Read Huli Iba Gana 18 Bible Online

Iba Gana 18 - Huli bible

Iba Gana 18

¹Anduane Homogo-o í̱na i̱ mo hongo haga kegoni. I̱na í̱hondo gubaliniore ho kogoni.

²Anduane Homogo ibuni i̱naga wai pabe hongoheore kagoni. Ibu ege to̱le̱ ale howa i̱ ho gehalu waitigirunaga giha howa i̱ mo wiaga. Ibu i̱naga humbi ale howa ibugua i̱ hapai haga ka. Ibugua i̱ mo wialu handayaho holene hongo karulapeore kagoni.

³Anduane Homogonaga mini yaraga hami̱ya. I̱na ibu olalu haruli. Ibugua hale halu i̱ biamogo bialu i̱naga waitigirunaga giha howa i̱ mo wiaga kagonaga iname ibunaga mini yaraga holene nga.

⁴I̱ homolene kawareni harugoni. Homolene pume dariba haradagua i̱ dariba hayagoni. Iba li hongoheme ibalu dambi haradagua agali ko bu karume i̱ bo wahole ani biyagoni.

⁵Homolene dameneme i̱ mabu bupe howa pume dariba haradagua biyagoni. Homalime i̱ minule mandabu hayagoni.

⁶I̱naga miniha genda ho howa Anduane Homogo olalu harugoni. I̱naga Ngode Datagaliwabehondo i̱ biamogo bia lalu harugoni. Ibuni andaga howa i̱naga bi hale haya. Ibuhondo i̱ biamogo bia larugo hale hayagoni.

⁷Ngode Datagaliwabe ibugua keba timbuniore howa dindi mo dumbirumbi bilaya. Dindi hari timbuni wearu mo emabia hayagola ema bia gimbu biya.

⁸Ibunaga ngui harigaha howa ira hagua tagira ibalu ibunaga ne harigaha howa ira hungu datagitagi biyagome mbirale wiaru bibahende do mundu laya.

⁹Ibugua hari daliga buda edene bialu daliape haya. Daliape hayagola hari beraliba mindibi ibu geha hai haya.

¹⁰Ibunaga dahuliyali mbiranaga erekunini biralu yagalalu daliape haya. Puyabu ega babagane aleheme ibu yalu abaleore daliape haya.

¹¹Aruma holeneme ibu dambi hai haya. Hari beraliba mindibigome ibuni ho ge hayagoni.

¹²Hari daba timbuni ibu heagoha bialu kulu megelalu wá timbuni hama ibu mo bamba halu piya. Iramebi dalu dindi kunimebi beraliba mindibi biago bo haealabaga bialu ibira helaya.

¹³Anduane Homogo ibuni hari daligaha howa bi hongo howa hari kilikulu laradagua biayua. Anduane Homogo Daligaorene Daliga kagonaga bi layuago hale hene.

¹⁴Ibugua ibunaga timu edalu ba amunana biyagome waitigi purogo laya. Hari dabame waitigi bu hearu bayagola ti ibida bilibulu lalu piai haya.

¹⁵Anduane Homogo í̱na waitigi hearuhondo keba harigome í̱naga ngui harigaha buhe̱ tagira ibiyagome puyabu hongohe pulo yu purogo laradagua biya. Iba solowara timbuni bereago hundiai hayagola dindi andaneha gene wiyago bame ha pana ho haya.

¹⁶Anduane Homogo ibu daligaha howa gi yupe halu i̱ minu yania haya. Iba solowara timbuni bereagome i̱ dambi hewaria ibugua i̱ gini miya.

¹⁷I̱naga waitigi hongoheore hearunaga giha hewaria ibugua ibuninaga gime i̱ mo wiya. Agali marume i̱ handabe manga ho hearu i̱na ti bo podabe nahe hewariabi ibugua i̱ mo wialu haru dai biya.

¹⁸Bamba i̱ha genda ngelo hewangi tigua i̱la wai bule ibiya. Ani ibiyagoyu Anduane Homogohanda i̱ handayaho haabo hayagoni.

¹⁹I̱ homolene wiagoha kaware hewaria ibugua i̱ biamogo biya. Ibugua i̱ gubaliniore ho kagome i̱ gini minigo ko.

²⁰I̱na mana bayale tigabi wiaru talialu bialu hewago hondowa Anduane Homogohanda i̱hondo bayaleore biaga. I̱na mana ko mbira nabi hewago hondowa ibugua i̱hondo mana bayale biaabo haga ka.

²¹Anduane Homogonaga mana tigabi ngaru i̱na taluwa bialu harugoni. I̱na i̱naga Ngode Datagaliwabe erembira mialu mana ko wiaru nabi bayale harugoni.

²²Ibunaga bi mana lo ngaru i̱na baya hangu talialu bialu haru. Ibugua bia layadagua i̱na mo wa nahe biaabo harugoni.

²³I̱na ibu deni howa ko mbira nabiore ibu mandabu ka. I̱na mana ko mbira buli lowa i̱ni ibagabu harugoha mamage haluore haruli.

²⁴Ibugua i̱na mana bayale tigabi wiaru talialu bialu hewago hondowa i̱na mana ko mbira nabi hewago hondowabi Anduane Homogohanda i̱hondo bayaleore biaga.

²⁵Anduane Homogo-o mbiralime í̱ wahalu nape talima ibalu heagua í̱nabi nde ogoni ibu yu wahalu napiaga ke. Mbiralime ko mbira nabiaga howa ibuha ko nawi heagua nde í̱nabi ogoni ibuhondo mana bayale biadai biaga kegoni.

²⁶Mbiralime mana tigabi dege biaga heagua í̱nabi nde ogoni ibuhondo mana tigabi dege biadai biaga ke. Anigo mbiralime mana ko biaabo haga heagua í̱na ibuhondo handabe manga haga kegoni.

