Read Huli Iba Gana 32 Bible Online

Iba Gana 32 - Huli bible

Iba Gana 32

¹Mbirali ibunaga ko biniru Anduane Homogohanda domo wahalu mana liahe biniru mo wahene kago ibu turubiore ka.

²Mbirali Anduane Homogohanda ko bira lene nabiagabi ibuni miniha mo hondo holene mbira nawiore kagobi ogoni ibu baya turubiore ka.

³I̱na ko biruru ogo biru lalu lapani nahe donge ho howa mbiraga horombebi miniha u̱lu̱ lalu haabo hewaria i̱naga tingini bia ko halu homabeheore haru.

⁴Anduane Homogo-o mbiraga horombebi í̱na i̱ pani ngiaabo hari. Ani birigome i̱naga hongo bibahendeore pirilipe hai haya. Dadimba tanini bereneru gaeangi poboyogo biragome yo biaganedagua i̱naga hongo ogonidagua biya.

⁵Ani biyagola i̱na ko biniru Anduane Homogo í̱ langirugoni. Ko mbira do nahe howa binirubi tigatiga langiai harugoni. Ko biruru Anduane Homogo í̱hondo lapaniore hole lo manda bu henegobi lapani hai harugoni. Ani birugola í̱na ko biruruni domo wahai harigoni.

⁶Ani biaga kago manda buwa Anduane Homogo í̱naga wali agali mini bilinahe karu bibahendeme ti burupale kangi í̱hondo bi lolene nga. Genda timbuni iba li ale ti kagoria anda íbu ngangi í̱hondo bi layagua genda timbuni ogoni ti namu nalolebira.

⁷I̱naga ha do anda í̱ kegoni. Gendabi ngangi í̱na i̱ biamogo birili. I̱ homedolego ibugua ogodagua mo wiya lalu maru hale helo iba gana dalimu lalu lamulebero. Í̱na i̱ mo wiriligonaga ani lolebero.

⁸Anduane Homogohanda lalu, Í̱ hariga pobelogo i̱na walia haga bulebero. I̱na í̱ handaya ho howa ogodagua bia ogodagua nabibe laga bialu langulebero.

⁹Nogo hosi dongirume mini nawi howa piagadagua pialu keria í̱ hariga polene ngadagua pobelo ege pu ne hanganeha magui howa pume hende howa haru poliya holeni, lalu leda.

¹⁰Mini kowi karu ti tandaga timbuni nalu haga. Anigo Anduane Homogoha hanaho haga karu ti ibunaga gubalini holenehayagi howa yo pialu pugu biaga.

¹¹Anduane Homogohanda bigi biyago mitangi bialu mini tigabiwi kamiru ti gubaliniha turuore halimu. Ibugua bi ledadagua bialu kamiru tí turuore howa ga̱ lalu ladaga halimu.