biamogo biaabo haga ka.

⁵Ibugua wali agali ibu mo dunini ho karuhondo tomo nelo miaabo haga ka. Ibugua wali agalihondo habo nalolene bi bamba lowinigo embeda nahagaore ka.

⁶Ibugua i̱ hongo ogobi ko lalu walia halu wali agali maru bu hearunaga dindi wiaru ibunaga wali agaliruhondo mo mini.

⁷Ibugua mana biaga ngaru damene bibahende mini bilinahe howa tigabiore biai haga ka. Ibugua mana bulene nga leneru iname mo dunu bia howa talialu bulene nga.

⁸Anduane Homogo ibugua bi mana urunibi lo wiyaru ibu heneneorebi bayale tigabibi howa lowiyago bi uruni wiaabobo bu wulebira.

⁹Ibunaga wali agaliru ibunime golope halu haru dai bialu tihondo habo nalolene bi wiaaboore helo lowini. Anduane Homogo ibu baya burugule mini leneore ka.

¹⁰Mbirali ibu mini bayale gigabiwi hoa hayagua ala Anduane Homogo gibiore ka lalu ibu mo dunini holene nga. Wali agalime ibuni hamelo kago bialu kane hendedagohondo ibugua mini bayale gigabi wuleneru talebu miaga ka. Ibu ogonibi ka manda bialu ibunaga mini yaraga haaboore holene nga.