²⁷Wali agali tini mo dindiha haga karu í̱na ti biamogo bialu haru dai biaga ke. Wali agali maru tini mo dunini howa mine haga karu í̱na ti mo dindiha haga kegoni.

²⁸Anduane Homogo i̱naga wá hagane haleore í̱ kegoni. I̱ arumaha kogola í̱na aruma holene mo wahaga kegoni.

²⁹I̱na waitigi bu karu bope halu wayali holiya í̱na i̱ hongo ngiaga ke. I̱na waitiginaga tano ngaruha ege pabe hongohe timbuni karu pogola anda poliya í̱na i̱ hongo timbuniore ngiaga kegoni.

³⁰Ngode Datagaliwabe ogoni ibunaga mana baya buruguleore biai haga ka. Ibugua bi laragobi heneneore dege laga ka. Ibunime wali agali waitigi handalu ibida porarunaga humbi kago ti bibahende ibuha hage hai haga ka.

³¹Anduane Homogo ibuni hangu Ngode Datagaliwabeore kagoni. Inanaga ha do holene anda ege to̱le̱ ale hongohe Ngode Datagaliwabe ibuni hanguore ka.

³²Ibugua i̱naga ha do anda hongoheore kagonigo i̱ ibaga bu koria ibugua hariga bayale mo tiga biaga ka.

³³Ibugua i̱ nogo gabua mini dia ibagabu poralidagua pialu holiya i̱ handayaho haga ka. Hari nene ngaruha pialu koria ibugua handayaho kagome i̱ pi nalaga ko.

³⁴Ibugua i̱ wai bulene biawai haragome danda boronosime wabini hongoheore hibule ngago i̱na edalu babehe kogoni.

³⁵Anduane Homogo-o i̱naga waitigi hearunaga giha hewaria í̱naga humbi i̱ ngirigola i̱ wayali harugoni. Í̱na i̱ biamogo birigome i̱ wali agali karunaga deni agali mini leneore kogoni.

³⁶Hariga i̱ polene wiagoha í̱na handayaho kegome waitigime i̱ mina nabi. Í̱na hariga bayale mo wirigome i̱ porogoha i̱naga ge gondo lalu pi nale bayale kogoni.

³⁷I̱na waitigi hearu talima pialu minu yania hai haruli. I̱na ti talima pugupugu bialu ti baiore hole wahalu dai nabi haruligoni.

³⁸I̱na ti bogaiore hewagola homo ibira hai haga. Ibira halu i̱naga geha wiai howa lone heyabe nahe wiaga.

³⁹I̱na waitigi baba wai buliya í̱nime hongo ngirigoni. Í̱na i̱ biamogo birigome i̱naga waitigi hearu i̱na ti bo podahana hai harugoni.

⁴⁰I̱ waitigi biaru i̱ handalu ibida purogo lelo í̱na mo bia hari. I̱na i̱ handabe manga haga hayaru bo wahai harugoni.

⁴¹Tigua mbiralime ti biamogo bilo ga̱ lalu hayagoyu ti biamogo bulene mbira ai kabe. Mbirali naheore ndobe. Tigua ti biamogo bilo Anduane Homogo olayagoyu ibugua tinaga bi hale nahaya.

⁴²I̱na ti bo tagadabaga biwagola ti bame be abalu ale wialu puyabume yu purogo labehe hayagoni. Ba dege bialu bo hengeda halu hariga teneni waru wiraligobi haya.

⁴³Wali agali ko hearume i̱ bo waholilono í̱ni abale ibalu i̱ biamogo biri. Í̱na wali agali hameigini tara tara bu hearu handayaho holiya í̱na i̱ dabo helarida. Wali agali tara tara i̱na nahendene hearu áyu i̱ andaneha íbu hai ka.

⁴⁴Wali agali dindi taraha howa íbu hene karume i̱naga wanakuiha ibalu ge duli hanga haga ka. Tigua i̱na bi larugola abale hale halu i̱ talima ibaga.

⁴⁵Tinaga hongo ibira howa tigua tano wai pabe hongohe hearu wahalu tini duru lagalaga bima i̱ koria ibaga.

⁴⁶Anduane Homogo ibu haluheore kagoni. Ibu i̱naga ege to̱le̱ ale hongohe kago ibunaga mini mo yaraga hami̱ya. Ngode Datagaliwabe hongoheore ogoni ibu i̱ pele ngiaga kagonigo ibunaga mini timbuni yaraga haabo hami̱ya.

⁴⁷Ibugua i̱ biamogo bialu waitigi hearu bope halu i̱ mo wayali haga ka. Wali agali hameigini dindi tara tarani hearu i̱ andaneha helai haga ka.

⁴⁸Ibugua i̱naga waitigiru giha hewaria i̱ biamogo bialu i̱ bayale mo wiaga ka. Anduane Homogo-o í̱na i̱ pele ngialu i̱naga waitigiru mo dindiha helalu i̱ mo wayali helarigoni. Í̱na agali bo wahaga bu hearume i̱ bo wahole biyaria i̱ biamogo birigoni.

⁴⁹Anidagua birigonaga i̱na wali agali hameigini tara tara karunaga deni howa í̱naga mini yaraga holebero. I̱na í̱naga mini yaraga halu iba gana lolebero.

⁵⁰Anduane Homogohanda Debidi i̱ kini dabo helayago i̱naga waitigiru bope holiya ibugua i̱ mo wayali helaga ka. Ibugua i̱niore kini dabo helene kogohondo gubaliniore haabo haga ho kagoni. I̱naga waneigini aguanene mani holebiraru tihondobi ibugua gubalini ho haabo holebira.