Read Huli Iba Gana 34 Bible Online

Iba Gana 34 - Huli bible

Iba Gana 34

¹I̱na Anduane Homogohondo ka̱i̱ore laabo halu holebero. I̱na ibunaga mini yaraga nahe naholebero.

²Ibugua bigi biyarunaga i̱na ibunaga mini mo yaraga halu holebero. Wali agali marume hengedope haragola genda ho haga kamiru tí i̱na bi o larogoni hale howa turu halimulonaga laro.

³Tíbi i̱bi ina Anduane Homogo ibu daliga gibiore ka lama. Ibunaga mini ina haru mandagi mo yaraga hama.

⁴I̱na Anduane Homogohondo bi larugola ibugua hale halu ladai biya. I̱ gi bulene tara tarame daribaho wiaria ibugua i̱ golope haya.

⁵Marume hengedope haragola miniha gendaho haga karu ti Anduane Homogo ibugua biamogo birago hondowa turu haga. Anigo ti miniha genda howa turu nahe mbira naholebiraore.

⁶Hongo nahe karume Anduane Homogo olaragola ibugua hale halu biamogo biagaore ka. Ti genda tara tara yu haga bidaria ibugua ti pele miaga ka.

⁷Wali agali Anduane Homogohanda laradagua hale halu biaga karu ibunaga dahuliyalime mamage helaga biaga. Uruni ti kagoria gendabi hiriribiru íbu wigi bidagoria howa ti ibunime gi miaga ka.

⁸Anduane Homogo baya gibiore ka laramagoni heneneore leneda lole í̱nime manda bialu handabe. Ibuha ha doho karu ti bayale holene handa walia howa turuho ka.

⁹Anduane Homogonaga wali agali kamiru bibahendeme ibunaga andaneha halimu. Ibugua bia laradagua hale halu biaga karu ti mbirale mbira buru palia nabi karulapeore holebira.

¹⁰Tomo garibilo habe nahe laiono hongoheru heba mbiru garibilo hagagoyu wali agali Anduane Homogohanda bia laradagua biaga karu ti mbirale bayale damenego mbira buru palu naholebira.

¹¹I̱ nenege kamiru-o i̱na bi larogo hale hole ibidaba. Tí Anduane Homogonaga andaneha halimulonaga bulene i̱na lawai holiya ibidaba.

¹²Tí turu ho holene hamelo kamibe. Tí luore bayale halu hodagua holene hamelo kamibe.

¹³Anidagua holene hamelo kamiyagua tínaga ne harigaha howa bi ko nale tindule ke̱bi naheore halimu.

¹⁴Ko bulene ngaru erembira mialu mana bayale bialu halimu. Tínaga gubalinioreme mbirale mo palia howa bigi bulenego dabalu bialu halimu.

¹⁵Wali agali mini tigabiwi karu Anduane Homogo ibunime de handaya howa mamage haga ka. Tigua genda yu howa ibu olaga biragola ibunime hale halu biamogo biaga ka.

¹⁶Mana ko biaga karu hondowa Anduane Homogo ibu turu nahaga ka. Ko biagaru homaragola wali agalime uruni ti abaleore embedaho waholebira.

¹⁷Mini tigabiwi karume Anduane Homogo olaragola ibugua hale halu ladai biaga ka. Ti genda tara tara yu howa ibu olaga biragola ibugua hale halu biamogo bigi biaga ka.

¹⁸Wali agali mini dege dindi howa turu nahe karu Anduane Homogo ibu ti kagoria kaware ka. Miniha hanaho holene mbira nawioredagola agini hanaho hoabe tobaho karu ibugua pele miaga ka.

¹⁹Mbirali mini tigabiwi kago ibu tandaga nolenebi genda yulenebi handalu holebira. Ibu ani tandaga nalu kariabi genda yu kariabi Anduane Homogo ibunime ibu pele mulebira.

²⁰Anduane Homogo ibunime mbirali mini tigabiwi kago hondo haga ka. Ibunaga kuni emeneorebi mbira bu lolani handalu ibunime yaniho holebira.

²¹Ko bulene bibahende ngarume wali agali ko biaga karu bo home lolebira. Wali agali mini tigabiwi karuhondo handabe manga haga karu Anduane Homogohanda ti pani mulebira.

²²Anduane Homogohanda ibuninaga wali agali pele mulebira. Ibuha ha do hole ibu karia poraru ti bayale holebira.