Read Huli Iba Gana 21 Bible Online

Iba Gana 21 - Huli bible

Iba Gana 21

¹Anduane Homogo-o í̱na kini kago mo hongo harigonaga ibu turuho kagoni. Biamogo bialu wayali helarigonaga ibugua í̱hondo turu timbuniho kagoni.

²Í̱na ibunaga bu miniha hamelo heago ale miai hariya. Ibu wayali holenaga pele ngi layagola hale halu í̱na nangule nale miaore birigoni.

³Í̱na ibu mo bayale hagane aleru ibu hearia ibilariyagoni. Kininaga manda ngolome wabini wiago ibunaga haguaneni í̱na mo karula hariya.

⁴Ibugua holene bayale ngibe lalu hale hayagola í̱na anidagua miriya. Ibu dindi ogoriani holene luore helo mo wia hariya.

⁵Í̱na ibu biamogo birigome ibu agali mini lene mbira ka. Ibuha hongo holenebi mini lenebi kago í̱nime mirigoni.

⁶Í̱na ibuhondo bayale holeneru wiaabo helo mirigoni. Í̱ni ibu heba kaware haabo kegome ibu mo turu haabo haga ke.

⁷Kini ibugua Anduane Homogohondo mini mbiraore hongohe wu kagoni. Anduane Homogo Daligaorene Daliga kago ibugua kini gubalini ho haabo haga kagome ibu hongohe ha ho wiaabo holebira.

⁸Kini ibugua waitigi bu karu bibahende minu yania hai holebira. Agali ibu handabe manga haga karu hondowa ibugua garabaya helai holebira.

⁹Ibuni hamani hapani ho howa ibugua irame bo dalu mbirale ngaru dai hagadagua waitigi karu bo wahai holebira. Anduane Homogohanda ti baba keba halu bope haragola ti bibahende irame dalu do amo lai holebira.

¹⁰Kini ibugua tinaga waneigini bu karu bo wahai holebira. Tinaga waneigini aguanene mani holebirarubi mbira naheore ereba halu amo lai holebira.

¹¹Tigua kini ibu mo ko hole lowa dindiha hendore ndi lama ibaga bialu howabi tigua mo henene halu ibu bope naholebira.

¹²Kini ibugua danda tege lalu ti kagoha timu baede haragola tigua gi halu ibida piai holebira.

¹³Anduane Homogo-o í̱ hongo haabo holene taraore kego inaha ibilariligo ina í̱naga mini yaraga holeberema. Iname iba gana lalu í̱naga mini yaraga holeberema.