Read Huli Iba Gana 4 Bible Online

Iba Gana 4 - Huli bible

Iba Gana 4

¹Ngode Datagaliwabe-o í̱na i̱ mo wayali haga kegoni. I̱na í̱ olarogola í̱na i̱naga bi larogo hale habe. Bamba i̱naga miniha genda yu hewagola í̱na i̱naga genda mo wahai harigoni. Í̱na áyubi i̱ dara holene irane nawini howa i̱naga bi hale halu biamogo bibe.

²Agali bu kamiru tígua i̱naga mini mo ko haga bialu horo agiru holeberemibe. Ko ngaru hangu mo tene halu mana henene bulene ngaru nabi horo agiru holeberemibe.

³Tígua bi ogoninaga irane manda bilimu. Wali agali Anduane Homogonaga andaneha haga karu ti ibuninagaore helo dabene ka. Horo bibahendengi i̱na ibuhondo olalu haabo kogola ibugua i̱na olarogo hale haga ka.

⁴Tígua mana ko bialu kamigo wahalu Anduane Homogohondo gi ho holene nga. Tígua dagiani paluwa bi maru nale mana ogoni baya hangu manda bilimu.

⁵Tígua Anduane Homogo ibugua hame laga aleru ibunihondo lomabu milimu. Ibunihondo tí mini mbiraore wu halimu.

⁶Wali agali dewalime lalu, Anduane Homogo-o í̱naga mo bayale holene ngibelo. Í̱na ina dara halu biamogo bibelo hamelo kama, lalu lagane ka.

⁷Tomo widi gerebi liniru dewa andaho kagola mabu anduane karume ti turuho haga. Anigoyu í̱na i̱ha turu holene wia harigome tinaga turu holene bolangua heneore ngirigoni.

⁸Anduane Homogo-o í̱nimeore i̱ handayaho kegome i̱ bayaleore kogoni. I̱ dagiani palialu howa mbirale mbirahondo gi nahe miniha dungulo howa paliahondo haruli.