Read Huli Iba Gana 27 Bible Online

Iba Gana 27 - Huli bible

Iba Gana 27

¹I̱naga wá holenebi i̱ pele ngulenebi Anduane Homogo ibuni hangu kagoni. Ani kagola i̱ mbirali hondowa gi naholebero. Anduane Homogo ibugua mbirali gibi ale bu ngarunaga howa i̱ mo wiaga kagola i̱na mbiralihondo gi naholebero.

²Agali ko i̱naga waitigi karume i̱ de handaya halu bo wahole manda biyagua tiniha dai bulebira.

³Agali wai tidiyu henego bibahendeoreme i̱ore bole lowa ho mabubupe ho kayaguabi i̱ gi naholebero. I̱naga waitigi karume i̱ baba wai kama layaguabi ti ani lo helo i̱ Anduane Homogohondo mini mbiraore wiaabo howa miniha dungulo holebero.

⁴I̱ Anduane Homogohondo bi lalu mbirale mbira hangu bulene hamelo ko lalu lamiru. Ogonigo i̱ dére emabu kongi Anduane Homogo ibu andagani haabo holene hame ledo lalu lamiru. Ani lowa Anduane Homogonaga biamogo bulenebi baya turubini bulenebi mana bayale uruni alego bayuwaore handa tiga bialu i̱ hama polenego ogodagua hama pobe lalu bi langigi bilo hame laru.

⁵Gendabi mini burugule wigi bidangi ibugua i̱ bira do helolebira. Ibugua ibuninaga andaha i̱ bayale holiya mo do holebira. Ani bialu ibugua i̱ taba muwa ege to̱le̱ hari wedagoria neneoreni bo iraga holene tobaheni minu berelolebira.

⁶Anidagua bigi biragola i̱na i̱naga waitigiru bope halu i̱ wayali holebero. I̱na turu howa ali iwaru lalu Anduane Homogonaga andaha ibunaga lomaru bo delolebero. I̱na Anduane Homogonaga mini yaraga halu iba gana lolebero.

⁷Anduane Homogo-o i̱na í̱ olarogola hale halu ladai bibe. Í̱na i̱ dara nahabehe kogoni harugo i̱ dara halu bi larogo hale halu ladai bibe.

⁸Í̱na i̱hondo lalu, I̱ mitangi bialu lotu lole i̱ kogoria ibabe, larigola i̱na, E̱ Anduane Homogo-o ibulebero, lalu ladai birugoni.

⁹Anduane Homogo í̱na i̱hondo manga halu erembira nguleni. Anduane Homogo-o i̱ í̱naga biabe biahaga harugonigo í̱na i̱hondo keba halu erembira ngialu poleni. I̱naga Ngode Datagaliwabe i̱naga Pele Ngiaga-o i̱ biamogo biaga í̱ harigonigo i̱ helalu erembira ngialu poleni laro.

¹⁰I̱ aba ai̱yalame i̱ handabe manga halu bo batagi hayaguabi Anduane Homogo ibugua i̱ ibunaga adogeha yamuwa de hondo holebira.

¹¹Anduane Homogo-o i̱naore bialu holiya í̱na manda bu ngedagua i̱hondo walia habe. I̱naga waitigi dewa bu karume i̱ boligo i̱ hariga gibi hiriribini haru nape hariga tigabini haru pobe.

¹²I̱naga waitigi i̱ bolene kagoria i̱ hangu helo wahalu poleni. Tigua tindule i̱ nabinigobi bame dibade halu i̱ mo gi̱la halu bi lai damene haragola ti bime i̱ bo ngoai haga kago Anduane Homogo í̱na i̱ yu wahalu poleni laro.

¹³Anduane Homogo ibunaga mana baya gibiore áyu ina kamangi bigi birago i̱ hondole holebero manda bido.

¹⁴Anduane Homogohanda biamogo bulebira manda bialu ibuhondo mini mbiraore wu halimu. Bu miniha genda nahe hongo ho halimu. Anduane Homogohanda biamogo bulebira manda bialu ibuhondo mini mbiraore wu halimu.