Read Huli Iba Gana 25 Bible Online

Iba Gana 25 - Huli bible

Iba Gana 25

¹Anduane Homogo-o i̱na i̱naga miniha mitangibu kogonaga í̱hondo bi larogoni.

²Í̱ i̱naga Ngode Datagaliwabeore kegoni. I̱na í̱hondo mini mbiraore wu kogoni. I̱ wai wayali naharogonaga taga pani nanelabe. Waitigi karume i̱ bope halu wayali howa i̱ hondo oba nahelabe.

³Wali agali í̱hondo mini mbiraore wialu mini dunubiahe karu ti wai wayali naharagonaga taga naholebira. Wali agali mine halu mana ko biaga karu tini dari halu taga holebira.

⁴Anduane Homogo-o í̱naga mana bayale ngeru i̱ lawai halu hariga tigabini pialu holiya mo walia habe.

⁵Í̱na bi mana henene lo ngego talialu bialu holiya i̱ lawai habe. Ngode Datagaliwabe í̱na i̱ haru dai bialu pele ngiaga kegonaga i̱na ani bibe laro. Horo bibahendengi í̱na i̱ biamogo bibelo mini dunubiaho haruligo kogoni.

⁶Anduane Homogo-o í̱naga dara holenebi gubalini holenebi irane nawini haga kego mitangi bibe. Í̱naga mana ogoni bambaore howa wiaga biago áyu wiaabo kagoni.

⁷Anduane Homogo-o i̱ igiri daliahe hewangi ko dewa bialu harugobi mine harugobi mitangi nahabe. Anduane Homogo-o í̱ bayaleore haabo kegonigo í̱naga gubalini holeneme i̱ dara halu mitangi bibe.

⁸Anduane Homogo ibu bayale tigabiore kagoni. Wali agali mana ko biaga bu karume mini beregedalu mana bayale bialu helo ibugua biawai haga ka.

⁹Ibugua wali agali tini mini mo dindi haga karu bayuwa haru haga ka. Tigua ibunaga mana tigabi ngaru hangu bialu helo ibugua biawai haga ka.

¹⁰Anduane Homogohanda ibunaga habo nalolene bi lowini ngagobi ibunaga mana ngagobi wali agali talialu biaga karu ibugua tihondo gubalinibi mini bilinahebi howa ti hariga tigabini haru haabo haga ka.

¹¹Anduane Homogo-o í̱ni mini tigabi howa bule lalu lo wiridagua mana ko bialu harugo domo wahabe. I̱na ko timbuniore biruru nde í̱na domo wahaiore habe.

¹²Wali agali Anduane Homogo mitangi bialu mogolo haga karu aibe. Uruni ti mana bayale dabalu bialu helo ibugua hariga tigabi mo walia halu holebira.

¹³Wali agali urunibi karu ti bayale halu tinaga waneigini aguanenerubi dindi ogoria howa bayale holebira.

¹⁴Anduane Homogo ibugua wali agali ibuni andaneha karu nenegeore haga kagoni. Ibugua ibunaga habo nalolene bi lowini ngaru tihondo lawai haga kagoni.

¹⁵I̱na horo bibahendengi Anduane Homogohanda i̱ biamogo bilo ibuhondo mini dunubia ho haga kogoni. I̱ mo ko holene bu ngagoria kogola ibugua i̱ pele ngialu mo wiaga kagoni.

¹⁶Anduane Homogo-o i̱ni hangu howa i̱naga hongo ereba hayadago í̱na i̱ dara halu biamogo bule abale ibabe.

¹⁷I̱ hendore holene ngadagua holiya i̱ha genda bu ngelo koruni í̱na mo wahabe. Mini tumutumu bulene ngarume i̱ bope nahelo í̱na i̱ abale biamogo bibe.

¹⁸I̱ha genda tandagaru ngelo koru mitangi bialu i̱na ko bini ngoru bibahende í̱na domo wahai habe.

¹⁹I̱naga waitigi dewaore bu karu de handa. Tigua i̱ handabe manga timbuni kagobi de handabe.

²⁰I̱naga waitigi karume i̱ bo wanahelo í̱na i̱ handayaho halu pele ngibe. Tigua i̱ mo taga nahelo i̱na í̱ kegoha ha do hole ibulebero.

²¹I̱na í̱hondo mini mbiraore wu kogo i̱naga mana bayale tigabi bulene ngorume i̱ haru haabo helo hamelo kogoni.

²²Ngode Datagaliwabe-o í̱naga Isaraele wali agali bu karunaga genda tara tara ngarume ti bo hengeda nabilo í̱na ti pele mialu haru dai bibe.