Read Huli Iba Gana 31 Bible Online

Iba Gana 31 - Huli bible

Iba Gana 31

¹Anduane Homogo-o i̱na í̱ kegoha ha do hole eberogoni. I̱ waitigi karume i̱ bope nahelo í̱na biamogo bibe. Í̱naga mini tigabiore kegonigo i̱ pele ngibe laro.

²I̱naga bi larogo hale habe. Í̱na i̱ pele ngule abale ibabe. I̱ ha do holene egeanda ale í̱ kegoni. I̱naga waitigirume i̱ bope holigo í̱na i̱ ho hagira bu habe.

³Heneneore í̱ i̱naga ha do anda ale howa i̱ baya hangu handayaho kegoni. I̱ hariga polene ngagoria pialu kogola í̱na haru holebero lalu abale lo wiridagua i̱ haru halu bamba habe.

⁴Waitigi karume i̱ gonoha delo gono wiaho ngagoria pialu do wuligo í̱ i̱naga ha do anda kegonigo í̱na handayaho habe.

⁵I̱ni í̱ha ya harogoni. Anduane Homogo-o í̱ Ngode Datagaliwabe mini bilinaheore kegonigo i̱ pele ngialu haru dai bulebere.

⁶Wali agali dama mitangi bialu gime wabini ngagohondo bi pupu wiaga karu hondowa í̱ turu nahaga kegoni. I̱na nde í̱hondo mini mbiraore wu haga kogoni.

⁷Í̱na i̱ gubaliniho haabo haga kegonaga i̱na í̱hondo turu timbuni ho kogoni. I̱ genda yu kogo í̱ hendede. Mo ko holene íbu ngago í̱ manda bu kegoni.

⁸Waitigi bu karume i̱ minu garabaya bilo í̱na i̱ yupe nahe handayaho haabo harigola i̱ bayale kogoni.

⁹Anduane Homogo-o i̱ genda timbuniore yu kogo í̱na i̱ dara halu biamogo bibe. I̱na dugu bialu haabo hewaria i̱naga de tohe kogoni. I̱naga hongo bibahende pirilape haya.

¹⁰I̱ miniha genda yu kogome i̱naga holene mo tubagi holobada. I̱na dugu hongo howa bialu haabo kogome i̱ dindini lu haabo naholeda. I̱ha genda timbuniore ngelo kogome i̱naga hongo ibira halu ereba haya. I̱naga kunibi gedaore haragoni.

¹¹Waitigi bu karume i̱ mege bialu ka. I̱ damene karume i̱hondo bi ko lalu kagoni. I̱ mandabi karume i̱ hondowa gi hara. I̱ harigani pialu koria wali agali lola haga birarume i̱ handalu ti ibida pugupugu biaga.

¹²Wali agali bu karume agali homenego embeda ho wahagadagua tigua i̱ embeda hai haya. I̱ iba be pambulo wahene ngaligobi harudane hendedo.

¹³Waitigi dewa karume i̱ mege timbuni bialu hearia hale haru. Tigua i̱ mo gibia timbuniore hole haragoni. Tigua mo ngoai howa i̱ mo ko hole manda bialu i̱ bo waholenaga bi pongo balu ka.

¹⁴Anigo uruni bialu helowa Anduane Homogo-o i̱na í̱hondo mini mbiraore wu ko. I̱naga Ngode Datagaliwabeore í̱ kegoni, lalu ko.

¹⁵Horo bibahendengi í̱naga giha i̱ haabo kogoni ndobe. Í̱na i̱ waitigi karunaga giha koria agali i̱ mo ko hole talima ibaga bu karunaga giha koriabi i̱ yamibe.

¹⁶Í̱naga biabe biahaga agali kogo hondowa i̱ dara habe. Í̱na gubalini timbuni haga kegome i̱ pele ngibe.

¹⁷Anduane Homogo-o i̱na í̱ olalu kogonigo waitigi bu karume i̱ bope helo yupe nahabe. Agali ko uruni tini mo ko hai helabe. Ti homenerunaga dinini pu hagaha pialu tinaga ne harigaha bi nalelo mo ereba habe.

¹⁸Agali uruni tigua mine halu mege bialu agali tigabi karuhondo bi ko laga kagoni. Tigua ke̱ holene bi ngaru dege laabo haga ka. Tinaga ne harigaha bi lagadaru ereba helo ti bo wahai habe.

¹⁹Wali agali í̱ni andaneha karu bayale helonaga í̱na baya hanguore bialu kegoni. Wali agali í̱nihondo mini mbiraore wu haga karu í̱na baya hangu handayaho haga kegoni. Wali agali bibahende bu karume de handai helo í̱na ani bialu kegoni.

²⁰Wali agali maru bo wahole manda bialu karume ti gingila mialu babe nahe helo í̱na í̱naga wali agali í̱ninaga gubaliniha mo do ho kegoni. Tinaga waitigi karume ti mege bialu bope nahelo í̱na wali agali uruni í̱ni andaneha bayaleore helo mo do ho kegoni.

²¹Anduane Homogonaga mini yaraga holene nga. I̱naga waitigi karume i̱ bo wahole ho mabu bu heagola ibugua i̱ gubalini howa ibunaga hongome i̱ biamogo biya.

²²Bamba i̱ gi timbuni ho howa í̱ni kegoria naholiyanaga í̱na i̱ bo taliatagi harida lo manda biru. Ani bu howa i̱na í̱hondo i̱ biamogo bia lalu dugu bialu hewaria í̱na hale halu biamogo birigoni.

²³Anduane Homogonagaore wali agali mini bilinaheore kamiru-o tígua ibunihondo gubalini hoore halimu. Wali agali ibu talima pialu mini bilinahe karu ibugua ti handayaho haga ka. Wali agali mine haga karu ibugua ti pani tini biyagobi nelo mo miaga ka.

²⁴Wali agali Anduane Homogohondo mini dunubiaho kamiru-o tí gi nahe elahe howa hongo haabo ho halimu.