Read Huli Iba Gana 115 Bible Online

Iba Gana 115 - Huli bible

Iba Gana 115

¹Anduane Homogo-o í̱na ina horo bibahendengi gubalini haho wiaaboore halu mini bilinahe howa ina yu wanahagaore kegoni. Í̱ aniore biaga kegonaga iname inanenaga mini mo yaraga holene nawiore. Iname í̱naga mini hanguore mo yaraga haabo holene nga.

²Wali agali hameigini tara tara paluyu pedarume inahondo hale halu, Tínaga Ngode Datagaliwabe hayuagoni agoha kabe, lalu kagoni irane aginagadabe.

³Inanaga Ngode Datagaliwabe ibu dahuliya andagani kagoni. Ibu hongo haihe howa ibuni mbirale mbira bule manda biyagua ta nabi biai habehe kagoni.

⁴Wali agali tara tara karume muni ngolomebi silibamebi mbirale mbira gime wabuwa tinaga bi pupu wiagane uruni laga ka. Bame wali agali tini degeme wabu helene urunihondo tinaga bi pupu wiagane laga kagoni.

⁵Mbirale gime wabini uruni ti ne hariga wia ngagoyu bi nalabehe. De kagoyu tinaga deme nahandabehe.

⁶Tinaga hale kagoyu hale nahabehe. Ngui hariga ngagoyu nguime nga nahabehe.

⁷Tinaga gi kagoyu ema bialu mbirale mbira ela nahabehe. Ge kagoyu ibaga bialu pobe nahe. Tinaga ne harigaha howa bi mbira latagi habe nahe kagoni.

⁸Wali agali uruni wabiaga karumebi mo dunini haga karu tinibi mbirale tini wabini urunibi dege helo hame ledo.

⁹Isaraele wali agali kamiru tí Anduane Homogohondo mini pagaho halimu. Ibugua tí biamogo bialu de handayaho haga kagoni.

¹⁰Ngode Datagaliwabenaga loma binigo mo miaga Arono aria kamiru tí Anduane Homogohondo mini pagaho halimu. Ibugua ti biamogo bialu de handayaho haga kagoni.

¹¹Wali agali ibu mitangi bialu lotu laga kamiru tí Anduane Homogohondo mini pagaho halimu. Ibugua ti biamogo bialu de handayaho haga kagoni.

¹²Anduane Homogo ibugua ina mbirale burupale kama aleru mitangi bialu biamogo biaga kagoni. Ibugua Isaraele wali agalibi Ngode Datagaliwabenaga loma binigo mo miaga karu ariabi ibunime ti mo gumbila holebira.

¹³Anduane Homogo ibugua wali agali emene timbunibi ibu mitangi bialu ibu andaneha haga karu ibunime ti mo gumbila holebira.

¹⁴Anduane Homogo ibugua tíhondo waneigini dewaore ngialu tinaga waneigini mani hama poraru tihondobi waneigini dewaore milo hamelo kogoni.

¹⁵Anduane Homogo dindibi hari daligabi bibahende wabini kagome tí mo gumbilaore helo hamelo kogoni.

¹⁶Hari daliga bibahende Anduane Homogo ibuni hangunaga ngagonigo ai dindi timbuni o ngagoni ina wali agali holoma̱yanaga ngini.

¹⁷Wali agali homalu dinini humbirini andaga pugu biyagoni tigua humbirini andaga pu howa Anduane Homogonaga mini mo yaraga nahaga.

¹⁸Ai ina wali agali dindini dére emabu kamaru iname Anduane Homogonaga mini mo yaraga halu ibuhondo ka̱i̱ lami̱ya. Áyu kamangibi manibi ka̱i̱ laaboore hami̱ya. Anduane Homogonaga mini mo yaragaore haabo holene nga.