Read Huli Iba Gana 118 Bible Online

Iba Gana 118 - Huli bible

Iba Gana 118

¹Iname Anduane Homogohondo ka̱i̱ore lalu hami̱ya. Ibugua inahondo mana bayale hangu bigi biyagonaga ani lalu hami̱ya. Ibugua ina gubalini ho kago haho wiaaboore hole kagonaga ibuhondo ka̱i̱ore lalu hami̱ya.

²Isaraele wali agali kamirume, Anduane Homogo ibugua horo bibahendengi ina gubalini ho kago haho wiaaboore haga kagoni, lalimulo hameledo.

³Ngode Datagaliwabenaga loma binigo mo miaga kamirume, Anduane Homogo ibugua horo bibahendengi ina gubalini ho kago haho wiaaboore haga kagoni, lalimulo hameledo.

⁴Wali agali Anduane Homogo mitangi halu lotu laga kamirume, Anduane Homogo ibugua horo bibahendengi ina gubalini ho kago haho wiaaboore haga kagoni, lalimulo hameore ledo.

⁵I̱ genda gibiore yu hewangi Anduane Homogo olarugola ibugua hale halu i̱naga genda yu hewagoni mo wahalu i̱ golope hayagoni.

⁶Anduane Homogo ibu i̱ heba hapara ho haabo haga kagonigo i̱ gi naholebero. Wali agalime i̱hondo mbirale mbira agi bulubadabe.

⁷I̱ biamogo biaga Anduane Homogo ibuni kagoni. Ibu ani kagome i̱naga waitigi karu Anduane Homogo ibugua bope haragola i̱ de hondolebero.

⁸Wali agali tini dege dege hanaho holenego goyane lowa Anduane Homogoniore hanaho holenego duniniore nga.

⁹Dindini haru haga karubi agali haguane karubi tini hanaho holenego goyane dege lowa Anduane Homogoni hanaho holenego duniniore nga.

¹⁰I̱naga waitigi dewaoreme i̱ bole homabu bupe hearia Anduane Homogonaga hongome i̱na uruni bibahende bope hai haru.

¹¹Ti bibahendeme i̱ bole ho mabu bupe howa i̱ mo dombe wia hearia Anduane Homogonaga hongome i̱na uruni bibahende bope hai haru.

¹²Mone tidu yalu ibiradagua waitigi bibahende tidu yalu ibuwa i̱ni mbulupe hayagoyu o biaruni irame gaeangi bo daradagua bialu bibahende bo mburi lai haya. Anduane Homogonaga hongome i̱na uruni bibahende bope hai haru.

¹³Tigua i̱ bole anda ibalu mo ko howaore bayagola i̱ bope habehegoyu Anduane Homogo ibugua i̱ biamogo biya.

¹⁴Anduane Homogo ibugua i̱ mo hongo helagaore ka. Ibunime i̱ gi mialu biamogo biyagoni.

¹⁵Ngode Datagaliwabenaga wali agali karume agali balu ibuwa tinaga balai anda tamuha tini wai mambolo baruago hale hadaba. Anduane Homogonaga hongo gibigome ina mo hongo hayagola bibahende bai harimagoniyago, lalu biraruago hale hadaba.

¹⁶Anduane Homogonaga hongo gibi biagome ina biamogo biyagola ina wai bialu wayali harimagoni.

¹⁷I̱ ala awane nahomolebero. Nahome howa dére emabu kongi Anduane Homogohanda bigi biyaru ogodagua biya lalu te laga bulebero.

¹⁸Anduane Homogo ibugua i̱ mini wuliya mana lalu pani hiriribiore ngia nguwa i̱ bo home nalayagoni.

¹⁹I̱ Anduane Homogonaga mini mo yaraga halu ibuhondo ka̱i̱ lo poleberogo ibunaga anda panga karuni dugupe hadaba.

²⁰Anduane Homogonaga anda anda pole panga haraba o kagoni. Wali agali mini tigabiwi karu hangume panga o duguaho ngagoniha anda pobehe ka.

²¹Anduane Homogo-o í̱na i̱na bi larugo hale halu biamogo birigome i̱ wayali ho kogoni. Biamogo birigonaga i̱na í̱naga mini mo yaraga holebero.

²²Ege to̱le̱ mbira anda biagame galone nabibehedago lowa dabo wahenego ege to̱le̱ ogoniore mo timbuni duniniore ho heleda.

²³Ogoni Anduane Homogo ibunioreme mo yu daibu helenego iname de handalu handawa bu kamagoni.

²⁴Áyu ogoni Anduane Homogohanda inanaga waitigi bope hayagonaga iname ibuhondo turu gibiore halu bi te lalu mitangi biaabo hami̱ya.

²⁵Anduane Homogo-o ina gi mialu haru dai bia, larama. Iname mbirale bigi beremago damene bibahendeore bayale halu lini daga bilo buluma̱ya Anduane Homogo-o biamogo bibe, larama.

²⁶Mbirali Anduane Homogonaga minini howa ibirago Ngode Datagaliwabehanda ogoni ibuhondo turu halu bayale bilo larama. Anduane Homogonaga andani howa iname ibunaga mini mo yaraga harama.

²⁷Anduane Homogo ibu hangu Ngode Datagaliwabe heneneore kagoni. Ibugua ina baya hanguore de hondo hayagoni. Ira magane giha podo yagayaga bialu bo lomabu miaga dabu ngagoria pu mabu bidaba.

²⁸Í̱ i̱naga Ngode Datagaliwabe kegonigo i̱na í̱hondo ka̱i̱ore lalu ko. Í̱ i̱naga Ngode Datagaliwabe kegonigo i̱na í̱ timbuniore kego wali agali lamialu í̱naga miniore mo yaraga holebero.

²⁹Iname Anduane Homogohondo ka̱i̱ore lalu hami̱ya. Ibugua inahondo mana bayale hangu bigi biyagonaga ani lalu hami̱ya. Ibugua ina gubalini ho kago haho wiaaboore hole kagonaga ibuhondo ka̱i̱ore lalu hami̱ya.