Read Huli Iba Gana 39 Bible Online

Iba Gana 39 - Huli bible

Iba Gana 39

¹I̱na bi lo wirugo ogo, I̱nime bi ko loligo mana berogobi baya hangu mamage howa bialu holebero. Agali mana ko biaga i̱ koria kaware kangi i̱na ti baba bi mbira nalolebero, larugoni.

²I̱na i̱naga ne hariga ndibulo howa bi mbira nale haru. Bi bayalenaga lalubi mbira nale dege harugoni. Anigoyu i̱ha genda timbuniore ngelo hene.

³I̱na mini tumutumu bu harugoni. I̱na mitangitangi bialu haabo hewagola i̱naga miniha mo ko haiore hene. Ai i̱na i̱naga ne hariga ndibu lowa ndo i̱na bi lolebero manda biru.

⁴I̱na Anduane Homogohondo hale halu lalu, Anduane Homogo-o i̱naga holeneha i̱ mali agira agima holeberobe. I̱ angi homoliyadabe. I̱ dindini holene tubagi dege wiaruabe be ludabe i̱ni langibe, laru.

⁵I̱naga holene tigimandi hangu ngeledegonida. Í̱naga deni i̱naga holene emene ogoni nagaloneoredane hendede. Wali agali bibahendenaga holene lu ndo mbiralime ne harigaha buhe̱ halu mbira hangu latagi hagagobi dege nga.

⁶Ni daragola ina mbiralinaga munini ale kama. Dindini mbirale bayale wini ngaru mule biabe erekuibi bia bialu howa bame nagalone bialu haga. Iname mbirale dewaore mo mogo bialu kamagoyu ái ibu holebirabe manda nabi kama.

⁷Ai Anduane Homogo-o i̱na agilenaga mini dunubia ho holiyabe. Í̱na hangu i̱ biamogo bibelo lowa i̱na í̱nihondo mini dunubia ho kogoni.

⁸Í̱na i̱ pele ngialu i̱na ko biruru domo wahabe. Agali ko mini nawi ale karume i̱ hondo oba halu mege bialu helo nahelabe.

⁹I̱na i̱naga ne hariga ndibu lowa bi mbira nale holebero. Ogonaga irane i̱na tandaga uruni narogo í̱nime i̱hondo ibilaridagonaga bi nalolebero.

¹⁰Ainde i̱ lone nababe laro. Í̱na i̱ pani ngirigome ai homabeheore kogoni ndobe.

¹¹Wali agalime mana ko birarunaga í̱na pani mirili. Bombome aga labolabo nalu budabaga biagadagua í̱na inanaga mbirale hameledamaru mo wahai haga kegoni. Heneneore larogo wali agali bibahendenaga ne harigaha buhe̱ halu mbira hangu latagi hagagobi dege ka.

¹²Anduane Homogo-o i̱naga bi larogo hale habe. I̱na bi lalu kogoni baya hangu hale ho habe. I̱na dugu bialu koria de iba ibirago hondowa í̱na i̱ biamogo bibe. I̱naga mamaliru ti nde dindi ogoria tigi mbira hangu halu homayadagua i̱nibi nde dindi ogoria tigimandi hangu holeberogo í̱ manda biaiho kegoni.

¹³I̱ lone mo tandaga nahe emene hangu nde i̱naga bu miniha dungulo holiya helabe laro. Mani i̱ homalu nde dindi ogo wahalu poliyadago ani helabe laro.