Read Huli Iba Gana 146 Bible Online

Iba Gana 146 - Huli bible

Iba Gana 146

¹Anduane Homogonaga mini yaraga hama. I̱ni bu miniha howa ibunaga mini yaraga harogoni.

²I̱ dindini kogoni howa ibunaga mini yaraga haabo holebero. I̱na i̱naga Ngode Datagaliwabe mini yaraga halu iba gana laabo halu kone dege i̱ni homalu waholebero.

³Dindini agali haguane karuha mini hanaho nahabe. Agali dindini hene bu karu tigua í̱ pele ngialu haru dai nabibehe kagoni.

⁴Agali uruni ti homarangi lone dindi dege hodai bulebira. Ti homarangi mbirale ogoale bule lalu lo wiyaruni budai nabulebiraore.

⁵Wali agali ti Yagabanaga Ngode Datagaliwabe kagome ti biamogo bilonaga ibuhondo mini mbiraore wu karume ti turu ho haga ka. Uruni tigua Anduane Homogo tinaga Ngode Datagaliwabehondo mini dunubia ho kagome ti turuore ho kagoni.

⁶Ngode Datagaliwabe ogoni ibugua hari daligabi dindibi iba solowarabi wabialu uruniha karubi ngarubi wabiai henego ibugua mbirale ibuni buleore lalu bi lowiniru bibahende biaiore haga ka.

⁷Wali agali maru ti waitigi andaneha bope ho karu Anduane Homogo ibunime ti biamogo biaga ka. Maru tomo nane garibilo karuhondo ibugua ti tomo nelo miaga. Anduane Homogo ibugua maru garabayaha karu ti golope haga biaga.

⁸Ibugua wali agali de kohe karu de hendelo mo ngala halu wali agali gendame bo dambi karu genda mo wahai halu mo hongo haga ka. Anduane Homogohanda ibunaga wali agali bayale tigabi karu gubalini ho haga ka.

⁹Wali agali dindi taraha howa ina dindini íbu hene karubi ibugua handayaho haga ka. Wali dalo bedarubi waneigini ai̱ya abala homene karubi ibugua ti baya hanguore handayaho haga ka. Ibugua ani biagagoyu agali ko biaga karume mana ko bule manda bialu karu mo libilabala halu mo luluya haga ka.

¹⁰Anduane Homogo ibu kini haluhe haabo kagoni. Saiono wali agaliru-o tínaga Ngode Datagaliwabe ibu kiniore haabobo bu ka. Iname Anduane Homogonaga mini yaraga hami̱ya.