Read Huli Iba Gana 35 Bible Online

Iba Gana 35 - Huli bible

Iba Gana 35

¹Anduane Homogo-o agali i̱la manga halu hoba migimigi bu karu í̱na tihondo manga halu hoba mu habe. I̱naga waitigi bu karu baba í̱na nde ti baba wai bialu habe.

²Í̱na wai biagane ale ngeru mo karulalu humbi mo yalu i̱ biamogo bule ibabe.

³I̱ bo wahole talima ibiraru hondowa í̱na ayu yandarebi mo yalu i̱ pele ngule abale ibabe. Í̱na i̱hondo lalu, Í̱ biamogo biaga i̱ kogoni, labe.

⁴Agali uruni tigua i̱ bo wahole kagola í̱na ti bope halu mo taga habe. Tigua i̱ bo waholenaga wai hanalu kago í̱na agali uruni talima pialu mo luluya habe.

⁵Anduane Homogo-o í̱naga dahuliyalime agali ko uruni bo talia togolalu puyabume datani pulo waharadagua bilabe.

⁶Í̱naga dahuliyalime ti bama talima pialu kagola agali ko biagarunaga hariga poragoria aruma helalu mo ko habelo hameledo.

⁷I̱na ti mo ko naheore hewaria tigua i̱ gonoha delo gono wia do ho kagoni. I̱ pilo ngelo gundu uli tombo wiaho ka.

⁸Tigua ani bu kagoyu tini nahende kaore mo ko holene abale íbu ngelabe. Gono i̱ delo wiyadagoha tini da aribia helabe. I̱ uli pelo gundu uli tombo wiyadagoha tini uli pelo hameledo.

⁹Anduane Homogo í̱na anidagua beregola i̱ turu timbuni ho holebero. Í̱na i̱ pele ngeregola i̱naga bu miniha dungulo holebero.

¹⁰I̱na Anduane Homogohondo ka̱i̱ lalu, Anduane Homogo-o í̱ ale mende ai kabe. Í̱na wali agali yagibano karu biamogo bialu agali hongohe karunaga giha howa biamogo bialu mo wirili. Agali homogo hongohe karume yagibano karu mo ko holilono í̱na pele mialu mamage ho harili.

¹¹Agali ke̱ haga bu karume i̱hondo bi laede halu i̱na mana ko nabinigo tigua i̱na ko biya laga ka.

¹²I̱na tihondo mana bayale bialu kogola tigua i̱hondo ko biadai biaga ka. Anidagua bialu haragome i̱naga bu miniha genda ho kogoni.

¹³Ti warago timbuni bo ngangi i̱na ti dara halu i̱ni mo dindiha howa dara holene aga karulalu tomo nane haruli. Tomo nane howa i̱na Anduane Homogohondo tinaga bi la halu harugoni.

¹⁴I̱na i̱ni aba hamene haniniru baba miniha gendaho hagadagua ti dara halu gendaho ibaga bialu harugoni. I̱ agali darabi ai̱ya homene igini haradagua buwa dugu bialu i̱naga bu miniha genda yu harugoni.

¹⁵I̱ genda yu hewangi ti mo mogo buwa i̱ hondo oba halu turu haga biya. Tigua i̱ mo ko holenaga mo ngoai ho hayagoni. Agali maru i̱ de nahendene hearume i̱ mo ko holenaga bi ko lalu i̱ baabo haya.

¹⁶Tigua i̱ mege biaabo halu haya. Tigua i̱ handabe manga halu ngui higi bu yu ibagabu hayagoni.

¹⁷Anduane Homogo-o tigua agira halu ogonidagua bialu haabo helo heloleberebe. Tigua i̱ mo ko nahelo tinaga giha howa í̱na i̱ pele ngibe. Ti laiono gabua ale howa i̱ bo wahole kago tinaga giha kongi í̱na i̱ mo wibe.

¹⁸Í̱na i̱ biamogo birigonaga i̱na wali agali dewa ngoaiho karia howa ti hale helo í̱hondo ka̱i̱ lolebero. Wali agali dewaliore bu karunaga deni howa í̱naga mini yaraga halu holebero.

¹⁹Agali maru i̱la waitigi bame irane nawini ho karume i̱ mege bialu bope helo nahelabe. Tigua i̱ bameore handabe manga ho karume i̱ hondo oba halu mini ko wialu mine helo nahelabe.

²⁰Agali uruni tigua mendeali karu baba bayale holenenaga bi nalaga ka. Tigua wali agali bayale karu baba karia ko mbira nabini kago mo yapara howa bo wahole bi lalu haga ka.

²¹Tigua i̱hondo bi hongo howa ladagadaga bialu lalu, Heneneore í̱na ko birigo ina handarima, lalu haga ka.

²²Anduane Homogo-o tigua ani biyaruni í̱ de handarigo í̱na bi nale nahabe. Anduane Homogo í̱na i̱ helalu kaundiaha nahabe laro.

²³Anduane Homogo-o í̱ore abale heyalu i̱ biamogo bule ibabe. I̱naga Ngode Datagaliwabe-o í̱ heyalu i̱na bi lalu koru mo hongo halu lahabe.

²⁴Anduane Homogo-o í̱ mini tigabiore kego í̱na i̱ mana mbira ko nabini kogo latagi habe. Waitigi karume manda bilo i̱ biamogo bialu i̱naga bi lahabe. Agali uruni tigua i̱ hondo oba halu bi ko lalu mine helo nahelabe laro.

²⁵Tigua tini lo mitangi bialu lalu, Mbirale bilo hamelo harimago ai tagira piyagoni. Agali o biago iname mo ko ho waharimagoni, nalelo í̱na i̱ handayaho habe laro.

²⁶I̱ha genda ibiyagonaga turuho haga karu í̱na ti taga helo mo luluya ho helabe. Tigua i̱ bope halu tininaga mini yaraga haga karu í̱na ti bope halu mo taga ho helabe.

²⁷Í̱na i̱ agali tigabi ka labelo hamelo karu tigua turu ho howa tinaga bu miniha dungulo helo helabe. Horo bibahendengi tigua lalu, Anduane Homogo ibu dunini heneneore mbira ka. Ibugua ibunaga biabe biahaga kago bayale helo hame laabo haga ka, lolebira.

²⁸I̱na í̱ mana bayale bialu mini tigabi kego lalu horo bibahendengi howa latagi halu í̱naga mini yaraga halu haabo holebero.