Read Huli Iba Gana 143 Bible Online

Iba Gana 143 - Huli bible

Iba Gana 143

¹Anduane Homogo-o i̱na í̱hondo bi larogo hale habe. Í̱ mini tigabiorebi mini bilinahebi kegome i̱na biamogo bia lalu koru hale habe.

²Í̱na godi larengi í̱naga biabe biahaga i̱ kogo godini heloleni nahelabe. Í̱naga deni mbirali ibuha ko nawi mbira naheore ndobe.

³Waitigi bu karume i̱ talima ibaga bialu i̱ bopeore henego ko. Tigua i̱ arumaha minu dariba ho wiradagua bidagola i̱ wali agali bamba homo gialo wahene ngaligobi kogoni ndobe.

⁴I̱ ani bidagome i̱ mini tumutumu bialu mini dege dindi ho kogoni.

⁵Bambaore biniru i̱na lone mitangibu dai bero. Mbirale bayale damene bibahende í̱na biriruni mitangi bialu biabe bayale birirubi mitangibu dai berogoni.

⁶I̱na i̱naga gi yaraga halu í̱hondo bi lalu kogoni. Wali agalime iba noa howa kembobe lebola haradagua i̱naga dininime í̱naga bi mana lo ngeru noa halu hame timbuniore lo kogoni.

⁷Anduane Homogo-o i̱na mini dunubia ho harugo ereba harago ainde i̱na bi larogo áyu ogoni abale hale habe. I̱ abale homalu homene dininiru piagane ngagoha poligo í̱ ha do nahabe.

⁸I̱na í̱hondo mini mbiraore wu kogonigo egerebagi bibahendengi í̱naga gubalini holene ngegoni i̱ mo mitangi biaabo helabe. I̱na í̱hondoore bi lalu haga kogonigo ai hariga i̱na pialu holiyago í̱nime mo walia habe.

⁹Anduane Homogo-o í̱na i̱ handayaho habelo í̱ni keria eberogoni. Waitigi bu karunaga giha koria i̱ mo wialu haru dai bibe.

¹⁰I̱naga Ngode Datagaliwabe í̱niore kego i̱na í̱naga hame ngego hangu taluwa bialu holiya i̱ lawai habe. Í̱na i̱hondo bayale bialu i̱ tigabi holene ngagoria ibagabu holiya haru habelo hamelo kogoni.

¹¹Anduane Homogo-o í̱nime bule lalu abale lo wiridagua i̱ mo wialu bayuwa haru dai bibe. Í̱ bayaleore biaga kegome i̱ha genda bibahende íbu ngagoria kogola í̱nime i̱ pele ngibe.

¹²I̱ í̱ninaga biabe biahaga kogo manda buwa í̱na i̱hondo gubaliniore ho haga kegonigo i̱ waitigi bu karu homelo babe. I̱ bope haga karu bibahendeorebi bo wahai habe.