Read Huli Iba Gana 36 Bible Online

Iba Gana 36 - Huli bible

Iba Gana 36

¹Mana kome mini kowi karunaga bu miniha bi lamiaga. Mana ko biaga karume Ngode Datagaliwabehondo gi nahaga howa erembira mialu yo handaga ka.

²Ko biaga uruni tigua mine howa tini lalu, I̱ duniniore mbirago kogoni, laga ka. Ngode Datagaliwabehanda tigua ko biyaru handa walia halu dabaki nabulebiralo manda biaga ka.

³Horo bibahendengi ogoni ale biaga karume mana ko bulenenaga bi mo tene howa ke̱ halu bi laabo haga ka. Mana bayale bulenenaga mini bayale mbira tiha nawiore kagoni ndobe.

⁴Dagiani u paluwa mana ko bulenenaga miniha mitangitangi bialu paliaga ka. Tigua mana ko bulenego bibe manga nahaga howa ko bulene ngagoha haabo haga ka.

⁵Anduane Homogo-o í̱naga gubalini haabo holene emene ndoore hari daliga elahe wu kegoni. Í̱naga mini bilinahe ngego timbuni yangale howa hari mindini elahe wu kegoni.

⁶Í̱naga mini tigabi timbuniore ngego dindi hari ngaru bolanguahe ngegoni. Í̱naga mana tigabiore mo dabaki haga ngegobi ina kamarume manda biai habe nahe kama. Ogoni iba solowara uli unuraore ngaligobi nge. Anduane Homogo-o í̱nime wali agalibi ema bialu piaga bedarubi nogo tara tarabi handayaho hai haga kegoni.

⁷Ngode Datagaliwabe-o í̱naga gubalini haabo holene baya buruguleore ngegoni i̱ hame timbuni lo ko. Í̱ ogonibi kego wali agali bu karu tanabi ti í̱ni kegoha kaware ibiragola ega angibuninaga babaganeme igini dambiho paliagadagua í̱na ti dambiho haga kegoni.

⁸Í̱ andaga tomo dewa bu payabu ngegome wali agali tomo garibi nale haga ka. Í̱naga turu holene iba bayale timbuni duguaragobi ngego wali agalime nelo miaga kegoni.

⁹Ina bibahendenaga holene tene Anduaneore í̱ kegoni. Í̱ni wá taraore holene Anduane kegome í̱niha howa ina wá bayaleore de hondo kamagoni larama.

¹⁰Wali agali í̱ mandabi karu í̱na ti gubalini ho haabo habe. Wali agali mini tigabi karu ti bayale haabo helo í̱nime ti biamogo bialu habe.

¹¹Agali mine haga bu karume i̱ bo hengedope holani handabe. Mini kowi bu karume i̱ bo batagi holani handabe.

¹²Agali ko biaga biaru ebere pilo ngaruni de handa. Ti lone heyabe naheore ngagoni.