Read Huli Iba Gana 15 Bible Online

Iba Gana 15 - Huli bible

Iba Gana 15

¹Anduane Homogo-o mbirali í̱naga andaha anda ibabehe ai kabe. Mbirali Hari Saiono wali agali ge nahaga í̱ni dege haga ngegoria íbu howa í̱ mitangi bialu í̱hondo bi labehe ai kabe.

²Mbirali Ngode Datagaliwabehanda bibe ledadaguaore hale howa biai halu mana tigabi bulene ngadaguaore bialu ibugua bi larago henene hangu lalu ibu bu miniha ke̱ holene mbira nawi kago ibuore anda pobehe ka.

³Tindule mbiralinaga mini mo ko hole ndinde lowa agua laya laya lama ibaga nabiaga kago ibu anda pobehe ka. Mbirali ogonibi kago ibugua ibunaga damenehondo kagua nabiaga ka. Wali agali mendeali lo guralu diburibu lama ibaga nabiaga ka.

⁴Ani bialu wali agali maru Ngode Datagaliwabehanda handabe manga halu erembira mini karu mbirali ogoni ibuguabi handabe manga halu erembira dege mulebira. Anduane Homogo ibugua bibe ledadagua hale halu biaga karu hondowa ibu turu halu wali agali uruninaga mini mo yaraga haga ka. Ibugua mbirale mbira buleore lalu lo winiyagua o lenedagoni gendabi bibe naheoreyaguabi tanabi biaore bulebira.

⁵Mbiralime ibuhondo mbirale mbira dano habiya ngibe layagua mialu danoali biagome yadai biragola nde huniane mbira pu helowa ndo ibugua miyagobiore yadai bia lowa mo yulebira. Marume ibuhondo dange hana howa mendeali kagua nabini tigabi kago ndelo ngibe layagua ibu ani nabiaga ka. Mana bayale urunibi biaga karu ti ema nabi haabo holebira.