Read Huli Iba Gana 16 Bible Online

Iba Gana 16 - Huli bible

Iba Gana 16

¹Ngode Datagaliwabe-o i̱ í̱ha ha doho howa bayale holebero manda buwa í̱ kegoria eberogo í̱na i̱ de hondo habe.

²I̱na Anduane Homogohondo au laro. Í̱ i̱naga Anduane kegoni. Mbirale bayale bayale o bu ngoruni í̱naga gini howa ibini hangu o bu ngoruni laro.

³Anduane Homogonaga wali agali mini bilinahe karu ti wali agali bayaore bu kagoni. I̱ ti heba mandagi howa turu timbuniore ho haga biruli.

⁴Wali agali maru mbirale gime wabiniru tinaga bi pupu wiagane ogoni lowa uruni hendehende gerai piaga karu tigua genda yulene dewaore bu wulebira. I̱na ti heba mandagi howa bi pupu wiagane urunihondo mbirale bo lomabu miradagua namulebero. Mbirale gime wabini uruni tinaga bi pupu wiagane ogoni lowa uruninaga mini mo yaraga haradaguabi i̱ naholebero.

⁵I̱ mbirale galone yu haradagua bu kogo Anduane Homogo í̱bi í̱naga bi manabi ogoni dege galone yido lowa yu kogoni. I̱ mbirale buru pado alego í̱na ngiaiore hariligoni. I̱ mani hama polobodagoni í̱na haru holebere lowa í̱ha hanaho kogoni.

⁶Í̱na i̱hondo mbirale bayale bayaleru turu halu ngigi birigoni. Í̱na o ngigi biriyaruni nde baya taraore ngigi biriyago hondowa i̱ turuore ho kogoni.

⁷Anduane Homogo ibugua i̱ mo tiga bialu haru haganegonaga i̱na ibunaga mini mo yaraga haro. I̱ mbiraga padoria i̱naga bu miniha howa bi langiaga.

⁸Anduane Homogo ibuni kawareore i̱ heba o kagonida lo manda buore haabo haruli. Ibuni kaware i̱ heba howa i̱ mo hongo haga kago manda buwa i̱ gi halu mogo nale holebero.

⁹Anigo i̱ turu howa i̱naga bu miniha dunguore lowa mbirale mbira hondowa gi naholeore kogoni.

¹⁰I̱ homolene winigoria howa homanaga hongome yani nahelonaga í̱na i̱ gi miriligoni. I̱na í̱naga biabe bialu mini bilina ho harugonaga í̱na i̱ humbirini andaga homa dinini bu karu baba holiya wahalu yupe naholebere lo manda bido.

¹¹Í̱nime i̱hondo haabo holene hariga ogodagua lalu walia holebere lo manda bido. Í̱ni i̱ heba kegome i̱ miniha turu bialu dunguore laragola turuho haabo haruli.