Read Huli Iba Gana 132 Bible Online

Iba Gana 132 - Huli bible

Iba Gana 132

¹Anduane Homogo-o Debidihanda erekui biabe ndelaheore bialu hayagoni mitangi bialu í̱na ibuore embeda holeni.

²Anduane Homogo-o Debidi ibugua ogo ale buleore lalu Isaraele wali agalinaga Ngode Datagaliwabe Hongo Gibihe kego í̱hondo bi lo wigi biyagoni í̱na mitangi budai bibe.

³Ibugua bi ogodagua lo wigi biyagoni. I̱na i̱ andaga napolebero dagianibi u napaluebero.

⁴Ha̱lo birabi mbirale mbirani malia howa paliabi nabulebero.

⁵Isaraele wali agalinaga Ngode Datagaliwabe Hongo Gibihe kagonaga andaore mbira bu heore lolego buwa Anduane Homogo ibu anda ogoniha kagola i̱ i̱ni andaga u palue polebero, lalu Debidihanda bi uruni leanego mitangi bibe.

⁶Anduane Homogonaga Habo Nalolene bi lo winigonaga Mbogoyi biagoni dindi ogoha nga lalu ina Bedelehemeni hemaria langiyane hale harima. Mbogoyi biagoni Yarimu dindini wiaria handa walia harima.

⁷Handa walia howa iname lalu, Ai Mbogoyi ogo mo yalu Anduane Homogonaga andani ma nalarami, larima. Anduane Homogonaga biragane dagia ngagoria kaware hapara howa ina bulu palialu ibunaga mini mo yaraga halu lotu lami̱ya ma, lalu larima.

⁸Anduane Homogo-o í̱naga Mbogoyi biagoni heba í̱ninaga andani haabo hole íbu habe. Mbogoyi ogonime Anduane Homogo í̱ hongo gibihe kego walia halu manane ogoni ngagoni.

⁹Í̱naga loma binigo mo miaga agali karu tiguabi mana tigabi hangu bilo hameledo. Í̱naga wali agali bu karume turuore gibi howa bi ladagadaga bilo hamelo kogoni.

¹⁰Anduane Homogo-o í̱naga biabe bia haga Debidiore mitangi bibe. Kini í̱nime dabene ogonihondo handa tara halu erembira muleni.

¹¹Anduane Homogo-o ala í̱na bi hongoheore mbira Debidihondo lo wiriyagoni pugua nabuleore kegoni. Ala í̱na Debidihondo ogodagua lariyagoni, Debidi í̱ni halu homedeha mani í̱ igini hararu aria mbirago kini í̱ pani ho aribia helo dabo helolebero, lariyagoni.

¹²Í̱na Debidihondo laabo halu lalu, Í̱naga igini hararume i̱na habo nalolene bi pongo bo wirudagua bialu ogoale bilimu ogo ale nabilimu lalu lamerodagua biyagua nde mani í̱naga aguane hararu ti iginime kini dege halu í̱naga dagia í̱niha tagira pene degeme mia aribia haga bulebira, lalu lo wiriyagoni.

¹³Anduane Homogohanda Saiono tano ibuninagaore helo ibunime dabene. Ibu Saionooreni ho teneho hole hameleda.

¹⁴Ibugua lalu, I̱ tano ogoriani haho wiaaboore holebero. I̱na dindi ogoriani howa i̱ni kini howa haru holenaga dindi ogoni dabedo.

¹⁵I̱na Saiono tanoni wali agali bu karu buru pada ale dewaore bu hombedo mulebero. Ogoniha wali agali yagibano tomo noanoalo bu karu tibi tomo karulapeore nelo mulebero.

¹⁶Saiononi loma binigo mo miaga karume i̱naga wali agali gi mialu haru dai bulene biabe bayale bilo biamogo bulebero. Saiononi wali agali bu karu ti turu halu iba gana lalu bi ladagadaga bu holebira.

¹⁷I̱na dindi ogoriani howa Debidi ibuha howa tagira pene mbira kago kini gibiorene gibi helo dabo helolebero. Kini ogoni lamu hale daabo hagadagua ibugua wali agali handame holene ereba nahe wiaaboboore holebira.

¹⁸Kini ogoninaga waitigi karu i̱na ti mo taga halu taga pani timbuniore nelolebero. Ai wali agali kini ogoni ibugua handayaho hene karu i̱na ho timbu hama baya hama puabo helolebero, lalu Anduane Homogohanda ani lene.