Read Huli Iba Gana 24 Bible Online

Iba Gana 24 - Huli bible

Iba Gana 24

¹Dindi bibahendebi mbirale dindini karubi ngarubi bibahendeore Anduane Homogo ibunaga hangu nga. Wali agalibi mbirale tara tara dindini ema bialu piaga damenerubi bibahendeore Anduane Homogo ibunaga hangu ka.

²Anduane Homogohanda iba andaneha berelowa dindi ogo daliga wabu ngeleda. Dindi ogonaga gene dunini iba solowara timbuni bedago andaneha wa namu lowa dindi ogo pagaho ngeleda.

³Mbirali Anduane Homogo mitangi halu hari nene kagoria iraga halu polene karulape ai kabe. Anduane Homogonaga anda lomabia hene hari neneni kago ge nahaga ogoniha ge yaanda halu polene karulape ai kabe.

⁴Mbirali ibu gime mana ko mbira nabiagabi ibu bu minime mana ko mbira mitangi nabiagabi mbirale gime wabiniru mitangi nabiagabi tindule ogoale buliya lowa lahondo nahagabi uruniale nabiaga kago ibuni iraga halu polene karulape ka.

⁵Wali agali urunibi karu Anduane Homogohanda ti pele mialu mo bayale holebira. Ngode Datagaliwabe ibugua tíha ko mbira nawi tí tigabiore kamigoni lolebira.

⁶Wali agali urunibi karume Ngode Datagaliwabe mitangi bialu ibu kagoria ibaga. Yagabanaga Ngode Datagaliwabe kago mitangi bialu ibuni kagoria kaware ibugu biaga.

⁷Kini gibi kago ibu anda ibilo. Panga payapai kamiruni amura dugu amu nana bidaba. Panga haraba bambaore howa payaho wiaabo hene karuni dugupe hadaba. Kini gibi biago ibilo ani bidaba.

⁸Kini gibi ogoni ibu ai kabe. Kini ogoni ibu Anduane Homogo hongo gibihe biago kagoni. Anduane Homogo ogoni ibu wai bialu wayali haga gibi biagoni ka.

⁹Kini gibi kago ibu anda ibilo. Panga payapai kamiruni amura dugu amu nana bidaba. Panga haraba bambaore howa payaho wiaabo hene karuni dugupe hadaba. Kini gibi biago ibilo ani bidaba.

¹⁰Kini gibi ogoni ibu ai kabe. Anduane Homogo Bibahendeore Haru Haame Ho Haga biago ibuniore Kini gibi ogoni kagoni.