Read Huli Iba Gana 29 Bible Online

Iba Gana 29 - Huli bible

Iba Gana 29

¹Dahuliyali kamiru-o Anduane Homogo kagonaga mini mo yaraga hadaba. Wá taraore holenebi hongo holenebi ibuni hangu kago turu timbuni hadaba.

²Anduane Homogo ibuni baya buruguleore kagonaga mini yaraga hadaba. Ibu mitangi bialu ibunaga wanakuihayagi bulupalialu ibunaga mini yaraga halu lotu ladaba.

³Anduane Homogonaga bi larago iba solowara bedarume hale hai haga. Ngode Datagaliwabe ibuni mini leneore kagome ibunaga bi hari kulu laradagua biayua. Iba solowara berearuha daligani ibunaga bi timbu hari kili kulu laradagua biayuagoni.

⁴Anduane Homogonaga bi hongohe gibi taraore layuagoni. Wali agali bibahende bu hearume ibunaga bi laragola hale howa mogo lalu gi hai haga.

⁵Anduane Homogo ibunaga bime ira tamia hearu bo dangia lahole biagaya. Ira tamia Lebanono dindi hene heaguabi aniore biagaya.

⁶Anduane Homogohanda Lebanono dindiha hari timbuni wearu mo emabia haragola nogo bulumaga iginime pogoladagadaga biagadagua bilaga ka. Hari Hemono wedago nogo bulumaga wangabe daluame pogoladagadaga biradagua ani bilaga ka.

⁷Anduane Homogohanda bi laragola hari daba migimege lalu wá timbuni hagimbu biagaya.

⁸Ibunaga bi laragome dindi ko wali agali nahaga ngaru mo birila gimbu biagaya. Kedese dindi ko iba dalu naibaga ngaru mo birila gimbu biagaya.

⁹Anduane Homogohanda bi hongo howa laragola nogo gabua karume hale halu mogolo puwa igini abale wupe hagaya. Ibugua bi hongo howa laragome ira yuni karu gilopaya bilagaya. Ibunaga anda kagoha wali agali bibahendeme lalu, Ngode Datagaliwabe ibu mini leneore ka, lagaya.

¹⁰Anduane Homogo ibugua iba solowara timbuni bedaru handameho haga. Ibu Kini timbuniore howa hondo haabo haga kagoni.

¹¹Anduane Homogohanda ibunaga wali agali bu karu mo hongo haabo haga kagoni. Ibugua ti mo bayale heledagola ti mo palia holene karulo haabo haga ka.