Read Huli Iba Gana 140 Bible Online

Iba Gana 140 - Huli bible

Iba Gana 140

¹Anduane Homogo-o wali agali ko biaga karume i̱ mo ko holigo pele ngibe. Agali bo wahaga karume i̱ baba waitigi nahelo biamogo bibe.

²Tigua mana ko bulenaga ndindi laabo halu wali agali bu karu tini keba haga haga bilo mo keba haga ka.

³Tinaga hége ne gadele puyanaga ne ale howa tigua bi lararume nogombi ko tomia pale ngagonaga tomia ale tinaga ne hambuni ngagoni.

⁴Anduane Homogo-o agali ko karunaga hongome i̱ bope nahelo í̱na i̱ handayaho habe. Agali bo wahaga karume i̱ mo ko holenaga bi ndindi lalu kago i̱ ba nabilo hapai habe.

⁵Mine haga bu karume i̱ gonoha doliya gono wu kagoni. Tigua gono ogoni pu payini timbuni mbirame i̱naga geni do ngelonaga i̱ hariga poleberogoha gono wia do ka.

⁶I̱na Anduane Homogohondo lamialu lalu, I̱naga Ngode Datagaliwabeore í̱ni kegoni. Anduane Homogo-o i̱na biamogo bia lalu olalu kogo hale habe.

⁷Anduane Homogo Bibahende Haru Haame Ho Haga-o i̱ haru dai biaga hongoheore í̱ kegoni. I̱na waitigiru baba wai bialu hewangi í̱na i̱ handayaho harigoni.

⁸Anduane Homogo-o agali mini kowi karume bule hameledaru buligo nabilabe. Tigua ko bulenaga bi pongo balu karuni biatagi nahelabe.

⁹Waitigi bu karume i̱ bope halu balagala howa ibaga bu nahelabe. Tigua i̱ bo waholenaga mo gi halu karuni tiniha biadai bilabe.

¹⁰Ira dedaore tinaga haguaneni ibira helolene karulapeda. Ti gundu uli ngagoha uli pu wiaabo helo minu bape habe.

¹¹Agali ko urunime ke̱ howa wali agali maru karu bame godi deni heledago tigua godi lalu bolangua nahelabe. Agali bo wahaga bu karu tiha mo ko holene mbira ibilalu ti bo ereba hai helabelo hamelo kogoni.

¹²Anduane Homogo-o wali agali ko urunibi karume wali agali yagibano karu mo ko holebiragola í̱na yagibano karu biamogo biaga kegoni. Wali agali burupale karu tihondobi bayale bulene ngadagua biriligo i̱ manda bu kogoni.

¹³Wali agali mana tigabi biaga karume í̱naga mini yaraga halu í̱ni kegoha haabo holebira.