Read Huli Iba Gana 33 Bible Online

Iba Gana 33 - Huli bible

Iba Gana 33

¹Tí mini tigabiwi kamiru bibahendeme Anduane Homogohanda bigi biyagonaga turuore howa ga̱ lalu ladaga halimu. Tí Anduane Homogohanda ledadagua hale halu biaga kamirume ibunaga mini yaraga halimu. Wali agali mini tigabiwi karume mana ogonibi bulene nga.

²Ga̱wa̱ hiliyularume Anduane Homogonaga mini yaraga halu ibuhondo iba gana lo milimu.

³Iba gana gahenge wabuwa Anduane Homogohondo lo mialu howa hiliyula ga̱wa̱ru lagane mugubeoreme lalu turuore halu hongo howa ladaga halimu.

⁴Anduane Homogonaga bi damenego bibahende henene hanguore lo nga. Ibugua mbirale galone bigi bulebero ledagobi heneneore bulebira lowa ibuha hanaho habehe kama.

⁵Anduane Homogo ibu mana tigabi bulenebi henene lolenebi gubalini haga ka. Ibunaga gubalini haabo holeneme dindi bibahendeha to̱lai ka.

⁶Anduane Homogohanda hari daliga li kagoni ibunaga bime ani ha lowa ni ege yakundiru li bu karunibi ani hadaba layagola heneru ka.

⁷Ibugua iba dameneru mbiraore hanguni mo mogo buwa berelene. Iba solowaranaga guru kuyama uli gibiruha panga payanda ho ngelama poradagua bini.

⁸Dindi bibahendeni bu kamirume Anduane Homogo mitangi halu ibunaga mini yaraga hadaba. Wali agali dindi bibahendeni kamirume ibu daligaore ka manda bialu ibunaga mini yaraga hai hadaba.

⁹Ogoni irane ibugua bi hangu layagola mbirale bibahende dindini ngaruni íbu helene. Ibunaga bime mbirale ogoale tagira íbu ha laga biyagola tagira íbu haga bini nga.

¹⁰Dindini hameigini tara tara paluyu pedarume mbirale nagalone bule mandamanda bu wigi bidaru nabilonaga Anduane Homogohanda mo pere laga. Tigua bule miniha manda bu yidaru bualono burugu lelo ibugua mini yaniho haga.

¹¹Anigo Anduane Homogo ibugua bule manda bu winiru mbira ereba nahe wiaabo holebira. Ibugua bule manda bu yinigo mbirale mbirame mo ereba habe nahe hongoheore wiaabo holebira.

¹²Hameigini mbira tinaga Ngode Datagaliwabe mende nahe Anduane Homogo ibuni hangu ka lowa yu tigabu karu ti turubiore ka. Wali agali Anduane Homogohanda ibuninagaore helo lowa dabene karu ti turubiore ka.

¹³Anduane Homogohanda dahuliya andaga howa de handadali halu wali agali bibahende bu kamaruni handai ho ka.

¹⁴Ibugua kini howa haru kagoria howa de handadali halu ina dindini wali agali bu kamaruni de handai ka.

¹⁵Wali agali damene bibahendenaga mitangi bulene pigane ibugua mo wia howa tigua birago damene bibahende ibuni manda biai ho ka.

¹⁶Kini ibunaga ami hongohe kago hangume agalila wai bialu ibu wayali haga ndo. Wai biaga ami agali mbira ibu wai bialu wayali haganego ibuninaga hongo hangume ndo.

¹⁷Wai biagane agalime nogo hosini biruwa wai biyaguabi wayali naholebira. Hosi uruninaga hongo gibi ha kagome agali pele mia nabulebira.

¹⁸Anduane Homogohanda wali agali ibugua bia ledadagua hale halu biaga karu ibunime bayuwa de handayaho ka. Ibugua ti gubalini haho wiaabo haga ka manda buwa ibuhondo mini mbiraorewu karu ibugua mamage halu handayaho haga ka.

¹⁹Wali agali urunibi karu homolilono ibugua ti pele miaga ka. Hina gari timbuni porangi ti tomo karulape nalu helo mulebira.

²⁰Iname Anduane Homogoha hana howa ibuni mini dunu bia ho kamagoni. Inanaga pabe tigibi ina biamogo biagabi Anduane Homogo ibuni hangu kagoni.

²¹Ibu kagome ina ibuha hanaho howa turuho baya kamagoni. Ibunaga mini baya buruguleore hongohe ngagoria ina hanaho kamagoni.

²²Anduane Homogo-o ina í̱ni mini dunu bia ho kamagonigo í̱na ina gubalini haho wiaaboore habelo hamelo kama.