Read Huli Iba Gana 149 Bible Online

Iba Gana 149 - Huli bible

Iba Gana 149

¹Anduane Homogonaga mini yaraga hama. Ibuhondo iba gana gahengeru lami̱ya. Wali agali ibuhondo mini bilinahe haga kamiru tígua ibu mitangi bialu lotu lole ngoai ho kamigoria ibunaga mini yaraga hadaba.

²Isaraele wali agaliru-o ibugua tínaga Wabiaga ka mitangi bialu turuho hadaba. Saiono wali agaliru-o tínaga kini ibu kagonaga turu timbuni ho hadaba.

³Tígua mali lialu ibunaga mini yaraga hadaba. Tabageru balubi ngida ale balubi ibunaga mini yaraga hadaba.

⁴Anduane Homogohanda ibunaga wali agaliruhondo gubalini ho kagoni. Ibugua wali agali tini mo dindiha haga karunaga mini yaraga halu wai bialu wayali helo biamogo biaga ka.

⁵Ngode Datagaliwabenaga wali agali tí wayali harimigonaga turuho holene nga. Mbiraga tíninaga dagiani biruwa tígua turu halu iba ganaru laabo holene nga.

⁶Tigua Ngode Datagaliwabenaga mini yaraga halu bi dalimu lalu wai biagane ayu tibu ne gadeleru tíni gime yu howa ga̱ ladagadaga bialu turu ho holene nga.

⁷Tígua ayu tibu yu howa hameigini tara tara dindi bibahendeha karu baba wai bialu wali agali Anduane Homogo manda nabi karu ti ko biyarunaga pani mialu bo wahai holene nga.

⁸Waitiginaga kinibi agali haguane bu karubi pu seni aeaneme wabini ngagome tinaga gi geru minu dabaho helolene nga.

⁹Ngode Datagaliwabehanda hameigini tara tara dindi bibahendeha bu karu pani mulene nga layadagua tígua milimu. Ngode Datagaliwabenaga wali agali kagome wayali ogonibi holebira. Anduane Homogonaga mini yaraga hami̱ya.