Read Huli Iba Gana 17 Bible Online

Iba Gana 17 - Huli bible

Iba Gana 17

¹Anduane Homogo-o í̱na i̱naga bi larogo hale habe. I̱ tigabi ibaga bu henego ai i̱naga genda ngaru í̱ keria mo yalu eberogoni. I̱na í̱hondo bi ke̱ howa ndo larogo hale habe.

²Í̱na i̱ biamogo beregome i̱na godi lalu wayali holebero. Í̱na mana bayale ogo nga de handabelo hame ledogoni.

³I̱naga miniha ngogo í̱ manda biaiho ke. Í̱na mbiraga ibuwa i̱ ba handariyagua mini ko i̱ha mbira ngaria handa nabulebere ndobe. I̱na i̱ninaga ne harigaha howa bi ko nalolebero lo wirugoni.

⁴Agali maru karume bi ko lagadagua i̱ nalaga kogoni. I̱na í̱naga bi lowini ngago hongo howa yu halu keba holenebi wai bulene ngarubi bibahende erembira miai harugoni.

⁵I̱na í̱naga hariga ngagoria pialu kogome i̱naga geme hariga mendeha pubagi nahene kogoni.

⁶Ngode Datagaliwabe-o i̱na í̱hondo bi larogola í̱ hale harili. Ani kego manda bialu i̱na í̱hondo bi áyu larogo haleore habe.

⁷Í̱naga gubalini holene timbuniore ngego ina kamagohondo mo walia habe. Í̱na í̱naga gi tigame ina yania haga kegonigo ina waitigi hondoligo í̱ni andaneha ha do kama.

⁸Í̱ninaga deore baya hangu handayaho harilidagua i̱ handayaho habe. Ega angibunime ibu igini babaganeme dambi hagadagua i̱ mo do howa handayaho habe.

⁹Agali ko karume i̱ mo ko nahelobi i̱naga waitigi ho mabu bupe karume i̱ bo wa nahelobi ani handayaho habe.

¹⁰Tigua agali mende kago dara nahagaore ka. Tigua bi hongo howa laabo halu tininaga mini hangu yaraga halu bi laga kagoni.

¹¹Tigua i̱ ge porogoha talima ibaga bialu i̱ ho mabu bupe haiho kagoni. Tigua i̱ gi dolaho yu ibaga bialu i̱ bope hole manda mandabu ka.

¹²Ti laiono gabua ale howa mbirale ema bialu porago minu bo nole lowa ha do haga ka. Laiono daluame mbira bo nole yu bira do ho hagadagua i̱ bo wahole manda manda bu hai ka.

¹³Anduane Homogo-o í̱ ibalu waitigi bu karu baba wai bialu ti bope hai habe. Í̱naga ayu tibu ne gadele biago yu ibalu waitigi karu bo wahai habe. Agali ko uruninaga giha howa i̱ mo wialu haru dai bibe.

¹⁴Anduane Homogo-o agali ko uruni ti dindini wini ngaru hangu mo tene haga bu karu tinaga giha koria í̱naga hongome i̱ mo wialu biamogo bibe. Wali agali í̱ hame nalaga ho karu ti pani karulape nelo mibe. Tinaga waneigini aguanene maha holebiraruhondobi pani mia dege bibelo hameledo.

¹⁵Ai i̱ni agali tigabiore kogodago mani í̱ninaga denguiore hondolebero. De ngalalu heyu howa í̱ kegobi hondowa i̱ turu timbuniore holebero.