Read Huli Iba Gana 135 Bible Online

Iba Gana 135 - Huli bible

Iba Gana 135

¹Anduane Homogonaga mini yaraga hami̱ya. Anduane Homogonaga biabe biahaga kamiru tígua ibunaga mini yaraga hadaba.

²Tí Anduane Homogo inanaga Ngode Datagaliwabenaga anda pabe timbuni kago tamuha haga kamiru tígua ibunaga mini yaraga hadaba.

³Ibu bayaleore kagonaga iname ibunaga mini yaraga hami̱ya. Ibugua inahondo dara howa bayale biaabo haga kagonaga iname ibunaga mini yaraga halu iba ganaru lami̱ya.

⁴Anduane Homogohanda Yagaba ibunaga helo dabenedagua ibugua Isaraele wali agali ibuninagaore helo dabo helene ka.

⁵Anduane Homogo ibu mini leneore howa dama mitangi bialu bi pupu wulenaga gime wabini ngaruni ibugua bolangua haiheore kago i̱ manda bidogoni.

⁶Anduane Homogohanda mbirale ibunime bule hame ledadagua hari daligahabi dindinibi biaga ka. Iba solowarahabi iba andanehabi bibahendeoreni ibugua bua biradagua biai haga ka.

⁷Ibugua harini ginu dindi bibahendeha wiame helalu hari daba bilaragola howa iba dalu ibilalu puyabu tara tara ibuni andagaha wia do ho winiru mo heya halu dindi bibahendeha pulame helo pelaga ka.

⁸Iyibi dindini Iyibialinaga igini wahene bibahende bo wahai halu tinaga nogo igini pigane wini hearubi bibahende bo wahai hene.

⁹Iyibi dindiha dege ibugua kinibi ibunaga agali haguane hearubi bibahende pani nelo mialu agalime nabiagane alebi nahendene ale dewaorebi bialu hene.

¹⁰Anduane Homogohanda hameigini tara tara dindi dewaoreni hearu bo wahaga bialu kini hongohe bu hearunibi bo wahai haga bini.

¹¹Ibugua Amoro wali agalinaga Kini Sihono bo wahalu Basana wali agalinaga Kini Oga bo wahalu Kenana dindiha kini dewa bu hearubi bo wahai halu bini.

¹²Ibugua dindi uruni ibunaga wali agaliruhondo mini. Isaraele wali agali hearu tihondo dindi uruni bibahende miai hene.

¹³Anduane Homogo-o wali agali bibahendeme í̱ Ngode Datagaliwabeore kagonida lalu latagi haabo holebira. Wali agali mani holebirarubi ti bibahendeme í̱ ogonibiore ke lalu manda bulebira.

¹⁴Anduane Homogohanda ibunaga wali agali handayaho haabo holebira. Ibugua dara holene nawi howa ibunaga biabe biahaga karu dara haabo holebira.

¹⁵Hameigini dindi tara taraha bu hearume dama mitangi bialu mbirale bi pupu wulenaga ngolo silibarume wabu helaga biaga. Mbirale uruni tininaga gi degeme wabigi bini.

¹⁶Mbirale uruni wabu helayaru tinaga ne hariga ngagoyu bi nalaga nga. Tinaga de heledagoyu mbirale deme nahandaga nga.

¹⁷Tinaga hale wabu heledagoyu bi hale nahagabi tiha bu he̱bi nalagabi nga.

¹⁸Mbirale uruni ale wabu helayarubi uruni yu tiga biaga agali karubi tini nde mbirale urunibi dege helo hamelo kogoni.

¹⁹Isaraele wali agaliru-o Anduane Homogonaga mini yaraga hadaba. Anduane Homogonaga loma binigo mo miaga kamiru tíguabi ibunaga mini yaraga hadaba.

²⁰Libai agali kamiru tíguabi Anduane Homogonaga mini yaraga hadaba. Wali agali Anduane Homogo mitangi bialu lotu laga kamiru tí bibahendeme ibunaga mini yaraga hadaba.

²¹Anduane Homogo ibunaga dalu Saiono Yarusalemeha howa wali agali bu kamiru tígua ibunaga mini yaraga hai hadaba.