Read Huli Iba Gana 26 Bible Online

Iba Gana 26 - Huli bible

Iba Gana 26

¹Anduane Homogo-o i̱na í̱hondo mini mbiraore wu haabo howa mana tigabi hangu bialu harugo í̱na i̱ bayale ka labe.

²Anduane Homogo-o i̱na bialu haga ngoru í̱na bibahendeni howa i̱ ba handabe. I̱naga bu minibi baya hangu dabo handaga bigi bibe.

³Í̱naga dara halu gubalini holeneme i̱ handayaho haga kegoni. Í̱ mini bilinahe kegome i̱ poleberogoha pu bamba halu í̱na i̱ yu wahalu napiaga kegoni.

⁴I̱ agali ko biaga karu heba naharuli. Agali tombene hondokihe karu baba i̱ nenege nahaga kogoni.

⁵I̱ agali mini kowi karu baba ibaga bibe manga howa mana ko biaga karu helalu habagi ho haruli.

⁶Anduane Homogo-o i̱ha ko mbira nawiore kogo walia halu i̱na i̱naga gi wayawaya bo waharogoni. I̱ í̱naga lomabu delaga dabu bu kagoria pu mabu bialu howa i̱na í̱ mitangi bialu lotu lalu kogoni.

⁷I̱na anidagua bialu howa í̱hondo ka̱i̱ lalu iba ganaru larogoni. Í̱na mbirale bayale bialu hariruni wali agali bibahendeme hale helo i̱na lamiai harogoni.

⁸Anduane Homogo-o í̱naga anda í̱ni kegoha kago i̱ hame timbuni ledo. Í̱ mini timbunibi wá holenebi haabohe ngagoria kego i̱naga gubalinime hame timbuni lo kogoni.

⁹Mana ko biaga karu heba í̱na i̱ bo wanahabe. Mendeali homelo bo wahaga karu í̱na ti bo waharengi i̱ ti heba homoliya ba nabi helabe.

¹⁰Uruni tigua mana ko ngubiore ngaru biaabo haga kagoni. Tigua wali agali bayale kago mo ko halu agali tara karume bame bo wahelo ohowa muni hana haga kagoni.

¹¹Anigoyu i̱nime mana bayaleore ngaru taluwa bialu haga kogonigo í̱na i̱ dara howa biamogo bialu haru dai bibe.

¹²I̱ mana tigabi yani ho howa hongoheore haga kogo mbirale mbirame i̱ mo ko habe nahe. Wali agali Anduane Homogo mitangi bialu lotu lole ngoaiho bedagoria howa i̱na ibunaga mini yaraga halu holebero.