Read Huli Iba Gana 41 Bible Online

Iba Gana 41 - Huli bible

Iba Gana 41

¹Yagibano karu mitangi bialu biamogo biaga karu ti turubiore holebira. Uruni tiha genda timbuni tagira ibirangi Anduane Homogohanda ti biamogo bulebira.

²Anduane Homogohanda ti biamogo bialu handayaho holebira. Ibugua ti dindini turu ho helo baya hangu handayaho holebira. Tinaga waitigi karume mo ko helo ibugua ti yupe naholebira.

³Wali agali uruni ti warago timbuni bo ngangi Anduane Homogo ibugua handayaho haabo holebira. Anduane Homogohanda ti warago bararu mo dabi halu bayale helo mo hongo holebira.

⁴I̱na bi ogodagua laru. Anduane Homogo-o i̱na í̱hondo ko timbuniore birugoni. I̱na ani birugo í̱na i̱ dara howa biamogo bialu i̱ha warago timbuni ngago mo dabi habe.

⁵I̱naga waitigi karume i̱hondo bi tandagabi lalu kagoni. Tigua lalu, Ibu abale homa nabirago ina embedaho wahami̱ya, laga bialu ka.

⁶Agali i̱ warago bo ngoria de hondo ibirarume dara hetingi howa hondo ibaga. I̱ warago ko timbuni bo ngogonaga te hale holene hame laga. Hale halu tagira puwa bibahendeha i̱naga warago ogoninaga te loyogo laga.

⁷I̱ handabe manga haga karume i̱ warago ogoninaga hagarere bi lagalaga bialu haga. Tigua mitangi bialu ko timbuniore mbirame i̱ mo ko haragonida lo mitangi biaga.

⁸Tigua lalu, Warago ko tara mbirame minidagonigo ibu lone heyulene nawi homolebira, laga bialu kagoni.

⁹I̱naga nenegeore mbira henego iya haru mandagi ibagabu halu tomobi mandagi nalu biraga henego ogoni ibuguabi nde i̱ handabe manga dege halu handa tara haya.

¹⁰Anduane Homogo-o ainde í̱na i̱ dara howa biamogo bialu i̱naga warago ngogo mo dabi habe. I̱naga waitigi biarume i̱hondo biyarunaga pani i̱na biadai buliya ani bibe.

¹¹Waitigi bu karume i̱ bope nahayagua nde í̱na i̱ gubaliniore ho kedalo mandabu holebero.

¹²I̱na mbirale beroru tigabi bialu koria de hondowa í̱na i̱ biamogo bulebere. I̱ í̱niha haparaho holiya í̱na i̱ handayaho haabo holebere.

¹³Anduane Homogo Isaraele wali agalinaga Ngode Datagaliwabe kago ibunaga mini áyu ogoni yaraga holene nga. Wali agali mani hama polobadarumebi ani dege bialu haabo helo. Aniore bilo laro.