Read Huli Iba Gana 38 Bible Online

Iba Gana 38 - Huli bible

Iba Gana 38

¹Anduane Homogo-o í̱na keba ho kegonigo i̱hondo keba howa i̱ minu boleni.

²Í̱na í̱naga timume i̱ bogalu í̱naga gime i̱ bope ho heledegoni.

³Í̱na i̱hondo keba harigola i̱naga tingini tandaga timbuni handalu kogoni. I̱na ko bini ngogome i̱ha warago timbuni balu ngogoni.

⁴Ko i̱ha ngagome i̱ bo dambi hai haragola nu gendabi ale howa yu habe nahe kogoni.

⁵I̱ni mini nawi howa mana liaheore birugome i̱naga tinginini dere bidaru ibane timbuni tuguda tagitagi bialu ngu taraore biragoni.

⁶I̱ miniha genda timbuni yu kogome i̱ni handa dindi ho bedogoni. Horo bibahendengi dara howa dugu biaabo halu kogoni.

⁷I̱naga tinginiha poboyogo timbuni bialu irame daradagua bidagola i̱ warago timbuniore balu kogoni.

⁸Mbirale tara mbirame i̱ bo hengedaradagua bidagome i̱ hongo nahe kogoni. I̱naga miniha mo ko henego tandaga howa ya lalu ngogoni.

⁹Anduane Homogo-o í̱na i̱naga hame hongohe ngelo kogoni manda biai kegoni. I̱naga bu miniha dugu bialu koru mbira do naheore í̱na haleme hale hai ho kegoni.

¹⁰I̱naga bu hongo howa ala duguaga bialu i̱naga hongo pirilape ka. I̱naga de aruma hai kagome mbirale mbira handabe naheore kogoni ndobe.

¹¹I̱ tinginini dere ko ngubi bidarume i̱naga damene nenegeru i̱ni kogoria ibua nahaya. I̱ one waneiginirubi ti kaundianiore haruruni ndobe.

¹²I̱naga waitigi bu karume i̱ gonoha delonaga gono wu kagoni ndobe. Agali i̱ mo ko halu bole karume i̱ bo wahami̱ya laga bialu ka. Horo bibahendengi tigua i̱hondo mana ko hangu bulene manda bialu haga kagoni.

¹³I̱ hale tuluhe ale howa tigua bi lararu hale habe nahe ko. I̱naga bi ndibulo wahene ale howa ne hariga ha̱ lalu bi labe nahe ko.

¹⁴I̱ agali hale tuluhe haraligobi howa tigua bi lararu i̱na ladai bibe naheore kogoni.

¹⁵Anduane Homogo-o i̱na í̱hondo mini mbiraore wu kogoni. Anduane Homogo i̱naga Ngode Datagaliwabeore-o í̱na i̱naga bi larogo ladai biaga kegoni.

¹⁶Waitigi bu karume wai hanalu i̱ bope holenaga mine bi lelo nahelabe. I̱ emene pilope harogola ti turu helo nahelabe laro.

¹⁷I̱ tandaga timbuni handaabo halu kogome i̱ pilolene kawareore ngagoni.

¹⁸I̱na ko bialu haruru í̱hondo latagi hai harugoni. I̱ni mana liahe birudarunaga dara timbuniore ho kogoni.

¹⁹I̱ waitigi dewaore hongo gibihe bu ka. I̱ bame handabe manga haga karu ti dewaore daga labenahe ka.

²⁰I̱na mana bayale hangu bialu kogola tigua i̱hondo mana ko biadai biaga kagoni. I̱na mana bayale ngago talialu bialu kogola tigua i̱ baba bameore mo waitigi haga kagoni.

²¹Anduane Homogo-o í̱na i̱ yu wanahabe laro. I̱naga Ngode Datagaliwabe-o i̱ helo wahalu kaundia nahabe.

²²Anduane Homogo-o i̱ Pele Ngiaga í̱ni hanguore kego i̱ biamogo bule abaleore ibabe.