Read Huli Iba Gana 40 Bible Online

Iba Gana 40 - Huli bible

Iba Gana 40

¹Anduane Homogo ibugua i̱ biamogo bilonaga i̱ mini dege dindi nahe ema nabi haru. Ani hewaria nde ibugua i̱na bi larugo hale halu biamogo biya.

²I̱ gundu uli gibi hiriribiha pilo wiwaria ibugua hale halu gililo miya. Uli unuraore lumburaha homole yupe halu hewaria ibugua i̱ gililo miya. Ibugua i̱ gililo muwa ege to̱le̱ni mo heya ho helalu i̱ yo pialu poliya ani biya.

³Ibugua i̱na iba gana gahenge mbira i̱nanaga Ngode Datagaliwabe kagonaga mini yaraga halu loliya lawai haya. Ani biyaego hondowa wali agali dewaoreme mini wialu ti Anduane Homogohondo mini mbiraore wulebira.

⁴Wali agali Anduane Homogohondo mini mbiraore wuwa mbirale tara gime wabiniru mitangi nahe mbirale uruniale mitangi haga karume biagadagua nabiaga karu ti turuho ka.

⁵Anduane Homogo inanaga Ngode Datagaliwabe-o í̱na inanaga mbirale dewaore gibi bia haga birigoni. Í̱ aleore mende nahe manda bidama. Iname bima lama hama polomadagonaga dewaore í̱naga miniha magoyu kegoni. Hama ibirimahayagibi walia hama ibirigoni. Í̱na inanaga bia hama ibirigoni manda bialu howa ina daga au loabe tobahe gibiore bia harigoni mandabu kama.

⁶Ogoni bia harigonaga iname í̱hondo turu halu mbirale lomabu ngulenegobi mbirale homa hende loma delagane dabuni bo delo ngulenegobi uruni alego í̱ hame nalagayagoni. Inanaga ko domabelo lowa mbirale mbira bo delo ngulenegobi í̱ hame nalaga degeyagoni. I̱na í̱naga bi larego hale halu buliyanaga í̱na i̱naga hale kira wabuwa dugua ho heledegoni.

⁷Í̱na ani bidego manda buwa i̱na buliya damenego í̱naga mbugani mana lo ngegonidagua i̱na bule kogoni laru.

⁸I̱naga Ngode Datagaliwabe-o i̱na í̱na hame ledegodaguaore bule turuho kogoni. Í̱naga bi mana lo ngeru i̱na i̱naga bu habaneha mo hengedogoni.

⁹Anduane Homogo í̱naga wali agali mo ngoaiho bereagoria i̱na ina kamaru pele ngiaga í̱ kego lalu bi baya turubi ogoni ti hale hai helo lamiru. I̱na bi ogoni dege lalu kone lairi naholeberogo í̱ manda bidegoni.

¹⁰Anduane Homogo í̱na wali agali pele miaga kegonaga bi te ogoniore i̱ni yu donge nahe lamiru. Í̱na biamogo biaabo hariligonagabi í̱ mini bilinahe kegonagabi wali agali lamiaabo haru. Í̱naga wali agali bibahende mo ngoaiho bereagoria Anduane Homogohanda ina handaya haho wiaabo halu gubalini haho wiaabo haga ka lalu i̱na yu donge nahe lamiaiore haru.

¹¹Anduane Homogo-o í̱na i̱ dara howa biamogo bulene nawi howa dara howa biamogo biaabo hariligoni. Ogoninaga biairi naholebeda lo manda bido. Í̱naga gubalini holenemebi mini bilinahe holenemebi i̱ yani ho wiaabo kegola i̱ bayale karulapeore holoboda lo manda bido.

¹²Genda bulene tara tara dewaore i̱ kogoria bu payabu ngagola kogoni. Genda bulene dewaore wu mabu bupe kagola i̱ dombeneha kogoni. Genda bulene uruni daga aulole nalabehe dewaore ngagoni. Mana ko i̱na bigi birurume i̱ni bope henego kogoni. I̱ni ko uruni birugome i̱ mininaga de au henego mbirale bayuwa handabe nahe kogoni. I̱na ko biruruni dagalabe nahe i̱ninaga haguaneni mandari li bu karubi ndo gibiore birugoni. I̱naga miniha hongo mbira naheore pirilipe ho wahenego kogoni.

¹³Ani bidane kogo Anduane Homogo-o í̱na i̱ pele ngibe. Áyu ogoniore i̱ mo wia.

¹⁴Agali marume i̱ bo wahole manda bialu karu í̱na ti bope halu tinaga miniha mo talola howa mini burugulo helabelo hamelo kogoni. I̱ genda timbuni yu kogo hondowa wali agali maru ti turu haga ka. Wali agali urunibi biaga karu í̱na bo badai bialu tinaga mini ti taga ho helo bope habelo hamelo ko.

¹⁵Wali agali urunime i̱naga mini lahiralu i̱ mege biaga karuore í̱na ti mo taga haho wiaabo habelo hameledo. Í̱na ani berego handalu tini taga halu tini mana bialu hayadago mitangi budai bilo mo taga habelo hamelo kogoni.

¹⁶Wali agali maru í̱ keria ibiraru ti bibahende turuho helo hameledo. Í̱na ti pele mirigonaga turu howa ka̱i̱ lalu karume Anduane Homogo ibu gibi daligaore ka lai helo hameledo.

¹⁷Anduane Homogo-o i̱ ko yagibanoni hongo naheore kogoni. Í̱ ani kogonigoyu í̱na i̱ embeda nahe mitangi bu kegoni. Í̱ i̱naga Ngode Datagaliwabebi i̱naga pele ngiagabi kegonigo i̱ pele ngule áyu ogoni abale ibabe laro.