Read Huli Iba Gana 138 Bible Online

Iba Gana 138 - Huli bible

Iba Gana 138

¹Anduane Homogo-o i̱ninaga miniha hongo timbuniore howa í̱hondo ka̱i̱ larogoni. I̱na mbirale dama mitangi bialu gime wabini ngagoria howa í̱naga mini yaraga halu iba gana lalu kogoni.

²Í̱naga anda loma bia hene kago handade halu i̱na ge duli hanga ho biruwa í̱naga mini yaraga halu kogoni. Í̱naga gubalini holene wiaabo kegonagabi í̱ mini bilinahe kegonagabi i̱na ani lalu kogoni. Í̱naga minibi í̱na mana ogo bulene nga lenerubi duniniore nga lalu inahondo mo walia harigonaga i̱na iba gana ogo lalu kogoni.

³I̱na í̱ olarugola í̱na i̱naga bi hale howa í̱ninaga hongo timbuniore kegome i̱ mo hongo haabo harigola kogoni.

⁴Kini dindini bu karu bibahendeme í̱na bi lowiriru hale howa tigua í̱naga mini yaraga holebira.

⁵Tigua í̱na bibahende birirunaga iba ganabi í̱ mini timbuni lene kegonaga iba ganabi lalu holebira.

⁶Anduane Homogo-o í̱ daliga duniniore kegoni howa wali agali mini mo dindiha haga karu mitangi bu haga ke. Wali agali mine haga karu ti nde í̱naga deni ha do habe nahe ka.

⁷I̱ha genda íbu mabu biragola í̱nime i̱ handayaho halu pele ngiaga kegoni. Waitigi bu karume i̱hondo keba haragola í̱na i̱ pele ngialu í̱ninaga hongome i̱ bayuwa mo wiaga kegoni.

⁸Anduane Homogo-o mbirale i̱hondo bulebero lalu lo wiriruni biaiore holebere lo manda bido. Í̱naga gubalini holene wiaabo haga kegoni. Í̱na biabe bule biriruni bibahende bu maro bibelo hameledo.