Read Huli Iba Gana 22 Bible Online

Iba Gana 22 - Huli bible

Iba Gana 22

¹I̱naga Ngode Datagaliwabe-o I̱naga Ngode Datagaliwabe-o í̱na i̱ aginaga wahalu piribe. I̱ biamogoore bibelonaga dugu bialu bi larugolabi hale nahole í̱ kaundia uyuraore haruago irane aginagabe.

²I̱naga Ngode Datagaliwabe-o i̱na horombe olalu kogo í̱na ladai nabi ke. Mbiragabi nde olaabo halu kogoyu í̱na i̱naga genda mo wanahe haabo kegoni.

³Anigoyu í̱ Ngode Datagaliwabe Kini Loma Bia Hene howa haru kegoni. Í̱ Kini kegola Isaraele wali agalime í̱naga mini mo yaraga haga.

⁴Inanaga mamali heneyarume í̱ni hanaho haga biniya. Tigua í̱ ani hanaho hemiria í̱na ti pele migi biniya.

⁵Tini kooreni howa í̱ olaga biyagome tinaga waitigirunaga giha howa yo pialu pugu biniya. Tigua í̱ni hanaho haga biniyangi ti heagoria buru pale mbira nawi heneya.

⁶Áyu wali agali bu karu bibahendeme i̱ore handabe manga halu kerekere lalu ka. Tigua ani lalu kagome i̱ agali abale haruligobi ndo áyu ngoe dindini pialu ngaligobi ko.

⁷I̱ handaya haga biraru bibahendeme i̱ mege bialu tinaga ngui yogo bialu i̱hondo hége doma bigi biaga ka.

⁸Anidagua bigi bialu howa tigua i̱hondo lalu, Í̱ Anduane Homogoni hanaho hegodago ibugua í̱ genda yu keruni yamogo nabiradago aginagabe, laga. Anduane Homogo ibugua í̱ kalo manda bidayagua í̱ biamogo nabiradago aginagabe, laga.

⁹I̱ pigane i̱ ai̱yahanda taba hanayangi howa í̱naga gi habeni halu anda harugo kogoni.

¹⁰I̱ pigane hono wiyangi í̱naga gi habeni honope henego i̱naga Ngode Datagaliwabe í̱ni hanaho halu dege anda harugo áyu o kogoni ndobe.

¹¹Ai gendabi tara tara i̱ kogoria hapara kago i̱ biamogo bulene mbirali nahego í̱ dege ke lo kogoni.

¹²Waitigi dewa bulumaga gabua agali hayaga alerume ho mabu bupe kagola i̱ dombeneha ko. Bulumaga wangabe gabua hongohe hiriribiore Basana dindini bu heane hendene ogobioreme i̱ ho mabu bupe kane ko.

¹³Laiono gabuame agali bo tidu bagabu nole ne ha̱la howa ngororo lagadagua tigua i̱ bo nole ogonidagua bialu ka.

¹⁴I̱naga hongo holene ereba haya. Iba dindini odo paya bini pu ereba hagadagua i̱naga hongo bibahende ereba hai halu pirilipe haya. I̱naga kuni damenego bibahende hibi habo lai halu i̱naga gubalini nira nama anda piarua.

¹⁵I̱naga kembobe yobi abalu ale halu i̱naga hégene dugu tagi halu ne hambuni dugu bandalape ka. Anduane-o ani bidago i̱ durumbu o ngagoha homo tongolo muliya ngeledegoni.

¹⁶Agali ko biagaru biango dudu tidiyu haradagua tidiyu howa i̱ ho mabu bupe ka. Tinaga ne tandagabigome i̱naga gi geru hayama iri dali bialu tinaga neme i̱ haya bolomogo bida.

¹⁷Tigua i̱naga kuniru panaga karia hondowa i̱ yo handalu bame kuni hanguore o kagonida lowa handayaho ka.

¹⁸Tigua i̱naga aga ti mo tale bialu aga luni mbira daliga biagane wiwago ti ái ibu harabe hondole tadu bira.

¹⁹Anduane Homogo-o í̱na i̱ hangu helo wanahabe. I̱ biamogo bulene í̱ dege kegonigo i̱ biamogo bule abale íbu.

²⁰I̱naga waitigi karume ayu tibume i̱ ma puguligo pele ngibe. Biango ale o bu karume i̱ bo homa boligo í̱na i̱ abale pele ngi.

²¹Laiono o bu karume i̱ bo nabeheore halu bulumaga wangabe gabua o bu karumebi i̱ bayagua i̱ yo pialu pobe naheore kogonigo i̱ gini mia.

²²Í̱na gi mialu i̱ biamogo ogodagua biya lalu i̱na i̱naga wali agali karu hale helo loyogo loliya. Ti mo ngoai ho bedagoria howa i̱na í̱naga mini yaraga holebero.

²³I̱na ogodagua lolebero. Anduane Homogonaga biabe biahaga kamirume ibunaga mini yaraga hadaba. Yagabanaga waneigini kamirume Anduane Homogohondo ka̱i̱ ladaba. Isaraele hameigini kamirume Anduane Homogo ibu mitangi bialu lotu ladaba.

²⁴Ibugua yagibano karu biamogo bulene ha do waha tigua tandaga nalu karu hondowa nahende tingiha nabiaga kagoni. Ani nabi howa tinime biamogo bia lalu olaragola ibugua hale halu biamogo biaga ka, lolebero.

²⁵Bibahendeore ngoai ho kagoria í̱na birirunaga lalu i̱na í̱naga mini yaraga holebero. Í̱hondo turu halu mbirale bo ngulebero lalu lo wirugo wali agali í̱hondo gihe biru ngaru bibahendenaga deni howa ngulebero.

²⁶Yagibano damene íbu ngoai ho bedaru bibahendeme ti noabiradagua nendebu nolebira. Anduane Homogo mitangi bule íbu ngoai ho bedaru bibahendeme ibunaga mini yaraga holebira. Wali agali uruniore bayale hangu hama puabo helo aniore bilo laro.

²⁷Wali agali hameigini tara tara paluyu pedaru bibahendeme Anduane Homogo ka manda bialu ibu karia ibalu ibu mitangi bialu lotu lai holebira.

²⁸Anduane Homogo ibu kini howa hameigini tara tara paluyu pedaru bibahende ibugua handame ho kagoni.

²⁹Wali agali minehe dindini holene mo tene ho karu bibahende ibalu Anduane Homogonaga geha bulu paliai holebira. Homalu dindi tago bulebirago manda buwa bibahendeme ani biai holebira.

³⁰Mani dabane hama porarume Anduane Homogonaga biabe bia holebira. Tigua Anduane Homogo lalu maha anda ho aribia hene karu lamulebira.

³¹Maha taba honolebiraru tibi lamialu, Anduane Homogohanda ibunaga wali agali pele miya, lalu lamulebira.