Read Huli Iba Gana 139 Bible Online

Iba Gana 139 - Huli bible

Iba Gana 139

¹Anduane Homogo-o í̱na i̱ ba handalu ai ogobiore kalo manda biaiore kegoni.

²I̱na mbirale bigi berogo bibahendeore í̱ manda biaiore ke. Í̱ kaundiaore uyura howabi i̱naga miniha mitangi berogo damene bibahendeore manda biai kegoni.

³I̱ biabe bialu koyaguabi o ha̱lo bedoyaguabi í̱na i̱ handaya kegola dege bialu kogoni. I̱na bigi berogo damene bibahendeore manda biai ho kegoni.

⁴Bi mbira naledoore ogo ale lolebira lowa í̱ abale manda bu bolangua kegoni.

⁵Í̱na i̱ homabu bupe halu í̱naga hongome i̱ pabe tigila haradagua bidegola kogoni.

⁶Í̱na i̱ ogobiore kagoni lowa baya hanguore bilibele lo manda biai ho kegoni. Manda bulene daligaore ogonibi i̱na mandabu mibe naheoreda.

⁷Í̱ ke handala i̱ ibida pole pialu ha do hole ani pobehe kobe. Í̱ nahego mbira dindi agohayagi ngabe.

⁸Dahuliya anda iraga halu ibiruyagua í̱ ebere ke. Humbirini andaga dalipe halu ni bu karu baba bia tagoho hole yupe haruyaguabi í̱ niguniha ha dege bulebere.

⁹Yagalo yalu pialu ni tagira ibagahayagi ha do hole piruyaguabi o ndo ni paliagahayagi pu haruyaguabi

¹⁰dindi gibuni gibuni urunihabi í̱ ha dege bulebere. Í̱na i̱ biamogo bulebi haru holebi ha dege bulebere.

¹¹Aruma holeneme i̱ budambi heladaba lalu wá emeneore mbira nahe aruma dumbilinioreha ha do hole lalu manda biruyaguabi í̱ ha dege bulebere.

¹²Í̱na i̱ arumaha ndo koria hondolebere. Mbiraga dumbilini mbauleyaguabi í̱na i̱ horombe hau hanunini koria handaradagua hendede. Handalu keria wá arumala tu nangaria hendede. Mbiragabi horombeni handaradagua dege hendede.

¹³I̱naga tingini gi gebi embone minibi tara tara hama pedaruni í̱na wabu helene kogoni. Í̱na i̱ ai̱ya tombeha i̱ mo gimbu bialu berelariyagoni.

¹⁴Í̱na mbirale bigi berego taraore bigi biagayagonagabi í̱ timbuni gibi baya buruguleore howa i̱ manda biai ho kegonagabi i̱na í̱naga mini mo yaraga haro. Ina wali agalime í̱ hondowa mo yo handabe nahe kamagoni.

¹⁵I̱ ai̱ya tombeha biruwa i̱naga kuni dameneru wene hole mo gimbu gimbu bigi bialu heagola i̱ tombeha bira do howa anda haga bialu hewago í̱ manda bu harigo kegoni.

¹⁶I̱ ai̱yahanda i̱ taba nahene tombeha berewago í̱ handarigoni. Í̱na ani bialu nde i̱ dindini howa mali ogodagua holebira ogoangi homolebira lalu manda buwa í̱naga mbugani gilibu wu kegoni. I̱ ai̱yahanda i̱ taba naheneha abogo ibu lu ogodagua helo lalu mali podo manda bu winigo í̱naga mbugani gilibu wiai kegoni.

¹⁷Anigo Ngode Datagaliwabe-o í̱naga mitangi bulene daligaore tara i̱ aleme manda bibe nahedagolabi daga labe nahedagolabi i̱ mogolo kogoni.

¹⁸Daga laruyagua iba angeni iba mu ngaru emene karulape lowa í̱naga mitangi bulene daga nalabeheore la dege bialu lo umulowa paliahondo howabi dengala howabi í̱ heba dege halu i̱na í̱ manda biai habe naheore kogoni.

¹⁹Ngode Datagaliwabe-o wali agali mini kowi bu karuore homelo bowaore ha nabira lalu kogoni. Wali agali bame irane nawini bo wahama ibaga biaga karu ti baba i̱ mandagi habe mangabago tiore erebaha nabira lalu kogoni.

²⁰Ko biaga uruni tigua í̱ lalu bi ko laga bialu í̱naga mini mo ko hole lalu lo guraga bialu ka.

²¹Anduane Homogo-o í̱ handabe manga haga karu i̱na uruniore handabe manga ho ko. Í̱hondo waitigi ho karu i̱na ti mo yo hondowa de handape ho kogoni.

²²I̱na ti handabe manga timbuniore ho ko. Ti i̱ waitigi ka lo kogoni.

²³Ngode Datagaliwabe-o í̱na i̱naga bu habanehabi minihabi hai bialu ko mbira ngabe hondole mitangihabi tayabume halu manda bibe.

²⁴Í̱na ani taya bialu mana ko mbira i̱ha au ngabe handalu í̱naga haabo holene harigani puabo holiya i̱ haru habe.