Read Huli Iba Gana 147 Bible Online

Iba Gana 147 - Huli bible

Iba Gana 147

¹Anduane Homogonaga mini yaraga hami̱ya. Iname inanaga Ngode Datagaliwabe mini yaraga halu ibuhondo iba ganaru lolene bayaleore ogoni. Iname ibunaga mini yaraga holene bayale tigabiore nga.

²Anduane Homogohanda Yarusaleme lone mo heya ho helowa ibunaga wali agali dindi taraha garabaya pu haga bini hearu haru dai biragoni.

³Wali agali tini bu miniha genda timbuni yu haga bidaru ibugua mo karulape helaga ka. Ibugua tinaga dere bidaru dabi helo kabu bia haga kagoni.

⁴Ibugua yakundi hari daligani bu karuni bibahende daga lai howa ti mbira mbiranaga mini lai haga ka.

⁵Inanaga Anduane Homogo ibu mini leneore howa hongo haiheore ka. Ibunaga mini gigabi ngago iname manda biai habe nahe kama.

⁶Ibugua wali agali tini mo dindiha haga karu mo yaraga hagago nde wali agali ko biaga karu ti dindiha hengedape haga ka.

⁷Anduane Homogonaga mini yaraga halu ibuhondo iba ganaru lolene nga. Inanaga Ngode Datagaliwabehondo ngida ale balu bi bayale mo bila howa bayale bolene nga.

⁸Ibugua hari daligaha beraliba helame haga. Iba dalu dindini ibilaragola hari bare bare ngaruha datani bayale anda helaga biaga ka.

⁹Ibugua ema bialu piaga karubi bedarubi tomo nelo mialu ega igini bedarume tomo noa halu bi laragola hale howa ibugua ti tomo nelo mia dege biaga ka.

¹⁰Anduane Homogohanda nogo hosinaga hongobi ami agalinaga hongobi hondowa turu haga ndo ka.

¹¹Wali agali ibu mitangi bialu mo dunini howa ibunaga gubalini holene wiaabo ka manda bialu ibuhondo mini mbiraore wiaga karu ti hondowa ibugua turuho haga ka.

¹²Yarusaleme wali agaliru-o Anduane Homogonaga mini yaraga hadaba. Saiono wali agaliru-o tínaga Ngode Datagaliwabenaga mini yaraga holene nga.

¹³Ibugua Yarusalemenaga pabe panga kago mo hongo howa wali agali bu karu bayaleore biamogo bialu haga ka.

¹⁴Ibugua tínaga dindi tubari handayaho halu widi bayaleru tí mabuha anda haga biledagola tígua widi lini dewaore nalu tombeho haga kamigoni.

¹⁵Ibugua bi mbira dindihondo laragola bi ogoni hale halu abaleore biai haga.

¹⁶Ibugua dindiguni timbunirume dindini dungume helalu puyabume abalu pulo yalu piagadagua pibiya pulo yu purogo lelaga ka.

¹⁷Iba angeni iba mu wiame kadagua ibugua dalu ibilaragola dindiguni wiame helaga biaga. Ibugua dindini dagare ogonibi ibilaragola mbiralime dagare bidago bilowa dagare nahe tingi halu donge ho habe naheore ka.

¹⁸Mani howa ibugua bi laragola dindiguni ngaru mo iba bu hinilaga. Ibugua puyabu ibilaragome iba bedago mo ema bia halu pelaga ka.

¹⁹Ibugua ibunaga bi lowiniru Yagabahondo lamini. Ibunaga bi mana Isaraele wali agaliruhondo mini.

²⁰Ogonidagua ibugua hameigini tara tara dindi bibahendeha karuhondo nalami. Tigua ibunaga bi mana lo ngago manda nabi ka. Iname Anduane Homogonaga mini yaraga hami̱ya.