Read Huli Iba Gana 137 Bible Online

Iba Gana 137 - Huli bible

Iba Gana 137

¹Babilono dindini iba piyarunaga angeni ina bira bigi bu harima. Ogoriani biruwa nde inanenaga dindi Saionoore mitangi harima. Iname dindi biago mitangiore harimadagua nde daraore howa inane dindinaga duguore bu wia harima.

²Iname inanaga ngida ga̱wa̱ hiliyularu iba angeni ira hiribi ale hearunaga maganeni derela ho ngelowa ina labe manga biyagola nale bame biru wirima.

³Agali ina garabaya biaga biarume inahondo lalu, Tígua iba gana maru ina mo turu holenaga laga bidaba. Tíninaga dindi Saionoore lalu ka̱i̱ laga bialu mbira ina hale holoma̱ya la handadaba, laga biya.

⁴Ti ani laga biyagoyu ina dindi taraha garabaya pu howa ina Anduane Homogonaga iba ganago bame laholo au bulebe. Ani nabuleore ndobe.

⁵Yarusaleme-o i̱na í̱ embeda haruyagua o ngidaru lone aginaga bole ndodago nabolebero.

⁶Yarusaleme-o i̱na í̱ embeda halu i̱naga turu holene tene Yarusaleme mitangi harogome tagira ibaga manda bidogobi heba embeda dege haruyagua o i̱ iba gana lone mani nalolego i̱naga bi mo pu helabe laro.

⁷Anduane Homogo-o Babilonoalime Yarusaleme bo gialo paya bialu bayangi Edomoali ti wai Babilonoha anda puwa tigua bi laga biyagoore bayuwa mitangi bibe. Tigua ogodagua laga biyagoni. Weagua tira dindi hangu ibira helo bibahende bo gialo bagabu wahadaba, lalu laga biyagoni í̱ hale harigoni.

⁸Babilono-o bi o larogo hale habe. Í̱ nde bo mburi lolebirago lelo ani habe. Í̱na inahondo koore birigonaga paipai mbirali ibugua í̱hondo bulebirago handabe. Mbirali inanaga paipai bia haga kago ibu turu holene nga.

⁹Agali inanaga wai puhaga haruago ibugua ibalu Babilono í̱naga waneigini emene hono yu hama pederuni yamuwa ege to̱le̱ni embone tuguduki haga bulebirago ani bilo hono yu habe.