Read Huli Iba Gana 145 Bible Online

Iba Gana 145 - Huli bible

Iba Gana 145

¹I̱naga Ngode Datagaliwabebi i̱naga kinibi í̱ kegonigo i̱na wali agali bibahendehondo í̱ daliga gibiore ka lalu lamulebero. I̱na í̱hondo ka̱i̱ lalu laaboore holebero.

²Horo bibahendengi i̱na í̱hondo turu halu ka̱i̱ laabo halu holebero. I̱na í̱naga mini mo yadagadaga haabo haluore holebero.

³Anduane Homogo ibu mini lene daliga gibiore kago bibahendeme ibunaga mini mo yaraga holene nga. Ibu daliga gibiore haruagoni iname ogobiore ka lowa manda biai habe nahe kama. Inanaga manda bulenego emene ko tubagi kamagoni.

⁴Í̱naore mbirale bigi biriruni wali agali áyu karume agua bigi biya lalu í̱naga mini mo yaraga halu ka. Wali agali dabane mani hararu tiguabi nde tinaga waneigini lamiragola uruni tiguabi nde í̱naga mini mo yaraga halu dege holebira. Tigua í̱na biabe hongoheore gibi bigi biriruni agua bigi biya lalu bi te lalili bima puabo holebira.

⁵Wali agalime í̱naga hongo baya gibi holenenaga lalubi í̱ kini gibi kego lalubi bite laabo holebira. Í̱na biabe hongohe gibiorebi agalime nabibeheru bigi birigonaga i̱na miniha mitangidangi bialu haabo holebero.

⁶Í̱naga hongo gibioreme biabe bigi birigonaga wali agali tigua bite laga bulebira. I̱nabi nde í̱ daligaore gibi kagoni lalu maru karu lamulebero.

⁷Tigua í̱naga mana baya gibiore biaga kegonaga maru lamialubi í̱naga dara holene ngegonaga garea lalubi iba ganaru lalu holebira.

⁸Anduane Homogo ibugua ina gubalini timbuniore hagabi dara howa biamogo biagabi ka. Ibu keba abale tungulope nahaga howa ibugua ibunaga gubalini haho wiaabo holeneme ina yaniho wiaabo helowa haga kagoni.

⁹Ibugua wali agali bibahendehondo mana bayale ogobi degedege bialu mbirago bume hembome nalagaore kagoni. Mbirale tara tara ibunime wabiniru bibahendeore dara howa ibuni handayaho haga kagoni.

¹⁰Anduane Homogo-o mbirale mbirale ema bialu piaga í̱ni wabini karu bibahendeoreme í̱ninaga mini mo yaraga haiore holebira. Í̱naga wali agali bibahendeoreme í̱nihondo turu halu ka̱i̱ lalu lai holebira.

¹¹Í̱na dindi bibahende de handame howa baya buruguleore haru kegonaga tigua maru hale helo lamialu í̱naga hongo holene gibiore ngegonagabi lalu lamulebira.

¹²Wali agali karu bibahendeme Anduane Homogo í̱na biabe hongohe gibi bigi biriruni manda biai helo ani lamulebira. Í̱ kini baya buruguleore hongohe howa í̱naga mini daliga gibiore ngegoni manda biai helobi ani loyogo lalu holebira.

¹³Í̱naga handame holene wiaaboore howa wali agali bibahende haru haho wiaaboboore haga kini holebere. Anduane Homogo ibugua mbirale mbira bulebero laga bialu lo wigi binigo mbira pugua nabi lo beregedabi nabi ibu mini bilinahe howa bulebero lenedagua biaiore haga kagoni. Ibugua ina dara gibi haga howa mbirale bigi biraru ina biamogo bulenaga dege bigi biaga kagoni.

¹⁴Wali agali genda yu howa mini burugulo karu bibahende biamogo bialu wali agali yangoneme hengedope haragola dindiha haga karubi ibunime ti mo yaragaho helolebira.

¹⁵Mbirale dindini emabu bedaru damene bibahendeme í̱naga gi hangu hondole hanaho beda. Ti tomo noa harangi í̱na ti karulape nelo miaga kegoni.

¹⁶Í̱na ti bibahende tomo karulapeore nelo mialu ti mbirale maru buru pada alebi mulene ngadagua miaga kegoni.

¹⁷Anduane Homogo ibu mini tigabiore howa ibugua mbirale bigi biraru damene tigabi bialu ina daraore howa biamogo bigi biaga kagoni.

¹⁸Wali agalime ti miniha tigabi howa heneneorenaga Anduane Homogo olalu karu ibuni ti kagoria kawareore íbu haga kagoni.

¹⁹Wali agali Anduane Homogohondo giho haga karu ti burupale ngaru ibunime tiga handaga haga. Ti genda yu howa ibuhondo bi laragola ibunime hale halu gi miaga ka.

²⁰Wali agali Anduane Homogo ibuore gubalini haga karu ibunime ti baya hanguore handayaho halu mamage haga ka. Wali agali mana ko biaga karu ibugua ti bibahende bo mburi lai holebira.

²¹I̱na Anduane Homogonaga mini mo yaraga haabo holebero. Ibugua mbirale ema bialu piaga ibuni wabini karu bibahendeoreme ibunaga mini baya buruguleore kago mo yaraga haaboore holene nga.