Read Huli Iba Gana 144 Bible Online

Iba Gana 144 - Huli bible

Iba Gana 144

¹I̱na Anduane Homogonaga mini yaraga harogoni. I̱ biamogo biaga hongo timbunihe ibu kagoni. Ibugua i̱ wai buliya baya hangu biawai halu i̱ mo manda mandabu helaga kagoni.

²Ibugua i̱ handayaho haga howa ibunime i̱ ho hagira bu haga ka. I̱naga humbi alebi pele ngiagabi ibu hanguore kagonigo i̱na ibuha mini mbiraore wu kogome ibugua i̱ mo wialu haru dai biaga kagoni. Ibugua hameigini tara tara dindi bibahendeha karu i̱ andaneha hai helaga kagoni.

³Anduane Homogo-o ina wali agali agi ale kamagola í̱na mitangi ho haga kebe. Ina bame nahabane mbira kamagonidago ainde í̱na irane aginaga ina mo galone harilibe.

⁴Ina wali agali bameore ne harigaha buhe̱ halu mbira hangu tagira pialu ereba hagagobi kamagoni ndobe. Inanaga dindini holene tubagiore bame ni daragola munini emene howa abale ereba haraligobi kamagoni.

⁵Anduane Homogo-o hari li kagoni kambulaki bialu abale dalia. Í̱naga gime dindi hari wedaru ela hariyagua ira hagua timbuni tagira ibulebira.

⁶Hari daba mo bia halu waitigi bu karuni bo purogo lela. Ti gerai lalu ibida purogo lelo í̱naga timume bo pelabe.

⁷Í̱na hari daligaha howa gi dogolape halu i̱ iba andaneha bedogo wahalu tagira ibuliya gini yamia. Agali dindi tarani howa ibini bu karunaga andaneha koria í̱na i̱ abale mo wialu golope habe.

⁸Agali uruni tiha henene lolene mbira nawiore howa tigua gi doladaga halu henene larama lowa ke̱ dege hagane ka.

⁹Ngode Datagaliwabe-o i̱na iba gana gahenge wabialu í̱hondo lolebero. I̱na ngida ale balu í̱hondo iba gana lolebero.

¹⁰Í̱na kinirume wai bialu wayali helo biamogo biaga howa í̱naga biabe biahaga Debidi i̱nibi nde biamogo bialu haru dai biaga kegoni.

¹¹Waitigi i̱ bope haga bu karunaga giha koria haru dai bibe. Agali dindi taraha howa ibini bu karunaga andaneha koria í̱na i̱ abale mo wialu golope habe. Agali uruni tiha henene lolene mbira nawiore howa tigua gi doladaga halu henene larama lowa ke̱ dege hagane ka.

¹²Ina igini igiri daliahe kaore ira hongone karu hongohe anda hagagobi helo hamelo kamagoni. Ina wane bedarubi baya dege halu kini andaga kagoha mo yári bia hene ngagobi berelo hamelo kamagoni.

¹³Inanaga tomo wiaga andaha tomo bayale dewaore wu to̱latagi helo hamelo kama. Inanaga dindini nogo sibi karume igini daosini dewaore honoyu helo hamelo kama.

¹⁴Nogo bulumaga bu karumebi igini dewa honoyu kagola mo ko nahelobi maru homa nabilobi hamelo kamagoni. Inanaga hariga polene ngagoria wali agaliyaguabi waneiginiyaguabi mbiragome ibuha genda tandagaru tagira ibiragola dugu bima pelo hame naledema.

¹⁵Dindi mbiraha wali agali bayale urunibi bu karu ti turu ho ka. Wali agali Ngode Datagaliwabe ibuni tinaga Anduane Homogo ka lalu haga karu tibi turuore ho kagoni.