Read Huli Iba Gana 19 Bible Online

Iba Gana 19 - Huli bible

Iba Gana 19

¹Hari daligani li bigi biragome Ngode Datagaliwabe ibuninaga mini mo yaraga holene inahondo bayuwaore walia haga bialu kagoni. Mbirale li harini bu karu bibahendeme Ngode Datagaliwabe ibugua bayaore wabiniyaru panigiore mo walia haga bidagoni.

²Horo mbira mbira haga beramago bibahendeme inahondo Ngode Datagaliwabe ibugua mbirale wabini harini li bu karunaga lalu langigi bialu ka. Mbiragabi mbi mbira mbira bibahendengi bi langialu dege kagoni.

³Horobi mbibi libuni ne hariga nawi bi nalabehe kagoni. Ogoni labo libugua bi mbira lararia hale naharamaligoni.

⁴Bi hale naharamaligoyu horola mbila libugua bigi biragome wali agali bibahendeme de handalu manda bilonaga lamialu kagoni. Libunaga bi ogoni dindi bibahendeni pume haragola wali agali bibahende hale haiho kagoni. Ngode Datagaliwabehanda li harini hona ni ibu palelonaga balai anda mbira bu heledagoni.

⁵Igiri mbirame wandari dabu buwa ibu andaga haru pialu igiri ibu turu hama piagadagua ni ibu egerebagi turuho yalu tagira ibugu biaga. Agali gerai lagame gerai lo yalu hariga pu bola galo nabi tiga tigaore polene ngadagua ni ibu hariga ibuni piaga ngadaguaore turu halu piaga.

⁶Ni ibu lirayagi howa tagira ibalu nairayagi anda piaga. Ani biagago mbirale mbira ni ibunaga tandaga biragome daba nahelo mo do habe nahe nga.

⁷Anduane Homogonaga bi lowini ngago baya gibi tigabiore lowini ngagoni. Ibunaga bi ogonime wali agali holene gahenge ngialu ina mo hongo hodai biaga. Anduane Homogonaga bi lo ngaru ina hanaho habehe kama. Wali agali mini nawi karu ibunaga bi ogonime mini gigabi mo wia haga.

⁸Anduane Homogonaga bi lowigi bidaru tigabiore lowigi bidagoni. Bi uruni hale halu biaga karu ti turuho haga ka. Anduane Homogonaga bi lo ngaru duniniore lo ngagoni. Bi urunime ina manda bayale bulene ngiaga nga.

⁹Anduane Homogohondo giho holenego mana bayaleore ogoni. Ibuhondo giho holenego mana ogoni wali agalime bialu haho wiaaboore holebira. Anduane Homogohanda bi o langiradaruni henenebi tigabiorebi langiaabo haga ka.

¹⁰Anduane Homogonaga biore baya duniniore wali agalime hame loabi muni ngolo dindiha lowa nga. Muni ngolo uruni koda lowa ibunaga bi ogoni baya gibiore ngago iname gubaliniore howa hame lolene nga. Anduane Homogonaga biore dendebi tombehe mone ibane dendebiore mbaria ngaru magubida lowa bi ogoni dende taraorebi ngagoni.

¹¹Anduane Homogo í̱naga bi lowigi bidegome i̱ í̱naga biabe biaga kogoni mana lalu mo tiga bigi biaga. I̱na í̱naga bi lo ngegodagua hale halu bigi berogola í̱na nde i̱hondo turu halu i̱ buru pado alego tiga handalu ngiaiore hariligoni.

¹²Mbiralime ibuninaga ko biyago ibunime handabe nahe ka. Mana ko mbira bigi buwa i̱nime bu dambiho ko lo manda nabi koyagua mana ko o birudarunigo í̱na domai habe. Ani beregola í̱naga deni i̱ dodo nahe holebero.

¹³Mana ko mbira i̱na bero lalu buligobi í̱na i̱ yaniho habe. Ko bulene tara tara ngarume i̱ mo pila haabo haragola i̱ ko andaneha haabo holigo í̱na i̱ gi mibe. Ani beregola i̱ ko mbira para nahe tigabiore holebero.

¹⁴Anduane Homogo-o í̱ i̱naga ha do haganebi i̱ gi miaganebi kegoni. I̱na bi larogobi mitangi berogobi í̱naga deni karulape helo hame ledo.